Kolose 3

1 Basudara e! Allah su kasi hidop kamong kombali sama-sama deng Kristus, la kamong pung hidop su jadi baru. Tagal itu, kamong musti salalu taru hati par apa sa yang Allah di sorga mau. Di sana, Kristus dudu di Antua pung sabala kanang, tampa paleng panting. 2 Kamong musti salalu taru hati par apa sa yang Allah di sorga mau. Jang pusing deng apa sa yang dunya mau. 3 Barang, kamong su mati deng hidop kombali la jadi satu hati deng Kristus yang hidop sama-sama deng Allah di sorga. Mar orang-orang yang seng parcaya, dong seng mangarti soal kamong pung hidop baru tu. 4 La waktu Kristus yang biking kamong pung hidop jadi baru tu bale kombali la dapa hormat, kamong jua nanti dapa hormat sama-sama deng Antua.

5 Tagal itu, kamong musti kubur kamong pung tabiat hidop lama yang tarbae ni! Jang paskali tidor deng orang yang bukang kamong pung laki ka bini! Jang biking yang kurang-kurang ajar! Jang muka napsu! Jang inging biking kajahatang deng jang baringing! Barang, kalo katong baringing apapa satu, itu sama sa deng katong ada somba patong-patong. 6 Jang biking samua tu, tagal dosa-dosa yang macang bagitu tu yang biking sampe Allah morka [orang-orang yang seng iko Antua pung mau]. 7 Dolo, kamong jua biking samua tu waktu kamong masi tarika deng dunya pung mau. 8 Mar sakarang, kamong musti kasi tinggal tabiat hidop lama yang tarbae ni lai! Jang jumawa. Jang takiri-kiri. Jang binci orang. Jang biking busu orang laeng pung nama deng jang bamaki. 9 Jang laeng parlente laeng. Jang biking samua-samua tu, tagal kamong su kasi tinggal tabiat hidop yang lama deng kalakuang-kalakuang tarbae, yang dolo kamong biking waktu kamong balong parcaya Yesus Kristus. 10 La sakarang ni, tagal kamong su parcaya Yesus Kristus, kamong su hidop deng tabiat hidop yang baru. Allah sandiri yang biking kamong pung tabiat hidop labe hari labe tamba sama deng Antua, biar kamong bisa batul-batul kanal Antua. 11 Tagal kamong pung tabiat hidop su jadi baru, seng jadi soal lai kalo kamong tu orang Yahudi ka bukang Yahudi, orang yang sunat ka seng sunat, orang Barbar ka orang Skit, jongos ka bos. Samua orang sama, tagal yang paleng panting par katong tu cuma Yesus Kristus sa, deng tagal Antua tinggal dalang orang parcaya samua pung hati.

12 Basudara e, Allah sayang kamong deng su pili kamong par jadi Antua pung orang-orang. Tagal itu, kamong musti pung hati bae, randa hati, hidop manis deng orang laeng, sabar, deng paduli deng orang yang susa. 13 Kamong musti sabar satu deng laeng, deng seng bole simpang mara par orang yang biking sala par kamong. Tuhan sa su kasi ampong kamong pung dosa, jadi kamong jua musti kasi ampong orang laeng pung sala par kamong. 14 Kamong musti biking samua tu, mar yang paleng panting paskali, kamong jua musti baku sayang satu deng laeng. Barang kalo kamong baku sayang, kamong samua bisa batul-batul taika jadi satu hati. 15 Kristus su kasi dame dalang kamong pung hati, jadi kamong musti usaha par hidop dame satu deng laeng. Barang, Allah su pili kamong par hidop dame satu deng laeng, macang deng manusia pung badang yang taika dari bagiang yang beda-beda. La kamong jua musti minta dangke dari Antua tarus. 16 Simpang Kristus pung ajarang dalang kamong pung hati tarus, biar kamong pung pikirang tajang waktu kamong kasi nasehat deng ajar satu deng laeng. La manyanyi lagu-lagu rohani par puji Tuhan. Minta dangke dari Allah deng hati antero-antero. 17 Samua yang kamong biking deng bilang tu, biking akang iko Tuhan Yesus pung mau. La waktu kamong biking bagitu, minta dangke tarus dari Allah Bapa lewat Tuhan Yesus.

Nasehat par anana deng orang tatua

3:18-21

18 Hoe bini-bini e! Kamong musti dengar-dengarang kamong pung laki, tagal itu yang parampuang yang parcaya Tuhan musti biking. 19 Hoe laki-laki yang su kaweng e! Kamong musti sayang kamong pung bini deng jang kasar par dong. 20 Hoe anana e! Kamong musti dengar-dengarang deng iko samua yang kamong pung orang tatua bilang. Barang, Tuhan pung hati sanang kalo kamong biking macang bagitu. 21 Hoe bapa-bapa e! Jang kasar deng kamong pung anana biar dong pung hati seng ancor. Kalo kamong kasar, dong pung samangat nanti pata.

Nasehat par jongos-jongos deng bos-bos

3:22—4:1

22 Hoe jongos-jongos e! Kamong musti dengar-dengarang deng iko samua yang kamong pung bos di dunya ni bilang. Jang biking bagitu cuma di muka dong sa biar dong puji-puji kamong, mar musti biking akang deng sunggu-sunggu par taru hormat par Tuhan. 23 Apa sa yang kamong biking, kamong musti biking akang deng sunggu-sunggu macang deng kamong ada biking akang par Tuhan, bukang par manusia. 24 Kamong su tau kalo Tuhan nanti kasi apa yang Antua su janji par balas kamong. Barang, Kristus tu kamong pung Bos yang batul, la kamong tu Antua pung jongos yang karja par Antua. 25 Sapa sa yang biking apa yang jahat, dia nanti dapa hukum iko apa yang dia su biking tu. Barang, Antua seng lia-lia muka.