Paulus tagor jamaat Korintus
4:1-21
4
1 Jadi kamong musti anggap katong ni Kristus pung orang-orang karja. Antua su kasi tugas katong par pi kasi tau Allah pung rencana yang manusia balong tau. 2 Orang-orang yang su dapa tugas macang bagitu, dong musti karja iko dong pung bos pung mau par kasi unju kalo dong memang bisa dapa parcaya. 3 Kalo par beta, seng panting kata kamong ka orang laeng mau nilai apa soal beta. Mala par beta, apa yang beta nilai soal beta pung diri jua seng panting. 4 Beta seng rasa kalo beta biking sala. Mar, itu jua seng jadi bukti kalo beta seng biking sala. Tuhan sandiri yang bisa nilai kata beta su biking beta pung tugas deng bae ka seng. 5 Tagal itu, jang nilai orang tagal balong akang pung waktu. Tunggu sampe Tuhan bale kombali, baru Antua nanti kasi lia samua yang tasambunyi dalang galap sampe samua orang bisa lia akang tarang-tarang. Antua jua nanti bongkar manusia pung rencana-rencana yang tasambunyi dalang hati. Abis itu, Allah nanti puji sapa-sapa yang pantas par dapa puji.6 Basudara e! Beta su pake beta deng Apolos par jadi conto biar kamong bisa mangarti apa yang orang jaga bilang kata, “Jang nilai manusia talalu tinggi dari apa yang su tatulis.” Kalo kamong iko akang, kamong pasti seng puji-puji kamong pung pamimping yang satu la hina-hina yang laeng. 7 Sapa yang bilang kata kamong tu labe bae dari orang laeng? Samua berkat rohani yang kamong pung tu, Tuhan yang kasi akang. Jadi, kalo kamong tarima samua tu dari Tuhan, mangapa kong kamong mangarti deng akang, macang kata kamong dapa akang deng kamong pung usaha sandiri, bukang dari Tuhan? 8 Kamong su biking diri macang kata kamong tu su seng parlu apapa satu lai! Kamong su biking diri macang kata kamong tu su kaya deng sagala macang berkat rohani! Kamong su biking diri macang kata kamong tu su kuat macang deng raja sa la katong ni seng! Mar bagus lai kalo kamong memang batul-batul su jadi raja. Mangkali katong bisa pegang parenta sama-sama deng kamong ka!
9 Tagal kalo par beta, Allah su biking katong yang jadi Antua pung utusang-utusang ni macang deng orang yang paleng hina. Katong macang deng orang yang dapa tangkap waktu prang yang nanti mau dapa bunu di muka orang banya. Samua orang di dunya deng malekat-malekat pung mata lia katong. 10 Orang-orang di dunya ni pikir kalo katong ni orang bodo tagal katong kasi balajar orang soal Kristus. Mar kamong, kamong pikir kata kamong tu pung pikirang tajang tagal kamong su satu hati deng Kristus. Orang-orang tu pikir kalo katong seng kuat, mar kamong pikir kata kamong kuat. Katong dapa hina mar kamong dapa hormat. 11 Sampe oras ni katong makang deng minong seng sampe-sampe. Katong pung pakiang cuma yang malakat di badang sa. Katong jaga dapa pukul ancor-ancor. Katong jua seng ada pung tampa tinggal yang tetap. 12 Katong musti karja banting tulang par katong pung hidop hari-hari.* Orang hina-hina katong mar katong minta Tuhan kasi berkat par dong. Kalo katong dapa siksa, katong sabar sa. 13 Kalo orang hojat katong, katong balas bae-bae sa. Sampe oras ni orang-orang anggap katong macang deng rumpu dalang dunya ni, macang deng daki yang pantas par dapa goso buang.
14 Beta seng tulis ini par biking malu kamong, mar par tagor kamong, tagal kamong tu macang deng beta pung ana gandong yang beta sayang. 15 Barang, biar kata ada ribu-ribu orang yang bisa kasi balajar kamong soal Kristus lai, mar seng ada banya yang jadi bapa par kamong macang beta. Beta jadi kamong pung bapa tagal beta yang pi kasi tau Kabar Bae soal Kristus partama kali par kamong. 16 Tagal itu, beta minta deng sunggu-sunggu dari kamong par iko beta pung cara hidop.* 17 Ini yang biking sampe beta utus Timotius par kamong. Dia tu macang deng beta pung ana yang beta sayang deng yang beta bisa parcaya par biking Tuhan pung karja. Dia nanti kasi inga kamong kombali soal beta pung hidop dalang beta pung parcaya par Yesus Kristus. Beta pung hidop tu, itu sama deng apa yang beta ajar di sagala tampa, di jamaat mana sa.
18 Ada satu dua orang dari kamong yang rasa diri mangarti tagal dong pikir kata beta seng datang par baku dapa kamong lai. 19 Mar kalo Tuhan sayang, seng lama lai beta mau datang par kamong. Pas beta datang baru beta tau kata dong cuma bicara mangarti sa, ka batul-batul pake kuasa yang Tuhan kasi par dong tu. 20 Barang, katong bisa lia Allah pegang parenta dalang manusia pung hidop tu bukang dari orang pung kata-kata, mar dari Antua pung kuasa yang roba dia pung hidop.
21 Jadi, kamong mau pili mana kalo beta datang? Kalo kamong tinggal kong mangarti deng seng roba kamong pung hidop, beta nanti tagor kamong deng karas macang deng beta ada cambok kamong. Mar, kalo kamong roba kamong pung hidop, beta nanti bicara manis-manis deng kamong, deng kasi unju kalo beta sayang kamong.