Jamaat tapica-pica tagal baku malawang soal pamimping
3:1-23
3
1 Basudara e! Dolo waktu beta ada sama-sama deng kamong, beta seng bisa bicara par kamong macang deng bicara par orang-orang yang dapa pimping dari Allah pung Roh. Beta cuma bisa bicara par kamong sama deng bicara par orang-orang yang masi hidop iko dunya pung mau. Barang, kamong masi macang deng anana kacil yang balong kuat, tagal kamong balong batul-batul parcaya Kristus. 2 Jadi waktu itu, beta kasi susu par kamong bukang makanang karas, tagal kamong balong siap.* Mala sampe sakarang kamong masi balong siap, 3 tagal kamong masi hidop macang deng orang-orang yang hidop iko dunya pung mau. Beta bilang bagitu tagal kamong masi suka jalus deng baku bakalai. Itu kasi unju kalo kamong masi hidop iko dunya pung mau. Kamong masi hidop macang deng orang yang seng tau Tuhan. Batul to? 4 Barang kalo satu orang bilang, “Beta ni dari Paulus pung kalompok” la yang laeng lai bilang, “Beta ni dari Apolos pung kalompok”,* itu kasi unju kalo kamong tu masi hidop macang deng orang yang seng tau Tuhan.5 Kalo bagitu, Apolos tu sapa? La beta Paulus ni jua sapa? Katong ni cuma Tuhan pung orang suru-suru yang kasi balajar kamong biar kamong parcaya, satu-satu deng tugas yang Tuhan su kasi par dia. 6 Beta yang tanang, Apolos yang sirang, mar Allah yang kasi batumbu.* 7 Jadi, yang panting tu bukang orang yang tanang ka orang yang sirang, mar Allah yang kasi batumbu. 8 Orang yang tanang deng orang yang sirang, dong dua tu karja deng maksud yang sama, la Allah nanti balas satu-satu iko dong pung karja sandiri. 9 Barang, katong dua ni sama-sama karja par Allah la kamong tu macang deng Allah pung kabong. Kamong tu jua macang deng Allah pung ruma.
10 Basudara e! Allah su kasi berkat basar par beta deng cara biking beta jadi tukang yang bagus yang su kasi dudu Allah pung pandasi ruma tu. Yang beta maksud, beta yang partama kali kasi balajar soal Yesus Kristus par kamong. Abis beta, ada orang laeng yang datang par sambung karja di atas pandasi yang beta su taru tu. Mar, satu-satu musti taru kira dia pung karja tu bae-bae, sama deng tukang yang musti taru kira dia pung karja di atas pandasi. 11 Barang, cuma Yesus Kristus sa yang jadi pandasi par kamong pung parcaya. Jadi, jang sampe ada orang yang kasi balajar kamong di atas pandasi yang laeng, tagal seng ada yang laeng lai. 12 Kalo ada orang yang kasi balajar Tuhan pung ajarang deng bae, dia tu sama deng tukang yang biking ruma di atas pandasi tu pake barang-barang yang bagus macang mas, perak, ka batu yang mahal-mahal. Kalo seng, dia tu sama deng tukang yang biking ruma pake barang-barang yang seng bagus macang kayo lombo-lombo, rumpu, ka kusu-kusu. 13 Mar kalo sampe ruma tu tabakar, katong bisa dapa lia kantara-kantara kalo barang-barang yang dia pake par biking ruma tu bagus ka seng. Bagitu lai deng waktu Tuhan Yesus bale kombali la uji satu-satu pung karja. Waktu itu, satu-satu bisa lia kata dia pung karja tu bagus ka seng. 14 Kalo dia pung karja tu batahang, dia nanti dapa dia pung ongkos lala. 15 Kalo dia pung karja tu seng batahang, dia pasti rugi. Memang batul Tuhan nanti kasi salamat dia, mar dia nanti salamat macang deng orang yang lari kasi salamat diri waktu dia pung ruma tabakar.
16 Kamong tau ka seng kalo kamong samua tu sama deng Allah pung Ruma la Antua pung Roh tinggal dalang kamong?a 17 Kalo ada orang yang kasi ancor Antua pung ruma, Antua nanti kasi ancor dia lai. Barang, Allah pung ruma tu kudus la kamong tu Antua pung ruma.
18 Jang ada orang yang parlente dia pung diri sandiri tagal rasa diri mangarti. Kalo ada satu dari kamong yang rasa kata dia tu pung pikirang tajang kalo iko orang-orang di dunya ni pung ukurang, labe bae dia jadi macang deng orang bodo biar dia bisa jadi batul-batul pung pikirang tajang kalo iko Allah pung ukurang. 19 Barang, orang-orang di dunya ni pung pikirang tajang sama deng barang bodo par Allah. Itu sama deng apa yang tatulis dalang Allah pung Tulisang yang bilang, “Allah pake orang-orang di dunya pung pikirang tajang par jadi dodeso par dong pung diri sandiri.”*
20 Dalang bagiang laeng jua ada bilang, “Tuhan tau apa yang orang-orang yang pung pikirang tajang tu pikir. Samua tu seng ada pung guna apapa.”*
21 Jadi, jang ada satu orang lai yang rasa diri basar tagal iko pamimping sapa sa.* Barang, Allah su kasi sagala macang hal par kamong pung bae. 22 Antua kasi beta ka, Apolos ka, Petrusb ka, itu par kamong pung bae. Antua biking sagala macang hal dalang dunya ni par kamong pung bae. Antua pake kamong pung hidop deng mati par bawa hal yang bae par kamong. Apa yang jadi sakarang ni ka eso lusa, Antua pake akang par tolong kamong. Allah pake sagala macang hal tu par bawa apa yang bae par kamong. 23 La kamong, kamong tu Kristus pung orang-orang la Kristus tu Allah pung.