Sapa yang biking dosa dalang jamaat musti dapa hukum
5:1-13
5
1 Beta dengar kalo ada dari kamong yang biking kurang-kurang ajar. Beta pung maksud, ada yang kaweng deng dia pung mama tiri sandiri. Orang yang seng parcaya Allah jua seng kurang ajar macang bagitu! 2 Mar biar kata macang bagitu, kamong masi mangarti lai. Hoe! Yang batul tu, kamong musti hati susa tagal kalakuang macang bagitu deng user orang yang biking bagitu dari tenga-tenga kamong. 3 Beta bilang bagitu tagal biar kata beta seng ada sama-sama deng kamong di situ, mar beta pung hati ada sama-sama deng kamong. Jadi, beta su putus dia yang su biking kajahatang tu pung hukumang sama deng waktu beta ada di situ. 4 Waktu kamong yang parcaya Tuhan Yesus ada bakumpul sama-sama, beta pung hati jua ada deng kamong lai. Jadi, deng Tuhan Yesus yang katong somba tu pung kuasa, 5 kamong musti user dia tu kaluar dari jamaat, biar dia bisa rasa apa yang jadi waktu Setang pung Raja ator dia pung hidop. Deng bagitu, dia bisa kasi tinggal dia pung dosa tu biar dia salamat waktu Tuhan bale kombali.6 Jadi, kamong seng bole mangarti deng kajahatang tu. Jang sampe kamong lupa kalo ragi sadiki sa bisa biking tarigu samua nai. Bagitu lai deng kajahatang sadiki sa bisa biking sampe jamaat jadi rusak. 7 Tagal itu, kamong musti buang kamong pung kajahatang jau-jau, sama deng orang Yahudi buang ragi samua waktu hari Paska. Deng cara bagitu, kamong jadi orang yang seng ada pung sala deng kajahatang, macang deng adonan baru yang seng pake ragi. Barang, kamong tu memang su seng ada pung sala deng kajahatang, tagal Kristus su tabus katong pung dosa-dosa. Antua tabus katong pung dosa-dosa, sama deng domba ana yang orang Yahudi jaga kasi waktu Paska par jadi korbang par tabus dong pung dosa-dosa.
8 Jadi basudara e, tagal Kristus su tabus katong pung dosa-dosa, mari katong buang katong pung dosa deng kajahatang jau-jau, macang deng orang Yahudi buang ragi waktu pesta makang Paska.* Mar, mari katong hidop deng hati barsi deng iko Allah pung mau, sama deng roti yang seng pake ragi.
9 Basudara e, dalang beta pung surat yang kamuka, beta su parna bilang par kamong kalo jang paskali batamang deng orang-orang yang tidor deng orang yang bukang dia pung laki ka bini. 10 Yang beta maksud tu bukang orang-orang yang balong parcaya Allah yang tidor deng orang yang bukang dia pung laki ka bini, yang baringing, yang ambe orang laeng pung barang deng paksa, deng yang somba patong-patong. Barang, kalo sampe macang bagitu labe bae kamong pi dari dunya ni sa. 11 Mar, yang beta maksud tu jang batamang deng orang-orang yang bilang kalo dong tu sudara yang parcaya Yesus, mar tidor deng orang yang bukang dia pung laki ka bini, baringing, bahojat, somba patong-patong, pamabo, deng ambe orang laeng pung barang deng paksa. Mala, jang dudu makang sama-sama deng dong lai. 12-13 Barang, beta pung urusang apa par nilai orang-orang yang seng parcaya Yesus tu? Allah sandiri yang nanti putus dong pung hukumang par dong pung dosa-dosa. Mar kamong, kamong yang musti putus hukumang par jamaat yang biking dosa, macang apa yang tatulis dalang Allah pung Tulisang kata, “User sapa sa yang biking dosa dari dalang jamaat!”*