Bantu Tuhan pung orang-orang yang kurang di kota Yerusalem
8:1-15
8
1 Basudara e! Katong mau kasi tau soal Allah pung hati bae par jamaat-jamaat di propinsi Makedonia. 2 Biar kata dong paleng susa deng sangsara baru paleng kasiang paskali, mar Allah karja dalang dong pung hati sampe dong pung hati tetap sanang deng seng tanggong-tanggong bantu jamaat-jamaat laeng yang susa. 3 Beta barani bilang kalo dong tu kasi apa yang dong bisa kasi iko dong pung kuat, mala labe dari apa yang dong bisa kasi lai. Seng ada yang paksa dong par biking bagitu. 4 Dong tinggal kong minta deng sunggu-sunggu dari katong biar dong jua bisa ambe bagiang par bantu Tuhan pung orang-orang di kota Yerusalem. 5 Dong kasi labe banya dari apa yang katong sangka, tagal dong bukang cuma kasi kepeng sa. Partama, dong kasi dong pung diri par Tuhan, baru abis itu dong kasi dong pung diri par katong, iko Allah pung mau. 6 Tagal itu, katong tinggal kong minta deng sunggu-sunggu dari Titus par pi lia kamong la kasi klar tugas par kumpul kepeng tu, tagal dia yang mulai biking akang kamuka.7 Basudara e! Kalo soal iko Yesus sa, seng ada yang kurang dari kamong. Conto sa, kamong pung parcaya paleng kuat, kamong tau ajarang yang batul, deng paleng pintar kasi balajar orang laeng. Kamong jua paleng samangat biking apa yang bae deng paleng sayang katong. Jadi sakarang, beta minta biar kamong jua jang putus-putus kasi unju kamong pung hati bae par bantu Tuhan pung orang-orang yang susa di Yerusalem. 8 Beta bilang bagitu bukang par parenta kamong. Beta carita soal jamaat-jamaat di Makedonia yang samangat bantu Tuhan pung orang-orang tu par kamong, biar kamong jua samangat par bantu orang laeng. Kalo kamong biking bagitu, beta bisa lia kalo kamong jua memang batul-batul sayang orang laeng lai. 9 Beta minta kamong biking bagitu, tagal kamong su tau Tuhan Yesus Kristus yang katong somba tu pung hati bae par kamong. Antua tu kaya, mar Antua jadi orang kasiang par tolong kamong. Tagal Antua jadi orang kasiang, Antua bisa biking kamong jadi kaya di muka Allah.
10 Jadi, ini ni beta pung nasehat soal masala tu par kamong biar kamong tau apa yang bae yang kamong parlu biking. Barang, taong lalu kamong tu yang partama kali pikir par kumpul kepeng par bantu Tuhan pung orang-orang di Yerusalem, la su mulai usaha par biking akang. 11 Jadi sakarang, kasi klar akang jua, biar kamong pung samangat tu akang bajalang sama-sama deng kamong pung usaha par kasi klar akang! Mar, kasi iko kamong pung kuat. 12 Kalo orang batul-batul samangat par kasi kepeng tu, Tuhan nanti tarima apa yang dia kasi iko dia pung kuat tu. Antua seng minta apa yang seng ada di dia.
13 Beta minta kamong par bantu orang laeng bukang biar orang laeng sanang la kamong sandiri susa, mar biar ada baláns. 14 Jadi, tagal sakarang ni kamong ada pung labe, seng sala to kalo kamong bantu dong yang kurang. Biar nanti kalo dong ada pung labe, dong jua bisa bantu kamong kalo kamong ada kurang. Deng bagitu ada baláns to? 15 Apa yang beta bilang ni sama deng apa yang tatulis dalang Allah pung Tulisang,
“Orang yang dapa banya, dong seng labe.
La orang yang dapa sadiki jua, dong seng kurang.”*
Titus deng dua orang laeng dapa utus ka kota Korintus
8:16-24
16 Basudara e! Beta minta dangke banya par Allah yang kasi samangat par Titus yang sama deng beta pung samangat par tolong kamong. 17 Barang, waktu katong minta dia par pi bantu kamong, dia mau. Mar labe-labe lai, dia sanang paskali par pi ka situ. Seng ada yang paksa dia par pi ka situ, itu dia pung mau sandiri. 18 Katong jua utus katong pung sudara satu lai par pi sama-sama deng dia. Samua jamaat di sini taru hormat par dia tagal dia karja banting tulang par kasi tau Kabar Bae par orang-orang. 19 Mar bukang cuma itu sa. Dia jua su dapa pili dari jamaat-jamaat di sini par pi batamang katong par bawa kepeng yang su takumpul par Tuhan pung orang-orang di Yerusalem. Katong harap, deng apa yang katong biking tu, Tuhan dapa puji la orang bisa lia kalo katong memang sunggu-sunggu mau bantu orang laeng. 20 Katong pake cara bagitu tagal ati-ati paskali biar jang sampe ada orang tudu kalo katong seng ator kepeng banya yang takumpul ni bae-bae. 21 Barang, katong mau biking apa yang batul bukang cuma di muka Tuhan sa, mar di muka manusia lai.
22 Katong jua utus katong pung sudara satu lai par pi sama-sama deng dong dua tu. Katong su uji dia banya kali deng bisa lia kalo dia samangat par karja par Tuhan. La sakarang ni, tagal dia parcaya kalo kamong mau kasi kepeng par bantu Tuhan pung orang-orang tu, dia labe samangat lai par pi sama-sama deng dong dua. 23 Kalo Titus, dia tu beta pung tamang yang karja sama-sama deng beta par kamong pung bae. La katong pung sudara dua yang laeng tu jamaat-jamaat pung utusang. Lewat apa yang dong biking, Kristus dapa puji. 24 Tagal itu, beta minta biar kamong kasi unju par dong kalo kamong batul-batul sayang Tuhan pung orang-orang. Deng bagitu, jamaat-jamaat bisa tau kalo memang seng sala katong puji-puji kamong.