Paulus bela dia pung diri
10:1-18
10
1 Basudara e! Ada dari kamong yang bilang kata, “Paulus tu cuma barani tagor katong deng karas kalo jau sa, mar kalo ada sama-sama, dia seng barani.” Mar basudara e, deng randa hati deng hati bae macang deng Kristus, beta minta biar kamong 2 jang paksa beta par tagor kamong deng karas waktu beta ada di situ. Barang, beta rencana par tagor satu dua orang deng karas. Dong bilang kata katong hidop macang deng orang-orang yang seng kanal Tuhan di dunya ni. 3 Memang katong hidop di dunya ni, mar katong seng pake manusia pung cara par baku prang deng orang-orang yang malawang Kabar Bae. 4 Barang, senjata yang katong pake par baku prang tu bukang senjata yang manusia pake, mar senjata dari Allah yang pung kuasa.* Deng senjata tu, katong bisa kasi ancor orang yang malawang Kabar Bae tu pung sagala macang alasang par baku malawang, macang deng tantara kasi ancor benteng-benteng yang kuat. 5 Deng senjata tu, katong bongkar prinsip-prinsip deng sagala macang pikirang yang seng batul yang orang-orang sombong pake par pele-pele orang par kanal Allah. Deng senjata tu, katong roba orang-orang yang malawang pung pikirang la bawa dong par tundu iko Kristus pung mau. 6 Jadi katong mau biar kamong batul-batul dengar-dengarang Kristus kamuka. Abis itu baru katong siap par hukum sapa sa yang seng dengar-dengarang Antua.7 Kamong cuma lia di kuli-kuli sa kapa? Coba pikir: Kalo ada satu orang yang batul-batul tau kalo dia tu Kristus pung orang, dia jua musti tau kalo katong ni jua Kristus pung orang-orang, sama deng dia.a 8 Biar kata ada orang yang pikir kata beta talalu makang puji deng kuasa yang Tuhan kasi par katong ni, mar beta seng malu soal itu. Barang, kuasa yang Antua kasi tu kuasa par kasi kuat kamong pung parcaya, bukang par kasi ancor kamong pung parcaya.* 9 Beta bilang bagitu tagal beta seng mau kamong pikir kata beta ada biking taku kamong deng beta pung surat-surat, 10 tagal ada orang yang bilang kata beta pung surat-surat tu memang karas deng tajang. Mar kalo baku tangada muka, beta lombo-lombo sa deng seng pintar bicara sama sakali. 11 Mar, orang-orang yang bilang macang bagitu tu musti tau kalo waktu katong datang, katong nanti kasi unju kalo katong karas deng tajang macang deng katong pung surat lai.
12 Orang-orang yang malawang beta tu suka makang puji diri sandiri kata dong tu jua Kristus pung utusang. Mar, katong seng barani banding katong pung diri deng dong. Barang, dong pake dong pung ukurang par ukur dong pung diri sandiri. Dong jua suka banding dong deng dong pung diri sandiri. Bodo paskali! 13 Mar katong seng macang dong. Kalo katong mau bicara mangarti deng karja yang Allah kasi, katong seng bicara mangarti deng orang laeng pung daera karja, mar katong pung daera karja yang Antua kasi par katong, yang tabuka basar sampe di kamong pung daera tu. 14 Barang waktu pi kasi tau Kabar Bae soal Kristus, katong pi sampe di kamong pung daera. Jadi, katong seng langgar orang laeng pung batas karja waktu katong bicara par kamong. 15 Katong jua seng bicara mangarti deng orang laeng pung karja di daera yang Allah seng kasi par katong. Mar katong harap kamong labe hari labe tamba parcaya Kristus biar katong pung karja di tenga-tenga kamong labe hari labe tamba basar lai. 16 Deng bagitu, katong bisa kasi tau Kabar Bae sampe ka daera-daera laeng yang balong parna dengar akang. Barang, katong seng mau bicara mangarti deng orang laeng pung karja di daera yang Allah su kasi par dong karja.*
17 Jadi, sama deng apa yang tatulis dalang Allah pung Tulisang ni, “Kalo sapa mau bicara mangarti, labe bae dia bicara mangarti tagal apa yang Tuhan biking.”* 18 Barang, orang yang makang puji diri sandiri kata dia tu Kristus pung utusang, balong tantu dia batul di muka Tuhan. Labe bae tunggu sampe Tuhan sandiri kasi unju sapa yang pantas par dapa puji.