Yakobis, Petrus, deng Yohanis tarima Paulus
2:1-10
2
1 Sapulu ampa taong abis itu, beta bale kombali ka kota Yerusalem sama-sama deng Barnabas. Beta jua bawa Titus lai.* 2 Beta bale tagal Allah yang kasi tau kalo beta musti bale. Waktu beta ada di sana, beta kasi tau samua-samua soal Kabar Bae yang beta su kasi balajar par orang-orang bukang Yahudi. Beta bicara soal itu kusus deng pamimping-pamimping jamaat. Beta taku jang sampe ada dari dong yang seng mau tarima ajarang yang beta bilang par orang-orang bukang Yahudi tu, la apa yang beta su biking deng yang ada biking sakarang ni parcuma sa. 3 Mar dong seng paksa Titus yang pi sama-sama deng beta tu par dapa sunat,a biar kata dia tu orang Yunani. 4 Mar memang ada babarapa orang yang laeng yang coba paksa dia par dapa sunat. Dong tu maso tado-tado la pura-pura jadi orang parcaya par pangaru orang-orang parcaya yang bukang Yahudi par iko orang Yahudi pung atorang-atorang agama tu. Dong biking bagitu biar katong jadi jongos tagal iko atorang-atorang tu, biar kata Yesus Kristus su kasi bebas katong tagal katong su satu hati deng Antua. 5 Mar katong seng iko dong pung mau sadiki lai. Barang, katong mau biar ajarang yang batul dalang Kabar Bae yang kamong su parcaya tu, akang seng baku tacampor deng dong pung ajarang yang seng batul.6 La dong yang jamaat di Yerusalem anggap par pamimping-pamimping basar tu seng tamba sadiki lai dari beta pung ajarang. Soal dong tu orang basar ka seng ka, itu seng panting par beta, barang Allah seng lia-lia muka.* 7 Mala dong parcaya kalo Allah su pili beta par pi kasi tau Kabar Bae par orang-orang bukang Yahudi, macang deng Antua su pili Petrus par pi kasi tau Kabar Bae par orang-orang Yahudi.b 8 Barang, sama deng Allah su karja dalang Petrus pung diri par jadi Antua pung utusang par orang-orang Yahudi, Antua jua su karja dalang beta pung diri par jadi Antua pung utusang par orang-orang bukang Yahudi.
9 Jadi waktu Yakobis, Petrus, deng Yohanis yang jamaat anggap par pamimping-pamimping basar tu sadar kalo Allah su parcaya beta par biking tugas panting ni, dong pegang tangang deng beta deng Barnabas par jadi tanda kalo katong samua satu hati. Katong samua akor kalo beta deng Barnabas pi kasi balajar Kabar Bae par orang-orang bukang Yahudi, la dong par orang-orang Yahudi. 10 Dong tiga cuma minta dari katong par paduli tarus deng orang-orang kasiang. Memang dari dolo, itu tu jua yang beta sanang paskali par biking akang.
Paulus tagor Petrus
2:11-14
11 Waktu Petrus datang ka kota Antiokia, beta tagor dia di muka-muka tagal apa yang dia biking tu batul-batul sala. 12 Dia pung sala tu bagini: Waktu satu dua orang yang dapa suru dari Yakobis balong sampe di kota tu, dia masi dudu makang satu meja deng orang-orang parcaya bukang Yahudi. Mar waktu dong sampe, dia seng mau dekat-dekat deng orang-orang parcaya bukang Yahudi tu lai. Dia biking bagitu tagal dia taku orang Yahudi yang parcaya yang baru sampe tu. 13 Orang-orang Yahudi laeng yang parcaya Yesus jua iko munafik macang Petrus lai. Mala Barnabas sandiri jua iko-iko munafik macang deng dong tu. 14 Waktu beta lia dong pung kalakuang tu seng sama deng ajarang yang batul dalang Allah pung Kabar Bae, beta langsung tagor Petrus di muka dong samua tu kata, “Bu e! Ale ni orang Yahudi, mar Tuhan su buka jalang sampe ale seng taika deng orang Yahudi pung atorang-atorang to? Jadi, mangapa kong ale mau paksa orang-orang bukang Yahudi par biking orang-orang Yahudi pung atorang-atorang tu lai?”
Sapa yang parcaya Yesus Kristus, Allah anggap dong pung hidop batul
2:15-21
15 Basudara e, memang dari lahir lai beta deng Petrus dong tu orang Yahudi. Katong seng sama deng orang bukang Yahudi yang katong biasa panggel par orang bardosa, tagal dong seng iko Hukum Torat. 16 Mar biar kata bagitu, katong tau kalo Allah anggap satu orang pung hidop batul tu bukang tagal dia iko Hukum Torat, mar tagal dia parcaya Yesus Kristus. Tagal itu, katong sandiri parcaya Yesus Kristus biar Allah bisa anggap katong pung hidop batul. Itu jadi bukang tagal katong iko Hukum Torat, mar tagal parcaya Kristus. Barang, seng ada satu orang lai yang pung hidop batul di muka Allah tagal iko Hukum Torat.*
17 Mar, ada orang Yahudi saparu yang su parcaya mar balong mangarti kalo Allah anggap katong pung hidop batul cuma kalo katong satu hati deng Yesus. Par dong, kalo katong seng iko Hukum Torat, itu sama sa deng katong su jadi orang bardosa. Kalo macang bagitu, itu pung arti katong ni orang bardosa tagal parcaya Kristus? Seng sama sakali! 18 Barang, kalo beta bale iko orang Yahudi pung atorang-atorang yang beta su kasi tinggal tu, itu pung arti beta ni batul-batul bardosa. 19 Dolo beta hidop iko Hukum Torat. Mar, justru Hukum Torat tu yang biking beta sala sampe pantas par dapa hukum mati. Jadi beta bale balakang kasi tinggal akang. Beta seng taika lai deng atorang-atorang tu, macang deng orang mati yang seng taika deng atorang-atorang satu lai. Samua tu jadi biar beta bisa hidop iko Allah pung mau. Beta macang kata su mati sama-sama deng Kristus waktu Antua mati di kayo salib. 20 La sakarang, beta su hidop mar beta pung hidop seng sama dolo lai tagal Kristus su hidop dalang beta pung hati. La beta pung hidop yang sakarang ni, itu tagal beta parcaya par Allah pung Ana yang sayang beta deng yang su kasi Antua pung diri par mati di kayo salib par beta tu. 21 Beta seng anggap enteng Allah pung berkat basar tu. Barang, kalo orang bisa pung hidop batul di muka Allah tagal iko orang Yahudi pung atorang-atorang, parcuma sa Kristus mati di kayo salib!