Paulus pung Surat Kadua par Jamaat di
Korintus
Kata-Kata Partama
Sapa yang tulis surat ni: Orang yang tulis surat 2 Korintus ni Paulus (Lia jua Kata-kata Partama surat 1 Korintus). Abis kiring surat 1 Korintus, Paulus rencana singga di kota Korintus lai (1:15-16), mar seng jadi (1:23, 2:1). Tarus, waktu dia dengar barita soal jamaat Korintus dari dia pung tamang karja Titus (7:5-7), dia tulis surat ni par dong.
Surat ni par sapa: Surat ni par jamaat di kota Korintus (Lia Kata-kata Partama surat 1 Korintus). Abis jamaat Korintus tarima surat 1 Korintus, dong pung hati susa, la tagal itu ada yang kasi tinggal dong pung dosa (7:8-11). Mar ada jua yang seng tarima Paulus tagor dong, la tetap biking dosa tarus (12:21). Dalang jamaat Korintus, ada jua guru-guru yang maso la kasi balajar ajarang yang sala (11:3-4). Dong malawang Paulus la bilang kalo Paulus tu bukang Yesus pung utusang.
Mangapa Paulus tulis surat ni: Paulus sadar kalo dia su biking jamaat Korintus pung hati susa tagal su tagor dong deng karas (7:8). Jadi, dalang surat 2 Korintus ni dia minta jamaat Korintus tarima dia kombali (6:11-13, 7:2). Paulus bilang kalo dia sayang dong paskali (7:2-4), deng su biking rencana par datang lia dong lai. Tarus, dia kasi jelas kalo dia biking Allah pung karja deng seng biking akang deng cara-cara kotor (2:17, 4:2). Paulus jua bela dia pung diri deng tantang guru-guru parlente yang malawang dia (11:4-5).
Paulus jua kasi samangat jamaat Korintus. Dia bilang samua yang su satu hati deng Kristus, Allah su biking dong jadi manusia yang baru (5:17). Tarus, Tuhan roba dong pung hidop biar labe hari labe tamba sama deng Antua (3:18). Dia jua bilang, orang parcaya nanti dapa hidop yang luar biasa di sorga, yang batahang tarus-tarus (4:17).
Paulus jua tulis surat ni par kasi inga jamaat Korintus kombali soal dong pung rencana par kumpul kepeng par bantu Tuhan pung orang-orang di kota Yerusalem (8:1—9:15). Dia minta biar dong kasi akang deng hati sanang, macang deng Allah yang kasi sagala macang berkat batambong-tambong (9:6-8).
Surat ni tabage par babarapa bagiang:
| 1:1-11 | Tabea deng Paulus minta dangke dari Allah |
| 1:12—2:11 | Paulus kasi jelas mangapa dia balong datang ka jamaat Korintus |
| 2:12—6:13 | Paulus kasi jelas dia pung karja par Allah |
| 6:14—7:1 | Jang tarika deng orang-orang yang seng parcaya |
| 7:2—7:16 | Paulus minta biar jamaat Korintus tarima dia kombali |
| 8:1—9:15 | Soal kepeng par bantu Tuhan pung orang-orang di kota Yerusalem |
| 10:1—13:10 | Paulus bela diri deng malawang guru-guru parlente yang hojat dia |
| 13:11-13 | Paulus tutu dia pung surat |