Paulus pung Surat Partama par Jamaat di
Korintus
Kata-Kata Partama
Sapa yang tulis surat ni: Orang yang tulis surat 1 Korintus ni Paulus, waktu dia ada di kota Efesus. Dia yang kasi badiri jamaat di Korintus, sama-sama deng Priskila deng Akwila, waktu bajalang kasi tau Kabar Bae di karajaang Roma. Dia tinggal di kota Korintus deng kasi balajar Kabar Bae di sana satu stenga taong (Utusang pung Carita 18:1-21).
Surat ni par sapa: Surat ni par jamaat di kota Korintus, di propinsi Akaya. Kota Korintus tu kota pelabuhan, kota kaya, tampa jual-bali, la orang dari banya tampa tinggal di sana. Kota tu jua top deng hal-hal yang kurang-kurang ajar. Jamaat Korintus dapa pangaru dari kota Korintus pung budaya yang biking sampe dong sala mangarti Kabar Bae soal Yesus. Dalang jamaat Korintus, ada orang Yahudi deng bukang Yahudi, orang kaya deng orang kasiang, jongos deng bos. Ini yang biking sampe jamaat baku tatoki satu deng laeng. Tarus, biar kata Paulus kasi badiri jamaat Korintus, ada orang-orang di jamaat tu yang seng tarima Paulus parenta dong.
Mangapa Paulus tulis surat ni: Paulus tulis surat ni par kasi batul masala-masala barát yang muncul dalang jamaat yang dia dengar dari babarapa orang yang tinggal di usi Kloe pung ruma (1:11). Masala-masala tu, masala-masala yang orang Korintus anggap itu masala biasa, mar itu dosa basar. Conto sa soal biking yang kurang-kurang ajar, macang kaweng deng dia pung mama tiri, ka tidor deng orang yang bukang dia pung laki ka bini (5:1-13, 6:12-20).
Dia jua tulis surat ni par jawab apa yang dong tanya dalang dong pung surat par dia, macang soal kaweng deng seng kaweng (7:1-40), soal kasi korbang par patong-patong deng makang daging yang su dapa kasi korbang par akang (8:1—10:33), deng soal hal-hal laeng lai.
Surat ni tabage par babarapa bagiang:
| 1:1-9 | Tabea deng Paulus minta dangke dari Allah |
| 1:10—6:20 | Nasehat-nasehat soal babarapa masala dalang jamaat Korintus |
| 7:1—11:1 | Paulus jawab soal-soal yang jamaat Korintus tanya par dia dalang surat |
| 11:2—14:40 | Ajarang soal cara ibada deng berkat rohani dalang jamaat |
| 15:1-58 | Orang parcaya nanti hidop kombali |
| 16:1-18 | Nasehat-nasehat yang laste |
| 16:19-24 | Paulus tutu dia pung surat |