Tuhan pung orang karja pung kalakuang musti bae
4:1-6
4
1 Basudara e! Tagal Allah pung hati bae, Antua parcaya katong par biking Antua pung karja ni. Tagal itu, katong pung samangat seng pata. 2 Katong seng mau paskali par tado-tado pake cara-cara kotor par kasi tau Kabar Bae, cara-cara yang cuma biking katong malu. Katong seng parlente deng seng putar bale Allah pung kata-kata, mar kasi tau apa yang batul tarang-tarang. La deng bagitu, di muka Allah, orang laeng bisa nilai sandiri kata apa yang katong bilang tu batul ka seng. 3 Mangkali masi ada orang yang pung pikirang tatutu sampe dong seng bisa mangarti Kabar Bae yang katong kasi tau tu. Mar, itu cuma jadi par orang-orang yang nanti binasa, 4 yang seng parcaya apa yang katong kasi tau. Barang, Setang pung Raja yang pegang parenta sakarang ni su kasi buta dong pung hati sampe dong seng bisa lia tarang dari Kabar Bae soal Kristus pung kuasa yang hebat. Kalo katong lia Kristus, itu sama sa deng katong su lia Allah deng tau Antua pung tabiat deng kuasa. 5 Katong seng kasi tau soal katong pung diri sandiri, mar soal Yesus Kristus, kalo Antua tu Tuhan yang pegang parenta par samua-samua yang ada. Katong jua kasi tau kalo katong ni kamong pung jongos, sama deng Yesus pung mau. 6 Allah su bilang kata, “Biar tarang manyala dari dalang galap”.* Antua tu Allah yang sama yang kasi tarang katong pung hati deng pikirang. Antua biking bagitu biar katong pung pikirang jadi tarang, sampe katong bisa mangarti Antua pung kuasa paleng basar dalang Yesus Kristus pung diri.Kabar Bae tu macang deng harta yang tasimpang dalang tampayang tana
4:7-15
7 Biar kata katong cuma manusia biasa, mar katong tarima Kabar Bae ni dari Allah. Katong macang deng tampayang tana biasa yang dapa pake par simpang harta yang mahal. Dari situ samua orang bisa tau batul-batul kalo kuasa yang luar biasa yang karja dalang katong tu datang dari Allah, bukang dari katong pung diri sandiri. 8 Katong dapa tindis di mana-mana, mar Tuhan seng parna lapas tangang dari katong. Katong susa sampe seng tau mau biking apa lai, mar katong pung samangat seng pata. 9 Katong dapa siksa, mar Tuhan seng kasi tinggal katong sandiri. Katong dapa labrak sampe jatu, mar katong seng ancor. 10 Katong salalu dapa siksa deng mau dapa bunu, sama deng apa yang Yesus rasa waktu Antua mau mati. Deng bagitu, orang-orang bisa lia Yesus pung hidop dalang katong pung diri. 11 Memang katong masi hidop, mar katong salalu hidop dalang bahaya par dapa bunu tagal karja par Yesus. Ini jadi biar orang-orang bisa lia Yesus pung hidop dalang katong pung badang yang nanti binasa ni. 12 Jadi katong hidop dalang bahaya par dapa bunu, mar akang jadi biar kamong bisa hidop tarus-tarus deng Allah.
13 Dalang Allah pung Tulisang ada orang yang bilang, “Beta parcaya, jadi beta bicara.”* Bagitu lai deng katong. Tagal katong parcaya, jadi katong barani bicara soal Kabar Bae. 14 Barang, katong tau kalo Antua yang su kasi hidop Tuhan Yesus kombali tu nanti kasi hidop katong kombali biar katong bisa hidop sama-sama deng Yesus. La Antua nanti bawa katong deng kamong par badiri di muka Antua. 15 Samua yang jadi deng katong tu, akang jadi par kamong pung bae. La deng bagitu, Antua bisa kasi unju Antua pung hati bae par labe banya orang lai. La dong nanti minta dangke dari Allah seng abis-abis deng puji-puji Antua.
Allah nanti kasi badang yang baru par katong
4:16—5:10
16 Tagal itu basudara e, katong pung samangat seng pata. Biar kata katong pung badang labe hari labe tamba seng kuat deng saki, mar katong pung hati labe hari labe tamba kuat. 17 Katong pung susa deng sangsara yang sakarang ni, akang macang deng tai kuku deng batahang cuma sadiki tempo sa. Mar akang bawa hidop yang luar biasa di sorga yang batahang tarus-tarus, labe dari sagala macang susa deng sangsara ni. 18 Beta bilang bagitu tagal katong seng taru kira par apa yang katong bisa lia, mar par apa yang katong seng bisa lia. Barang, apa yang katong bisa lia tu cuma batahang sadiki tempo sa, mar apa yang katong seng bisa lia tu batahang tarus-tarus.