Orang yang dapa pimping dari Allah pung Roh bisa mangarti Allah pung rencana
2:1-16
2
1 Basudara e! Waktu beta datang par kamong par kasi tau Allah pung rencana yang manusia balong tau akanga tu, beta seng pake bahasa yang tinggi-tinggi ka bicara macang deng orang yang pung pikirang tajang. 2 Barang, beta su putus dalang hati kata, kalo beta ada sama-sama deng kamong, beta seng mau bicara hal yang laeng. Yang beta mau bicara tu cuma soal Yesus Kristus yang su mati di kayo salib tu sa. 3 Waktu beta ada sama-sama deng kamong jua, beta rasa diri seng mustahak deng gamatar takotang.4 Waktu beta bicara deng kasi tau Allah pung ajarang par kamong, beta seng bicara macang deng orang yang pung pikirang tajang par buju kamong sampe kamong parcaya apa yang beta bilang. Mar waktu itu, Allah pung Roh pung kuasa karja dalang kamong pung diri sampe kamong bisa tau kalo apa yang beta bilang tu batul. 5 Beta bilang bagitu biar kamong tau kalo kamong bisa parcaya, itu bukang tagal manusia pung pikirang tajang, mar tagal Allah pung Roh pung kuasa.
6 Kalo katong bicara par orang-orang yang su batumbu deng baakar kuat-kuat dalang dong pung parcaya par Tuhan, katong bicara deng pikirang tajang. Pikirang tajang tu bukang iko orang-orang di dunya ni pung ukurang, ka iko orang-orang yang pegang kuasa di dunya ni pung ukurang. Dong yang pegang kuasa tu seng lama lai su mau binasa. 7 Mar pikirang tajang tu iko Allah pung ukurang. Katong bicara deng pikirang tajang soal Allah pung rencana yang manusia balong tau, yang dolo tasambunyi dari orang-orang. Antua su biking rencana tu dari waktu Antua balong biking dunya ni lai. Antua biking rencana tu par katong pung bae.
8 Seng ada satu orang lai dari orang-orang yang pegang kuasa dalang dunya ni yang tau soal Allah pung rencana tu. Barang, kalo dong tau akang, dong pasti seng salib Tuhan Yesus yang katong puji-puji tu. 9 Mar dong seng tau. Ini sama deng apa yang tatulis dalang Allah pung Tulisang kata,
“Apa yang orang seng parna lia deng dengar, deng yang seng parna muncul dalang orang pung pikirang,
itu yang Allah kasi siap par orang-orang yang sayang Antua.”*
10 Mar par katong, Allah su buka Antua pung rencana tu lewat Antua pung Roh. Barang, Antua pung Roh tu tau samua hal. Mala Antua pung Roh tu mangarti samua hal yang ada dalang Antua pung hati, yang Antua seng parna bilang par satu orang lai. 11 Barang, yang tau apa yang ada dalang manusia pung hati tu cuma dong pung roh sandiri. Bagitu lai deng Allah. Yang tau apa yang ada dalang Antua pung hati tu cuma Antua pung Roh sandiri.
12 Katong seng tarima roh dari dunya ni, mar Roh yang asal dari Allah biar katong bisa tau samua hal yang Allah kasi par katong tagal Antua pung hati bae. 13 Tagal itu, kalo katong bicara soal Allah par orang-orang yang dapa pimping dari Antua pung Roh, katong seng bicara deng kata-kata yang datang dari manusia pung pintar, mar dari Antua pung Roh. 14 Jadi, orang yang seng dapa pimping dari Allah pung Roh seng mau tarima apa yang Roh tu bilang, tagal par dia, itu sama deng barang bodo bagitu. Dia seng bisa mangarti akang kalo Allah pung Roh seng tolong dia par mangarti akang. 15 Orang yang dapa pimping dari Allah pung Roh bisa mangarti sagala macang hal. Mar orang-orang yang seng dapa pimping dari Allah pung Roh, dong seng bisa mangarti orang-orang yang dapa pimping dari Allah pung Roh. 16 Itu sama deng Allah pung Tulisang yang bilang,
“Sapa tu yang tau Tuhan pung pikirang?
Sapa tu yang bisa kasi nasehat par Antua?”*
Mar katong, katong pung cara pikir sama deng Kristus pung cara pikir.