Galatia 3

Sapa yang parcaya nanti hidop tarus-tarus deng Allah

3:1-14

1 Hoe orang Galatia e! Mangapa kong kamong bodo macang bagitu paskali? Sapa yang su cuci kamong pung otak? Beta su parna kasi tau panjang lebar soal Yesus Kristus yang mati di kayo salib par kamong to? 2 Coba jawab beta. Kamong tarima Allah pung Roh tu tagal iko Hukum Torat ka tagal kamong parcaya Kristus waktu dengar Kabar Bae soal Antua? 3 Bagemana sampe kamong bodo macang bagitu paskali? Dolo waktu partama kali kamong parcaya Kristus, Allah pung Roh biking kamong pung hidop baru. Mar, mangapa kong sakarang kamong pikir kalo kamong bisa hidop batul di muka Allah tagal kamong pung usaha sandiri par biking Hukum Torat tu? 4 Kamong inga kamong pung susa deng sangsara banya tagal parcaya Yesus tu ka seng? Masa kamong mau anggap itu parcuma sa? Beta harap seng bagitu. 5 Beta jua mau tanya lai. Kalo iko kamong, Allah kasi Antua pung Roh deng biking tanda-tanda herang par kamong tu tagal kamong iko Hukum Torat ka tagal kamong parcaya Kabar Bae soal Kristus yang kamong dengar tu?

6 Coba lia Abraham pung hidop. Dalang Allah pung Tulisang ada bilang kata, “Abraham parcaya Allah, tagal itu sampe Antua bilang kalo dia tu orang yang batul di muka Antua.” 7 Jadi dari situ kamong bisa batul-batul tau kalo sapa sa yang parcaya Allah, dong tu Abraham pung turunang yang batul. 8 Allah pung Tulisang su bilang kamuka kalo Allah nanti anggap orang bukang Yahudi jadi orang yang pung hidop batul di muka Antua kalo dong parcaya Antua. Antua bilang Kabar Bae ni partama paskali par Abraham. Antua bilang kata, “Tagal ale, samua bangsa di dunya nanti dapa berkat dari Beta.” 9 Jadi sapa yang parcaya Allah, dong nanti dapa berkat sama-sama deng Abraham yang parcaya tu. 10 Barang, sapa sa yang taru harap par Hukum Torat biar Allah anggap dia pung hidop batul, dia su dapa kutok tagal dia seng bisa biking akang samua-samua. Barang, Allah pung Tulisang jua su bilang kata, “Sapa sa yang seng biking samua-samua yang tatulis dalang Hukum Torat tu, dia su dapa kutok.” 11 Jadi, su jelas kalo seng ada satu orang lai yang bisa jadi batul di muka Allah tagal biking Hukum Torat tu. Barang, Allah pung Tulisang jua su bilang kata, “Orang yang batul di muka Allah tagal dia parcaya Antua, dia nanti hidop tarus-tarus deng Antua.”

12 Mar dasar dari Hukum Torat tu bukang soal parcaya par Tuhan, mar soal apa yang orang biking. Barang, Allah pung Tulisang jua su bilang kata, “Sapa yang iko atorang-atorang deng parenta-parenta tu, dia nanti hidop tagal iko atorang-atorang tu.” 13 Mar, seng ada satu orang lai yang bisa biking Hukum Torat tu samua. Itu tu mangapa kong katong samua nanti dapa kutok dari Allah. Mar Kristus su kasi lapas katong dari kutok tu waktu Antua mati di kayo salib. Barang, Allah pung Tulisang su bilang kata, “Orang yang mati dapa gantong di kayo tu orang yang dapa kutok.” Jadi waktu Antua mati di kayo salib, Antua su dapa kutok ganti katong. 14 Yesus Kristus biking bagitu biar Antua bisa kasi berkat yang Allah su janji par Abraham tu par orang-orang bukang Yahudi lai. La deng bagitu, katong yang parcaya Antua bisa tarima Antua pung Roh lai macang deng apa yang Antua su janji tu.

Hukum Torat ka Allah pung janji

3:15-25

15 Basudara e, coba dengar conto satu dari katong pung hidop hari-hari ni. Akang bagini: Kalo katong biking satu janji la tekeng akang, pasti seng ada orang yang barani langgar ka roba janji tu to? Bagitu lai waktu Allah ika janji deng Abraham. 16 Allah su ika janji deng Abraham deng Abraham pung turunang. Allah pung Tulisang seng bilang kata Abraham pung turunang banya-banya, mar turunang satu sa. Turunang satu tu Kristus.

17 Beta pung maksud tu bagini: Allah ika janji kamuka deng Abraham. 430 taong abis itu baru Antua kasi Hukum Torat. Hukum Torat yang baru muncul dari balakang tu bukang par roba ka hapus Allah pung janji par Abraham yang su ada labe kamuka tu. 18 Barang, Allah kasi apa yang Antua su janji tu par katong bukang tagal katong iko Hukum Torat, mar tagal Antua su janji akang. Bagitu lai deng Abraham. Dari Allah pung hati bae, Antua kasi berkat basar tu par Abraham justru tagal Antua su janji akang.

19 Kalo bagitu, Allah kasi Hukum Torat tu par apa? Antua tamba akang deng maksud par kasi unju manusia pung sagala macang sala yang dong biking. Allah kasi Hukum Torat tu biar dong iko akang tarus sampe Abraham pung turunang Satu yang Allah maksud dalang janji tu datang. Antua utus Antua pung malekat-malekat par kasi Hukum Torat par Musa la Musa kasi akang par orang Yahudi. Jadi, Musa tu jambatang par Allah deng orang Yahudi. 20 Mar waktu Allah ika janji deng Abraham, Antua seng pake orang laeng par jadi jambatang. Antua sandiri yang ika janji tu deng Abraham.

21 Kalo bagitu, itu pung arti apa yang Hukum Torat bilang tu seng baku tamakang deng Allah pung janji-janji? Seng sama sakali! Barang, Allah kasi Hukum Torat deng janji tu deng maksud yang beda. Hukum Torat tu seng bisa biking manusia hidop tarus-tarus. Kalo memang bisa, itu pung arti manusia bisa hidop batul di muka Allah cuma tagal biking Hukum Torat tu sa. 22 Mar, dalang Allah pung Tulisang sandiri jua su bilang kalo samua orang di dunya su taika mati deng dosa-dosa. Jadi, cuma orang-orang yang parcaya Yesus Kristus sa yang bisa tarima apa yang Allah su janji, tagal dong parcaya.

23 Dolo waktu katong balong parcaya Yesus, katong taika deng sagala macang atorang dalang Hukum Torat. Katong macang deng orang yang dapa rante dalang bui. Katong taika sampe waktu Allah kasi tau Yesus Kristus tu sapa la katong parcaya Antua. 24 Jadi, Hukum Torat hentar katong pung hidop sampe waktu Kristus datang sa, biar kalo katong parcaya Antua, Allah bisa anggap katong pung hidop batul. 25 Sakarang katong su parcaya Yesus, jadi katong seng parlu Hukum Torat par hentar katong pung hidop lai.

Allah pung anana

3:26-29

26 Basudara e! Kamong samua tu Allah pung anana tagal kamong parcaya Yesus Kristus. 27 Kamong su dapa baptis la su hidop satu hati deng Kristus. Jadi, kamong pung tabiat hidop su jadi sama deng Kristus pung tabiat hidop. 28 Tagal itu, seng jadi soal lai kalo kamong tu orang Yahudi ka orang bukang Yahudi, jongos ka bos, laki-laki ka parampuang. Samua sama sa tagal kamong samua sama-sama parcaya Yesus Kristus. 29 La kalo kamong tu Kristus pung orang-orang, kamong tu jua Abraham pung turunang lai deng ada pung hak par tarima apa yang Allah su janji.