Paulus pung nasehat-nasehat laste
13:1-10
13
1 Basudara e! Beta mau datang par kamong kali katiga ni. Inga apa yang Allah pung Tulisang bilang, “Kalo kamong ada tudu satu orang, paleng kurang musti ada dua ka tiga saksi yang bilang hal yang sama, biar parkara tu jadi jelas.”* 2 Waktu beta ada di situ kali kadua tu, beta su parna tagor kamong yang masi biking dosa, kalo kamong musti kasi tinggal kamong pung dosa-dosa tu. Sakarang waktu beta jau dari kamong ni, beta mau kasi inga kamong kombali kalo waktu beta bale, beta pasti hukum sapa sa dari kamong yang masi tetap biking dosa. 3 Beta nanti biking bagitu tagal ada dari kamong yang manuntut bukti kata Kristus pake beta par kasi tau Antua pung pasáng ka seng. Antua seng lombo-lombo deng kamong, mar deng Antua pung kuasa, Antua nanti hukum kamong yang masi tetap biking dosa. 4 Memang batul waktu Antua dapa salib, Antua seng kuat. Mar, Antua hidop kombali deng Allah pung kuasa. Bagitu lai deng katong. Katong yang satu hati deng Antua ni seng kuat, macang deng Kristus. Mar waktu katong datang par kamong, katong nanti datang deng kuasa yang Allah su kasi par katong yang hidop deng Kristus.5 Coba uji kamong pung diri sandiri kata kamong tu batul-batul parcaya Kristus ka seng. Coba pariksa kamong pung hati. Kalo kamong biking bagitu, kamong nanti bisa lia kalo kamong su satu hati deng Yesus Kristus ka seng. Kalo seng, jang sampe kamong pura-pura parcaya sa. 6 Mar beta tau kalo kamong uji katong, kamong nanti lia kalo katong ni batul-batul Kristus pung utusang.
7 Katong sombayang biar Allah tolong kamong biar kamong seng biking apa yang sala. Katong minta bagitu bukang biar orang-orang bisa lia kata katong ni batul-batul Kristus pung utusang. Mar, katong minta bagitu biar kamong bisa biking apa yang batul, biar kata orang-orang anggap kata katong ni bukang Antua pung utusang. 8 Barang, katong seng bisa malawang ajarang yang batul. Cuma ajarang yang batul sa yang katong biking. 9 Katong sanang tagal kamong kuat dalang kamong pung parcaya sampe katong seng parlu hukum kamong, biar kata orang-orang anggap katong seng kuat tagal seng parlu hukum kamong. Katong sombayang biar Antua tolong kamong par bale biking samua yang batul kombali. 10 Ini ni alasang mangapa kong beta tulis samua ni par kamong waktu beta jau dari kamong, biar waktu beta sampe di situ, beta seng parlu pake beta pung kuasa par tagor kamong deng karas. Barang, kuasa yang Tuhan kasi par beta tu par kasi kuat kamong pung parcaya, bukang par kasi ancor kamong pung parcaya.
Paulus tutu dia pung surat
13:11-13
11 Laste basudara e, kamong pung hati musti sanang salalu! Usaha biar kamong bale biking samua yang batul kombali. Dengar la biking beta pung nasehat-nasehat ni. Kamong musti satu hati deng hidop dame satu deng laeng. Allah yang sayang katong deng yang biking katong hidop dame satu deng laeng tu nanti tinggal sama-sama deng kamong. 12 Kalo baku dapa, kasi salam manisa satu deng laeng, tanda kalo kamong sama-sama parcaya. Tuhan pung orang-orang samua di sini kiring hormat par kamong.
13 Beta minta biar Tuhan Yesus Kristus kasi berkat basar par kamong samua. Beta jua minta biar Allah kasi unju Antua pung sayang par kamong deng biar Antua pung Roh ika kamong samua jadi satu hati.
Hormat, Paulus