Mari hidop sama deng orang yang hidop dalang tarang
5:1-21
5
1 Basudara e, kamong tu Allah pung anana yang Antua paleng sayang. Tagal itu, kamong musti iko Antua pung conto. 2 Kamong musti hidop baku sayang satu deng laeng, sama deng Yesus Kristus yang su sayang katong deng yang su kasi Antua pung diri par mati par kasi salamat katong. Apa yang Antua biking tu, akang sama deng korbang binatang yang orang bakar par Allah la akang pung asap yang bobou sadap tu biking Antua pung hati sanang.* 3 Kamong tu Allah pung orang-orang. Jadi, jang tidor deng orang yang bukang kamong pung laki ka bini! Jang biking yang kurang-kurang ajar! Ka jang baringing! Pikir akang jua jang lai, tagal Allah pung orang-orang seng pantas par biking bagitu. 4 Kamong jua jang carita yang kurang-kurang ajar! Jang omong kosong! Ka jang baku sangaja yang kurang-kurang ajar! Kamong seng pantas par biking bagitu. Labe bae minta dangke dari Tuhan. 5 Kamong musti inga bae-bae kalo orang yang tidor deng orang yang bukang dia pung laki ka bini, ka orang yang biking yang kurang-kurang ajar, ka orang yang baringing, dong tu seng bisa tarima apa yang Allah su janji par Antua pung orang-orang. Barang, dong seng kasi biar Yesus Kristus deng Allah pegang parenta dalang dong pung hati. Orang yang baringing apapa satu, itu sama sa deng dong ada somba patong-patong.6 Basudara e, jang kasi biar satu orang lai parlente kamong kata Tuhan Allah seng hukum orang-orang yang biking dosa-dosa tu. Barang, Tuhan Allah paleng morka deng orang-orang yang biking samua tu, tagal dong seng dengar-dengarang Antua. 7 Tagal itu, jang kamong baku tamang deng orang-orang yang macang bagitu. 8 Memang dolo kamong jua biking bagitu lai, tagal kamong masi hidop dalang galap. Mar sakarang, kamong su hidop dalang tarang tagal kamong su satu hati deng Tuhan Yesus. Jadi, kamong musti hidop sama deng orang-orang yang hidop dalang tarang, 9 tagal orang yang hidop dalang tarang biking samua yang bae, samua yang sama deng Allah pung mau, deng samua yang batul. 10 Kamong musti usaha par cari tau soal apa sa yang biking Tuhan Allah pung hati sanang.
11 Jang biking apa yang orang-orang yang hidop dalang galap biking, yang seng ada pung guna tu. Mar, kamong musti tagor dong biar dong tau kalo apa yang dong biking tu sala. 12 Barang, biar kata cuma bicara apa yang dong biking sambunyi-sambunyi tu sa, itu su biking katong paleng malu sandiri. 13 Conto bagini: Kalo kasi manyala palita dalang galap, orang pasti bisa lia apa sa yang ada di situ. Bagitu lai kalo katong kasi unju apa yang Allah pung kata-kata bilang soal apa yang dong biking tu, dong bisa mangarti kalo apa yang dong biking tu sala. Barang, Allah pung kata-kata tu macang deng tarang yang biking orang dapa lia apa sa yang ada dalang galap. 14 Itu tu mangapa kong ada yang bilang kata,
“Hoe kamong yang tidor, bangong!
Kamong yang mati, hidop kombali!
Barang, Kristus mau kasi tarang kamong pung hati.”
15 Jadi basudara e, jaga kamong pung hidop bae-bae! Jang macang deng orang bodo, mar musti macang deng orang yang pung pikirang tajang. 16 Sabang kali kamong ada pung waktu par biking hal-hal yang bae, pake akang bae-bae. Barang, sakarang ni orang-orang biking apa yang jahat tarus.* 17 Jadi jang bodo, mar usaha biar kamong bisa mangarti apa yang Tuhan mau.
18 Jang minong-mabo, tagal minomang bisa hela kamong par biking sagala macang hal yang seng bae. Labe bae kasi kamong pung diri par dapa pimping dari Tuhan pung Roh. 19 Kasi kuat laeng deng laeng pung hati deng lagu-lagu rohani par puji Tuhan tarus. Manyanyi puji Tuhan deng kamong pung hati antero-antero. 20 Minta dangke tarus dari Allah Bapa par apa sa yang jadi dalang katong pung hidop. Minta dangke dari Antua, tagal katong su satu hati deng Tuhan Yesus Kristus yang katong somba.* 21 La tagal kamong samua taru hormat par Kristus, kamong jua musti laeng dengar-dengarang laeng.
Nasehat par orang yang su kaweng
5:22-33
22 Hoe bini-bini e! Kamong musti dengar-dengarang kamong pung laki, sama deng kamong dengar-dengarang Tuhan.* 23 Barang, laki tu kapala par bini, sama deng Kristus tu kapala par jamaat deng yang kasi salamat dong. Jamaat tu Antua pung badang. 24 Jadi, sama deng jamaat dengar-dengarang Kristus, bini-bini jua musti dengar-dengarang dong pung laki dalang sagala hal.
25 Hoe laki-laki yang su kaweng e! Kamong musti sayang kamong pung bini, macang Kristus sayang Antua pung jamaat, mala sampe kasi Antua pung diri par mati par dong.* 26 Antua mati biar Antua kasi pisa dong dari dunya par jadi Antua pung orang-orang, la su kasi barsi dong tagal dong su dengar Antua pung ajarang deng su dapa baptis deng aer. 27 Antua biking bagitu biar dong jadi Antua pung jamaat yang batul-batul barsi. Antua seng mau dong kotor, ada noda, ka ada kurang apapa satu lai yang macang bagitu. Mar yang Antua mau, dong jadi Antua pung jamaat yang seng bardosa deng seng bisa dapa tudu kata dong ada pung sala sadiki lai, macang deng panganting parampuang yang bapake barsi manis-manis tunggu panganting laki-laki datang ambe dia par kaweng.
28 Jadi, sama deng Kristus sayang Antua pung jamaat, laki-laki yang su kaweng jua musti sayang dong pung bini, sama deng dong sayang dong pung diri sandiri. Sapa yang sayang dia pung bini, itu sama sa deng dia sayang dia pung diri sandiri. 29 Barang, seng ada orang yang binci dia pung diri sandiri. Mala dia kalesang deng jaga dia pung diri bae-bae, sama deng apa yang Kristus biking par Antua pung jamaat. 30 Antua biking bagitu, tagal katong samua ni bagiang dari Antua pung badang. 31 Dalang Allah pung Tulisang jua ada bilang kata, “Tagal itu, laki-laki yang su kaweng musti kasi tinggal dia pung mama-papa la jadi satu deng dia pung bini biar dong dua jadi satu.”* 32 Nats soal laki-bini yang jadi satu tu memang seng gampang par orang mangarti akang pung arti antero-antero. Mar, beta mau bilang kalo nats tu bicara soal Kristus deng Antua pung jamaat. 33 Jadi, laki-laki yang su kaweng musti sayang kamong pung bini sama deng kamong sayang kamong pung diri sandiri. Bagitu lai deng bini-bini. Kamong musti dengar-dengarang kamong pung laki.