Paulus carita soal tanda satu yang Allah kasi lia par dia
12:1-10
12
1 Beta musti bicara mangarti tarus, biar kata seng ada untung par beta. Beta mau bicara soal tanda-tanda yang beta tarima dari Tuhan deng apa yang Antua kasi tau par beta. 2 Beta kanal satu orang yang su satu hati deng Kristus, yang sapulu ampa taong lalu tarangka ka tampa yang paleng tinggi di sorga.a Beta seng tau kata dia tarangka tu deng dia pung badang ka cuma deng dia pung roh sa. Cuma Allah yang tau soal itu. 3-4 Beta ulang satu kali lai, beta kanal satu orang yang tarangka ka sorga.b Cuma Allah sa yang tau kata dia tarangka tu deng dia pung badang ka cuma deng dia pung roh sa. Di sana, dia dengar hal-hal yang luar biasa yang manusia seng tau mau bilang akang deng cara bagemana, hal-hal yang manusia seng bole bilang akang. 5 Beta mau bicara mangarti soal dia, mar beta seng mau bicara mangarti soal beta pung diri. Mar, kalo beta mau bicara mangarti, beta cuma mau bicara mangarti kalo beta ni seng kuat. 6 Kalo beta mau bicara mangarti soal beta pung diri sandiri jua, beta seng mau bicara mangarti macang deng orang bodo, tagal beta bilang apa yang batul. Orang yang tarangka ka sorga tu beta sandiri. Mar beta tahang hati la seng mau bicara mangarti soal itu, biar jang ada orang yang anggap beta talalu panting, labe dari apa yang dong lia ka dengar beta biking.7 Biar beta jang mangarti tagal dapa tanda-tanda yang luar biasa dari Allah tu, Antua kasi ijin beta par dapa panyaki satu. Panyaki tu macang deng duri dalang beta pung daging. Itu macang deng Setang pung Raja pung utusang yang datang par siksa beta, biar beta jang mangarti. 8 Soal akang panyaki ni, su tiga kali beta minta deng sunggu-sunggu dari Tuhan par kasi bae akang. 9 Mar Antua jawab beta, “Beta salalu kasi unju Beta pung hati bae par se. Itu su sampe. Barang, Beta pung kuasa jadi kantara waktu se seng kuat.” Jadi, beta labe suka mangarti tagal beta seng kuat, biar Kristus pung kuasa bungkus beta pung hidop. 10 Tagal itu, beta sanang kalo beta seng kuat, dapa kata, dapa siksa, deng susa deng sangsara tagal karja par Kristus. Barang kalo beta seng kuat, Antua kasi kuat beta.
Paulus pikirang deng jamaat Korintus
12:11-21
11 Hadoh! Beta su bicara makang puji macang deng orang bodo lai. Mar, kamong yang paksa beta par biking bagitu. Yang batul tu, kamong yang musti puji beta. Barang, biar kata beta seng ada pung arti apapa, mar dalang sagala hal beta seng kala deng “Allah pung utusang-utusang yang hebat” tu. 12 Waktu beta ada sama-sama deng kamong, deng sabar paskali beta su biking sagala macang hal yang kasi unju kalo beta ni batul-batul Allah pung utusang, macang biking tanda-tanda herang deng hal-hal yang luar biasa deng Allah pung kuasa. 13 Jadi, coba beta tanya kamong. Apa yang beta biking par jamaat-jamaat laeng yang beta seng biking par kamong? Mangkali cuma kalo ada parlu apapa bagitu, beta seng minta akang dari kamong la biking barát kamong deng akang. Jang mara beta kalo beta su barát sabala deng kamong tagal biking bagini!
14 Sakarang beta su siap mau pi lia kamong par kali katiga. Beta seng pi par minta kamong bantu beta la biking barát kamong deng akang, tagal beta seng parlu deng kamong pung harta, mar deng kamong sandiri. Barang, biasa tu bukang anana yang musti kumpul harta par dong pung orang tatua, mar orang tatua yang musti kumpul harta par dong pung anana. 15 Jadi, beta sanang paskali par kasi samua yang beta pung par kamong, mala kasi beta pung diri sandiri antero-antero par bantu kamong. Kalo beta paleng sayang kamong, masa kamong seng bisa sayang beta sadiki lai?
16 Kamong samua tau kalo beta seng biking barát kamong. Mar, ada orang yang bilang kalo beta ni macang deng ular. Beta pake akal bulus par makang untung dari kamong. 17 Hah? Coba pikir! Beta parna makang untung dari kamong lewat orang-orang yang beta kiring par kumpul kepeng dari kamong ka? 18 Memang beta minta Titus pi par kamong sama-sama deng katong pung sudara satu lai. Mar Titus makang untung dari kamong? Seng to! Kamong tau kalo katong dua Titus karja deng maksud deng cara yang sama.
19 Jang sampe kamong pikir kata katong ada bela katong pung diri dari tadi. Beta paleng sayang kamong, sio basudara e! Samua yang katong bilang ni, katong bilang akang tagal katong su satu hati deng Kristus. Allah jadi saksi par apa yang katong bilang ni! Samua yang katong bilang ka biking ka, katong biking samua tu par kasi kuat kamong pung parcaya. 20 Beta biking bagitu tagal beta taku jang sampe waktu beta datang, beta dapa kamong seng sama deng apa yang beta harap, la beta seng sama deng apa yang kamong harap. Beta taku jang sampe kamong ada baku malawang, jalus, bagara sadiki takiri-kiri, pikir diri sandiri, biking busu orang laeng pung nama, carita orang, mangarti, deng biking kaco. 21 Beta taku jang sampe waktu beta datang kombali, Allah nanti biking malu beta di muka kamong. Beta jua taku jang sampe beta pung hati nanti ancor tagal ada dari kamong yang masi biking dosa deng balong kasi tinggal dosa-dosa. Barang, ada dari kamong yang tinggal kong hidop iko sagala macang napsu par biking yang kurang-kurang ajar, tidor deng orang yang bukang dong pung laki ka bini, deng baku tarika kiri-kanang.