5
1 Beta bilang bagitu tagal katong tau kalo katong pung badang ni sama deng tenda di dunya. Katong tinggal di tenda ni sadiki tempo sa. Satu waktu, katong pung tenda ni nanti dapa bongkar. Itu sama deng nanti katong mati. Mar Allah su kasi siap ruma baru satu par katong di sorga. Bukang manusia yang biking akang, mar Antua sandiri. Itu tu katong pung badang yang baru yang katong nanti pake tarus-tarus. 2 Mar sakarang, waktu katong tinggal di katong pung tenda ni, katong tinggal kong helahai tarus, tagal katong rindu paskali par kasi tinggal tenda ni la tinggal di katong pung ruma baru di sorga tu. 3 Kalo katong pung tenda ni dapa bongkar, katong nanti tinggal di ruma baru di sorga. Itu sama deng katong kasi lapas katong pung pakiang lama la pake pakiang baru, biar katong seng talanjang.a 4 Waktu katong masi tinggal di katong pung tenda ni, katong tinggal kong helahai tarus tagal katong rasa barát. Katong helahai tarus, bukang tagal katong inging par mati biar katong bisa kasi tinggal katong pung tenda ni, mar tagal katong inging paskali par tinggal di katong pung ruma baru di sorga. Katong mau biar katong pung tenda yang nanti dapa bongkar ni dapa ganti deng ruma baru yang seng bisa dapa bongkar. 5 Allah sandiri yang kasi siap katong par tinggal di ruma baru tu. Antua tu jua yang kasi Antua pung Roh par katong par jadi tanda kalo katong pasti dapa samua yang Antua su janji tu.6 Tagal itu, katong tahang hati tarus. Katong tau kata kalo katong tinggal di dunya ni, katong masi balong tinggal sama-sama deng Tuhan di sorga. 7 Katong hidop tagal katong parcaya kalo Allah nanti biking samua yang Antua janji, bukang tagal apa yang katong bisa lia. 8 Tagal itu, katong tahang hati tarus. Katong labe suka kasi tinggal katong pung badang ni la hidop sama-sama deng Tuhan di sorga. 9 Jadi, biar kata katong tinggal di dunya ni ka tinggal deng Antua di sorga, katong mau usaha sunggu-sunggu par salalu kasi sanang Antua pung hati. 10 Beta bilang bagitu tagal satu waktu nanti katong samua pasti badiri di muka Kristus waktu Antua putus samua orang di dunya ni pung parkara. Antua nanti balas satu-satu iko apa yang dia biking di dunya ni, bae ka seng bae.
Allah biking katong baku bae kombali deng Antua
5:11-21
11 Basudara e! Katong taku par biking apapa yang Tuhan seng suka, tagal katong su tau kalo Antua nanti jadi hakim par apa yang katong biking. Jadi, katong usaha sunggu-sunggu par biking orang laeng parcaya Allah. Antua tau katong pung hati luar-dalang. La beta harap, kamong jua tau katong pung hati luar-dalang lai. 12 Katong bilang bagitu bukang tagal katong mau kamong puji-puji katong kombali, mar tagal katong mau kamong ada pung alasang yang kuat biar kamong bisa jawab orang-orang yang kasi sala katong. Dong tu sombong deng apa yang dong biking yang orang bisa lia, mar seng pastiu deng apa yang ada dalang dong pung hati. 13 Kalo ada orang yang anggap katong yang kasi tau Allah pung Kabar Bae ni gila, seng apapa. Itu tagal katong iko Allah pung mau. Mar, kalo kamong anggap katong ni seng gila, itu bagus tagal katong mau tolong kamong biar kamong pung parcaya tamba kuat. 14 Kristus pung sayang yang biking sampe katong bisa biking samua tu. Barang, katong su tau kalo Antua su mati par tabus samua orang pung dosa. Jadi, samua orang musti kasi tinggal dong pung tabiat hidop yang lama. Kalo samua orang kasi tinggal dong pung tabiat hidop yang lama, itu sama sa deng dong su mati. 15 La Kristus mati par samua orang biar katong yang masi hidop ni seng hidop par diri sandiri lai. Mar, katong hidop par biking sanang Kristus yang su mati deng hidop kombali par katong.
16 Jadi mulai dari oras ni, katong seng mau lai nilai orang laeng deng manusia pung ukurang. Memang, dolo katong parna nilai Kristus deng cara macang bagitu, mar sakarang seng lai. 17 Jadi sapa yang su satu hati deng Kristus, Allah su biking dia jadi manusia yang baru. Dia su seng hidop macang dolo lai, tagal dia su kasi tinggal dia pung tabiat hidop yang lama. Sakarang ni, dia pung hidop su jadi baru. 18 Allah sandiri yang biking samua tu. Antua yang biking sampe katong bisa baku bae kombali deng Antua, tagal apa yang Kristus su biking tu. La Allah jua utus katong par kasi tau orang-orang kalo dong jua bisa baku bae deng Antua. 19 Katong kasi tau dong kata, tagal Kristus su mati par tabus manusia pung dosa-dosa sampe Allah biking manusia baku bae kombali deng Antua pung diri sandiri. Antua seng inga-inga dosa-dosa yang manusia biking lai. La Antua su utus katong ni par kasi tau akang par samua orang.
20 Katong ni Kristus pung utusang-utusang. Jadi, Allah pake katong pung mulu par bawa Antua pung pasáng par kamong. Tagal itu, sama deng Kristus sandiri yang minta dari kamong, katong minta deng sunggu-sunggu dari kamong: Baku bae deng Allah jua! 21 Kristus tu seng ada pung dosa. Mar, Allah biking Antua tanggong katong pung dosa-dosa. La tagal katong su satu hati deng Kristus, Allah anggap katong macang deng orang yang pung hidop batul.