Nasehat par anana deng orang tatua
6:1-4
6
1 Hoe anana e! Kamong su satu hati deng Tuhan, jadi kamong musti dengar-dengarang kamong pung orang tatua, tagal itu tu yang batul!* 2 Dalang Allah pung Tulisang jua ada bilang kata, “Musti taru hormat par ale pung mama-papa!” Dari Antua pung parenta-parenta, ini ni parenta partama yang ada pung janji. Janji tu: 3 “Kamong nanti pung hidop bae deng umur panjang.”*4 La bapa-bapa e! Jang kasar deng kamong pung anana, biar dong pung hati seng ancor. Labe bae piara dong dari kacil deng nasehat deng ajarang dari Tuhan.*
Nasehat par jongos-jongos deng bos-bos
6:5-9
5 Hoe jongos-jongos e! Kamong musti batul-batul dengar-dengarang deng taru hormat par kamong pung bos di dunya ni, sama deng kamong dengar-dengarang Kristus.* 6 Kamong tu Kristus pung jongos, jadi jang cuma taru hormat par kamong pung bos di muka dong sa biar kamong dapa puji. Mar, kamong musti biking akang deng hati antero-antero sama deng kamong ada biking Allah pung mau. 7 Jang karja deng stenga hati, mar karja macang deng kamong ada karja par Tuhan, bukang par manusia. 8 Barang, kamong su tau kalo Tuhan nanti balas sapa sa yang biking apa sa yang bae, biar kata dia tu jongos ka bukang jongos lai.
9 Hoe bos-bos e! Kamong jua musti biking macang bagitu lai par kamong pung jongos. Jang maeng ancam dong. Ingatang! Kamong deng dong pung Bos tu satu. Antua ada di sorga deng Antua seng lia-lia muka.*
Pake samua yang Tuhan Allah su kasi tu par lawang setang-setang
6:10-20
10 Basudara samua, dengar beta pung kata-kata yang laste ni bae-bae. Kamong musti satu hati deng Tuhan tarus biar Antua kasi kuat kamong pung hati deng Antua pung kuasa yang paleng hebat tu. 11 Pake samua yang Allah su kasi par baku prang, biar waktu Setang pung Raja coba kamong deng dia pung akal bulus, kamong bisa malawang dia, sama deng tantara yang pake dia pung alat-alat prang samua par lawang dia pung musu. 12 Barang, katong seng prang lawang manusia, mar prang lawang setang-setang deng roh-roh jahat yang pung kuasa deng yang kuat. Katong prang lawang setang-setang pung pamimping-pamimping yang pung kuasa di langit deng yang pegang parenta di dunya yang jahat ni. 13 Tagal itu, kamong musti pake samua yang Allah su kasi par baku prang tu, biar waktu kamong dapa hantam dari samua yang jahat tu, kamong bisa badiri lawang akang sampe abis. La waktu prang tu su abis, kamong masi tetap kuat tarus.
14 Jadi basudara e, kamong musti salalu siap par baku prang. Tagal itu, kamong musti pikir deng biking apa yang batul. Itu sama deng rim yang kamong hela tare-tare di kamong pung pinggang. Kamong musti salalu hidop batul di muka Tuhan. Itu sama deng kamong pung pampele dada.* 15 Kamong musti salalu siap par kasi tau Kabar Bae yang bisa biking sampe orang-orang hidop dame deng Allah. Itu sama deng sapatu di kamong pung kaki.* 16 Siang-malang, kamong musti pegang kamong pung parcaya kuat-kuat par Tuhan, tagal itu sama deng salawaku yang bisa tangkis pana api dari Setang pung Raja. 17 Kamong musti salalu inga kalo Tuhan su kasi salamat kamong. Itu sama deng topi waja par jaga kamong pung kapala. La pegang Antua pung ajarang tu kuat-kuat. Itu sama deng kamong ada pegang parang yang kamong tarima dari Antua pung Roh.*
18 La siang-malang, apa tempo sa, deng di mana sa, kamong jua musti minta Allah pung Roh pimping kamong par sombayang angka hati par Antua. Kamong musti salalu siap deng seng putus-putus sombayang par Allah pung orang-orang. 19 Sombayang jua par beta lai, biar sabang kali beta buka mulu par bicara soal Kristus, Allah kasi kata-kata yang pas par beta, biar beta seng taku sadiki lai par kasi tau Kabar Bae yang dolo tatutu mati dari orang-orang. 20 Barang, beta ni Yesus Kristus pung utusang yang dapa bui tagal kasi tau Kabar Bae tu. Jadi, tolong sombayang par beta jua, biar Allah biking beta labe barani par kasi tau Kabar Bae tu, macang deng apa yang beta musti biking.
Paulus bicara soal Tikikus deng tutu dia pung surat
6:21-24
21 Basudara e! Biar kamong bisa tau kata beta sakarang ada bagemana, katong pung sudara Tikikus yang katong sayang deng yang seng putus-putus karja par Tuhan tu yang nanti kasi tau akang par kamong.* 22 Beta utus dia deng maksud macang bagitu, biar dia bisa kasi tau katong pung kabar par kamong di sana, deng biar dia bisa kasi kuat kamong pung hati.*
23 Beta minta biar Allah Bapa deng Tuhan Yesus Kristus kasi dame par basudara dong, biking basudara dong parcaya Yesus Kristus tarus, deng biking basudara dong baku sayang satu deng laeng. 24 Beta jua minta biar Tuhan Allah kasi Antua pung berkat basar par samua orang yang sayang katong pung Tuhan Yesus Kristus tarus.
Hormat, Paulus