Paulus pung Surat par Jamaat di
Galatia
Kata-Kata Partama
Sapa yang tulis surat ni: Orang yang tulis surat Galatia ni Paulus. Dia yang partama kali kasi tau Kabar Bae di propinsi Galatia, sampe muncul jamaat-jamaat di situ (Utusang pung Carita 16:6; Galatia 1:8, 4:13). Dia su tiga kali datang ka Galatia. Partama, dia pi sama-sama deng Barnabas (Utusang pung Carita 13:13—14:20). Kadua, dia pi sama-sama deng Silas (Utusang pung Carita 16:1-6). Katiga, dia pi sandiri (Utusang pung Carita 18:23).
Surat ni par sapa: Surat ni par orang-orang parcaya yang tinggal di propinsi Galatia, di negara Turki sakarang. Banya dari orang Galatia tu orang bukang Yahudi. Dong somba dewa-dewa ka apa sa yang bukang Allah. Waktu Paulus kasi tau Kabar Bae di babarapa kota di situ, ada yang parcaya Yesus la jadi jamaat-jamaat partama di Galatia. Mar, abis Paulus pi dari Galatia, ada babarapa orang Yahudi yang su parcaya Yesus datang ka situ la kasi balajar kabar bae yang laeng, yang bukang Kabar Bae dari Allah (1:6-7). Dong ajar kalo parcaya Yesus sa seng cukup, mar musti dapa sunat macang deng Abraham (6:12) deng hidop iko atorang-atorang Torat samua (2:16-17), biar dong jadi batul di muka Allah.
Mangapa Paulus tulis surat ni: Paulus tulis surat ni par tagor dong kalo dong su bale balakang dari Allah tagal su iko kabar bae yang bukang dari Allah (1:6-7). Dia tulis surat ni jua par ajar dong kalo cuma tagal parcaya Yesus Kristus katong bisa jadi batul di muka Allah, bukang tagal dapa sunat ka iko atorang-atorang Torat (2:16). Dia ajar dong kalo tagal parcaya Yesus, katong jadi Abraham pung turunang. Itu pung arti, katong jadi batul di muka Allah macang deng Abraham la ada pung hak par tarima berkat yang Allah su janji par Abraham (3:6-9).
Surat ni tabage par babarapa bagiang:
| 1:1-5 | Tabea |
| 1:6—2:21 | Paulus tagor jamaat Galatia deng bela diri kalo dia tu Yesus pung utusang |
| 3:1—4:31 | Orang bisa jadi batul di muka Allah cuma kalo parcaya Yesus |
| 5:1—6:17 | Orang parcaya musti hidop iko Allah pung Roh pung mau, bukang iko manusia pung mau |
| 6:18 | Paulus tutu dia pung surat |