Paulus tetap kasi tau Kabar Bae biar kata dapa siksa
6:1-13
6
1 Basudara e! Tagal katong ni Allah pung tamang karja, katong minta deng sunggu-sunggu biar kamong jang kasi biar berkat basar yang Allah su kasi par kamong tu jadi parcuma. 2 Barang Allah su bilang kata,“Pas waktu yang Beta mau,
Beta dengar ale pung sombayang.
Pas hari Beta kasi salamat ale,
Beta tolong ale.”*
Pasang talingang! Sakarang ni akang pung waktu suda. Hari ini ni Tuhan kasi salamat manusia.
3 Tagal itu katong salalu ati-ati, biar jang sampe katong biking apa sa yang bisa pele-pele orang par parcaya. Barang, katong seng mau orang dapa apapa yang sala la hina-hina katong pung karja. 4 Mala dalang hal apa sa, katong salalu usaha par kasi unju kalo katong ni batul-batul Allah pung orang-orang karja. Katong salalu usaha par kasi unju akang waktu katong tahang hati dalang susa deng sangsara ka masala, 5 waktu dapa pukul, waktu dapa kasi maso dalang bui, ka waktu dapa hantam dari orang banya. Katong karja banting tulang, banya kali jua seng dapa tidor, deng seng ada pung makanang. 6 Mar biar kata bagitu, katong kasi unju kalo katong ni Allah pung orang-orang karja yang karja deng hati barsi, pikirang tajang, sabar, deng hati bae. Katong batul-batul sayang orang laeng deng taru harap par Allah pung Roh par tolong katong. 7 Katong kasi unju kalo katong ni Allah pung orang-orang karja waktu katong kasi tau Allah pung kata-kata deng batul, deng taru harap par Allah pung kuasa par tolong katong. Katong biking apa yang batul. Deng bagitu, katong bisa malawang katong pung musu deng tangkis orang-orang yang serang katong. 8 Katong kasi unju kalo katong ni batul-batul Allah pung orang-orang karja, biar kata ada yang taru hormat par katong ka hina katong, puji-puji ka kasi busu katong pung nama. Ada yang anggap katong ni tukang parlente, biar kata apa yang katong bilang tu batul. 9 Banya orang yang kanal katong biar kata ada yang anggap katong macang deng orang yang dong seng kanal. Banya kali katong amper mati, mar lia, katong masi tetap hidop. Katong dapa hukum, mar seng mati. 10 Katong pung hati sanang tarus, biar kata katong sangsara banya. Katong ni orang kasiang, mar katong biking orang banya dapa berkat dari Tuhan. Katong seng pung apapa, biar kata katong pung samua-samua.
11 Hoe orang-orang Korintus e! Katong su buka katong pung hati par kamong, seng ada yang katong sambunyi.a Barang, katong paleng sayang kamong. 12 Katong su kasi unju kalo katong paleng sayang kamong. Mar kamong su seng kasi unju lai kalo kamong sayang katong. 13 Tagal itu biar sama, beta minta dari kamong, sama deng beta minta dari beta pung anana sandiri: Sayang katong jua macang deng katong sayang kamong.
Jang tarika deng orang-orang yang seng parcaya
6:14—7:1
14 Jang tarika deng orang-orang yang seng parcaya, tagal kamong seng sama deng dong. Coba pikir! Orang yang pung hidop batul deng orang yang malawang Tuhan pung parenta, dong seng bisa jadi satu to? Ka, tarang seng bisa jadi satu deng galap to? 15 Masa Kristus deng Setang pung Rajab pung tabiat sama? Ka, masa orang-orang yang parcaya deng orang-orang yang seng parcaya pung tabiat sama? 16 Masa orang bisa somba patong-patong dalang Allah pung Ruma? Seng bisa to? Beta bilang samua tu tagal katong ni Allah yang hidop tu pung ruma, sama deng apa yang Allah bilang kata,
“Beta nanti tinggal deng dong
deng nanti hidop sama-sama deng dong.
Beta nanti jadi dong pung Allah
la dong nanti jadi Beta pung orang-orang.”*
17 Tagal itu Tuhan bilang,
“Kasi tinggal orang-orang yang biking kajahatang tu
deng jang paskali dekat-dekat deng dong.
Jang paskali biking dosa biar kamong seng kotor,
la Beta nanti tarima kamong.”*
18 “Beta nanti jadi kamong pung Bapa,
la kamong nanti jadi Beta pung anana laki-laki deng parampuang.”*
Itu yang Tuhan bilang, Tuhan yang pung Kuasa Paleng Basar tu.