7
1 Tagal katong su tarima Antua pung janji-janji tu basudara jantong hati e, mari katong kasi tinggal katong pung sagala macang dosa yang kasi kotor katong pung hati deng badang. Kalo katong biking bagitu, itu sama sa deng katong taku deng taru hormat par Allah deng kasi katong pung diri antero-antero cuma par Antua.Paulus dong pung hati sanang
7:2-16
2 Buka kamong pung hati par katong! Katong seng parna biking sala par satu orang lai. Katong seng biking rugi satu orang lai deng seng pake orang laeng jadi alat. 3 Beta bilang bagitu bukang par kasi sala kamong, tagal beta su bilang tadi kalo katong paleng sayang kamong. Katong seng mau tapisa dari kamong, biar kata katong hidop ka mati. 4 Beta bicara tarang-tarang paskali par kamong. Mala beta pung hati paleng sanang tagal kamong. Biar kata katong dapa sagala macang susa deng sangsara, beta pung hati paleng sanang tagal kamong. Kamong yang biking beta pung hati kuat.
5 Beta bilang bagitu tagal waktu katong sampe di propinsi Makedonia ni, katong seng bisa ambe sanang sadiki lai. Katong dapa sagala macang susa deng sangsara. Dari luar, orang-orang baku malawang deng katong. Dari dalang, katong pikirang deng kamong. 6 Mar, Allah yang salalu kasi kuat orang-orang yang pung hati seng kuat tu, Antua kiring Titus par datang lia katong biar katong pung hati kuat kombali. 7 Katong pung hati kuat bukang cuma waktu dia datang sa, mar jua waktu dia carita kalo kamong kasi kuat dia pung hati. Dia carita kalo kamong rindu baku dapa beta deng kalo kamong manyasal deng apa yang kamong parna biking. Dia jua carita kalo kamong samangat par bela beta. Samua tu biking beta pung hati labe tamba sanang.
8 Jadi, biar kata beta su biking kamong pung hati susa deng beta pung surat waktu itu, beta seng manyasal. Beta memang parna manyasal, tagal beta tau kalo beta pung surat tu biking kamong pung hati susa, biar kata sadiki tempo sa. 9 Mar sakarang beta pung hati sanang. Beta pung hati sanang bukang tagal kamong pung hati susa, mar tagal lewat hati susa tu kamong kasi tinggal kamong pung dosa-dosa. Barang, Allah sandiri yang su ator akang iko Antua pung mau. Jadi, katong seng biking rugi kamong sadiki lai. 10 Barang kalo kamong pung hati susa tu tagal itu Allah pung mau, akang biking kamong kasi tinggal kamong pung dosa-dosa la salamat. Kamong seng rasa manyasal deng akang. Mar, kalo kamong pung hati susa macang deng orang-orang yang seng parcaya biasa rasa susa, akang biking kamong seng kasi tinggal kamong pung dosa-dosa la tapisa tarus-tarus dari Allah.
11 Coba inga waktu kamong baca beta pung surat tu. Waktu itu, kamong pung hati jua susa tagal Allah pung mau, mar itu bawa hasil yang bae par kamong. Beta pung maksud, kamong usaha sunggu-sunggu par biking apa yang batul, mala kasi barsi kamong pung nama, binci dosa tu, deng taku par biking dosa kombali. Itu jua yang biking kamong rindu par lia beta, samangat par biking beta pung pasáng, deng barani par hukum orang yang sala. Jadi, samua yang kamong biking tu jadi bukti kalo kamong tu seng sala dalang hal itu.
12 Jadi, biar kata beta tulis surat tu, beta seng tulis akang par bantu orang yang sala ka bantu orang yang sangsara tagal orang laeng pung sala. Mar, beta tulis akang biar kamong sandiri tau kalo kamong batul-batul sayang katong la Allah sandiri jadi saksi kalo itu memang batul. 13 Tagal samua tu sampe katong pung hati sanang. Mar labe-labe lai, katong pung hati paleng sanang waktu lia Titus sanang. Dia sanang tagal kamong kasi kuat dia pung hati. 14 Beta parna puji-puji kamong par dia. La waktu dia pi ka situ, beta seng malu tagal dia lia sandiri kalo samua yang beta bilang tu batul. Sama deng katong salalu bilang apa yang batul par kamong, bagitu lai deng apa yang katong bilang par Titus soal kamong tu jua memang batul. 15 Sakarang, dia labe tamba sayang kamong waktu dia inga kalo kamong samua dengar-dengarang dia deng tarima dia deng hormat. 16 Beta sanang, tagal beta bisa parcaya kamong dalang hal apa sa.