Kumpul kepeng par bantu Tuhan pung orang-orang
9:1-5
9
1 Basudara e! Soal kepeng-kepeng par bantu Tuhan pung orang-orang di kota Yerusalem tu, beta kira beta seng parlu singgung akang dalang surat ni lai. 2 Barang, beta su tau kamong orang-orang propinsi Akaya pung samangat par bantu dong. Ini yang biking beta angka-angka kamong par orang-orang di propinsi Makedonia. Beta bilang kata dari taong lalu lai kamong su siap par bantu Tuhan pung orang-orang di Yerusalem. Kamong pung samangat tu biking banya orang Makedonia jua samangat lai. 3 Mar, beta utus basudara tiga tu par bantu kamong par kumpul kepeng tu, biar kamong siap sama deng apa yang beta bilang par orang-orang. Beta seng mau orang bilang kata katong pung carita pukul tinggi soal kamong tu cuma omong kosong sa. 4 Barang, kalo orang-orang Makedonia datang sama-sama deng beta ka situ la baku dapa kamong balong siap, katong nanti malu tagal katong su bilang kalo kamong siap par bantu. Beta kira kamong jua pasti malu lai to? 5 Tagal itu, beta pikir par utus basudara tiga tu par barangkat kamuka katong. Beta biking bagitu biar dong bisa bantu kamong par kumpul kepeng-kepeng yang kamong su janji kamuka tu, biar kepeng-kepeng yang kamong mau kasi tu su siap sakali waktu katong sampe. Kalo dong lia bagitu, dong tau kalo kamong kasi akang dari hati, bukang tagal dapa paksa.Kasi par orang laeng deng hati sanang
9:6-15
6 Inga ini bae-bae! Orang yang tanang sadiki, dia nanti dapa akang pung hasil sadiki lai. Mar, orang yang tanang banya, dia nanti dapa akang pung hasil banya lai. 7 Sapa yang mau bantu, jang bantu deng hati barát ka tagal dapa paksa, mar kasi dari hati, tagal Allah sayang orang yang kasi deng hati sanang. 8 Allah pung kuasa par kasi sagala macang berkat batambong-tambong par kamong, biar kamong seng kurang apapa satu yang kamong parlu lai. Antua biking bagitu biar apa tempo sa, kamong bisa biking sagala macang hal yang bae par bantu orang laeng deng samua yang kamong pung. 9 Ini sama deng apa yang Allah pung Tulisang bilang,
“Orang yang iko Tuhan, dia kasi apapa par orang-orang kasiang seng tanggong-tanggong.
Samua yang batul yang dia biking tu, Tuhan seng lupa-lupa akang.”a
10 Jadi, sama deng Allah kasi biji tanamang par orang yang bakabong deng makanang par orang makang, Antua jua nanti kasi apa yang kamong parlu. Antua jua biking akang labe hari labe tamba banya biar kamong bisa pake akang deng batul par tolong labe banya orang yang parlu.* 11 Antua biking bagitu biar kamong jadi kaya dalang sagala macang hal dalang hidop, biar kamong bisa salalu kasi akang batambong-tambong par orang laeng lai. La waktu katong bawa kepeng-kepeng yang kamong kumpul tu, orang banya nanti minta dangke dari Allah. 12 Barang, apa yang kamong mau kasi tu bukang cuma par tolong Tuhan pung orang-orang pung kurang sa, mar par biking labe banya orang minta dangke banya-banya dari Allah. 13 Tagal apa yang kamong biking tu, dong nanti puji-puji Allah tagal dong lia kalo kamong dengar-dengarang Kabar Bae soal Kristus yang kamong su parcaya tu. Dong jua nanti puji-puji Allah tagal kamong seng tanggong-tanggong tolong dong deng samua orang parcaya. 14 La dong jua sombayang par kamong tagal dong sayang kamong, tagal Allah pung hati bae yang luar biasa tu karja dalang kamong pung hati.
15 Dangke banya-banya par Allah tagal Antua pung hati bae yang katong seng bisa ukur tu!