Paulus seng mau jamaat iko ajarang-ajarang yang seng batul
11:1-6
11
1 Basudara e! Orang-orang yang bilang kata dong tu Kristus pung utusang-utusang, dong bicara mangarti mar kamong mau dengar dong sa. Jadi tolong sabar deng beta jua waktu beta bicara mangarti sadiki macang deng orang bodo. Mar, kamong memang su sabar deng beta! 2 Bagini: Beta paduli deng kamong macang Allah paduli deng kamong. Barang, beta ni macang deng kamong pung bapa yang su kasi tunangang kamong deng laki-laki satu. Laki-laki tu Kristus. Jadi, beta jaga kamong bae-bae biar kamong tetap barsi waktu kaweng deng kamong pung tunangang tu. Beta seng mau jang sampe ada yang kasi rusak kamong pung parcaya. 3 Mar, beta taku jang sampe ada orang yang su tipu kamong sampe kamong su serong dari Kristus deng su seng batul-batul pegang kamong pung janji lai, macang deng Hawa yang dapa tipu dari ular yang datang deng dia pung akal bulus.* 4 Barang, kalo ada orang yang datang la ajar soal Yesus yang beda dari Yesus yang katong su ajar, kamong gampang paskali par tarima akang. Kamong pung talingang tipis paskali kalo ada orang yang bicara soal roh ka kabar bae yang beda deng Allah pung Roh ka Kabar Bae yang katong su ajar par kamong. 5 Mar beta pikir, orang yang panggel dong pung diri par “Allah pung utusang-utusang yang hebat” tu, dong seng labe bae dari beta. 6 Mangkali beta seng pintar bicara, mar beta bukang orang bodo. Beta batul-batul mangarti soal Allah pung kata-kata. Katong su kasi unju par kamong lewat samua yang katong biking ka bilang kalo katong mangarti akang.Paulus seng mau tarima kepeng dari jamaat Korintus
11:7-15
7 Waktu beta kasi tau Kabar Bae dari Allah par kamong, beta seng minta dapa bayar dari kamong, mar beta karja* par beta pung makang-minong hari-hari. Beta biking diri macang deng orang hina bagitu, biar beta bisa bantu angka kamong dari dosa-dosa. Jadi, beta sala ka kalo beta seng minta dapa bayar dari kamong? 8 Waktu itu, jamaat-jamaat laeng yang bantu beta. Anggap sa beta pancuri dong pung kepeng-kepeng tu biar beta bisa karja par kamong pung bae. 9 La waktu beta ada sama-sama deng kamong la ada parlu apapa satu bagitu, beta seng minta apapa dari kamong la biking barát kamong deng akang. Barang, basudara yang datang dari propinsi Makedonia kasi samua yang beta parlu. Jadi, dalang hal apa sa beta jaga diri biar jang biking barát kamong la beta tetap mau biking macang bagitu tarus.* 10 Sama deng Kristus pung ajarang yang tasimpang dalang beta pung hati ni batul, beta mau bilang deng sunggu-sunggu kalo apa yang beta mau bilang ni jua batul. Beta su putus kalo beta tetap seng mau tarima kepeng dari kamong par bantu beta. Jadi, seng satu orang lai dari kamong di propinsi Akaya yang bisa pele beta par bicara mangarti soal ini. 11 Mangapa kong beta seng mau tarima kepeng dari kamong? Tagal beta seng sayang kamong? Sio, seng! Allah tau kalo beta sayang kamong.
12 Beta su biking bagitu la mau biking bagitu tarus, biar kamong bisa lia kalo katong beda deng dong yang panggel dong pung diri par “Allah pung utusang-utusang yang hebat” tu. Beta biking bagitu biar dong seng ada pung alasang par bicara mangarti soal dong pung diri kata dong karja macang deng katong, tagal dong minta kepeng dari kamong. 13 Barang, dong tu bukang Kristus pung utusang. Dong bilang kata dong karja par Tuhan, mar dong parlente tagal dong cuma cari untung par dong pung diri sandiri. Dong tu cuma pura-pura jadi Kristus pung utusang. 14 Jang herang deng ini, tagal Setang pung Raja jua bisa roba dia pung diri biar orang pikir kata dia tu malekat tarang. 15 Jadi, jang herang kalo dia pung anana bua jua biking diri macang deng Tuhan pung orang-orang karja yang kasi tau ajarang yang batul. Mar satu waktu, Tuhan nanti balas dong iko apa yang dong biking tu.
Paulus seng pikir dia pung diri sandiri
11:16-33
16 Beta bilang satu kali lai: Jang anggap beta ni orang bodo. Mar, kalo kamong toh anggap beta macang bagitu, tolong tarima beta jua, macang deng kamong tarima orang bodo laeng. Deng bagitu, beta bisa bicara mangarti sadiki macang deng dong. 17 Apa yang beta bilang ni bukang tagal Tuhan suru beta par bilang akang, mar tagal beta ni orang bodo yang bisa bicara mangarti macang bagitu. 18 Tagal ada banya orang di situ yang bicara mangarti sama deng orang-orang yang seng parcaya Tuhan biasa biking, jadi beta jua mau bicara mangarti lai. 19 Beta bilang bagitu tagal kamong tu talalu pintar sampe kamong paleng sabar tarima orang-orang bodo tu pung bicara. 20 Kamong sabar sa waktu dong biking kamong macang deng dong pung jongos, ka kalo dong makang untung dari kamong, ka pake kamong par alat, ka lia kamong deng mata sabala, ka tampar kamong. 21 Deng malu paskali beta musti mangaku kalo beta deng beta pung tamang-tamang seng barani biking macang bagitu par kamong.
Mar, kalo ada orang laeng barani bicara mangarti, beta jua barani bicara mangarti. Mar, kalo beta biking bagitu, beta macang deng orang bodo. 22 Dong tu orang Ibrani? Beta lai! Dong tu orang Israel? Beta lai! Dong tu Abraham pung anana cucu? Beta lai! 23 Dong tu Kristus pung orang karja? Hah, beta lai bisa bilang macang deng orang nau-nau satu kalo beta labe dari dong! Beta karja banting tulang labe dari dong, labe banya dapa bui, dapa pukul ancor-ancor, deng banya kali amper mati.* 24 Su lima kali orang-orang Yahudi cambok beta pake cambok dari binatang pung kuli. Sabang kali dong cambok beta tu 39 kali. 25 Tiga kali beta dapa pukul deng kayo, satu kali amper mati tagal dapa lempar deng batu, tiga kali tinggalang deng kapal, deng satu kali anyo di lautang satu hari satu malang.* 26 Waktu pi bajalang ka mana-mana, beta jaga dapa rupa-rupa bahaya. Conto, beta dapa hener basar deng dapa rampok di tenga jalang. Beta jua dapa rupa-rupa bahaya dari beta pung orang Yahudi sandiri, orang bukang Yahudi, deng orang-orang yang bukang katong pung sudara yang parcaya Yesus mar mangaku bagitu. Beta dapa rupa-rupa bahaya lai waktu ada di kota, di padang gurun, ka di lautang.* 27 Banya kali beta karja banting tulang, seng tidor, ka lapar deng aos. Banya kali beta seng ada pung makanang, seng ada pung pakiang deng musti tahang dinging. 28 Bukang cuma itu sa. Sabang hari beta pikirang deng jamaat-jamaat samua, tagal musti pica pikirang par tolong dong. 29 Kalo ada dari dong yang rasa seng kuat, beta jua susa. Kalo ada dari dong yang jatu dalang dosa, beta pung hati jua ancor.
30 Jadi kalo beta musti bicara mangarti, beta cuma mau bicara mangarti soal samua yang kasi unju kalo beta ni seng kuat. 31 Allah, Tuhan Yesus pung Bapa yang pantas par dapa puji tarus-tarus tu, Antua tau kalo beta seng parlente. 32 Waktu beta ada di kota Damsik, Raja Aretas pung gubernur parenta dia pung tantara-tantara par jaga kota tu, biar dong bisa tangkap beta. 33 Mar, beta pung tamang-tamang kasi maso beta dalang karanjang satu la kasi turung beta deng tali dari jandela yang ada di tembok yang koliling kota tu la beta salamat dari dia.*