Paulus pung Surat par Jamaat di
Roma
Kata-Kata Partama
Sapa yang tulis surat ni: Orang yang tulis surat Roma ni Paulus, seng lama pas mau pi ka kota Yerusalem par bawa kepeng par bantu jamaat di sana. Bukang Paulus yang kasi badiri jamaat Roma. Paulus sandiri balong parna pi ka sana, mar harap abis dari Yerusalem, dia bisa singga di sana waktu pi ka Spanyol (1:10-13, 15, 15:28; Utusang pung Carita 19:21). Dia dengar kabar soal dong pung parcaya dari orang laeng (1:8).
Surat ni par sapa: Surat ni par jamaat di kota Roma. Kota Roma tu karajaang Roma pung ibu kota deng pusat pemerinta. Dalang karajaang Roma, Raja Basar dapa anggap dewa, la orang musti somba dia. Kota Roma jadi pusat agama tu. Orang-orang di kota Roma jua somba banya dewa yang laeng.
Banya dari jamaat Roma tu orang bukang Yahudi (1:5-6, 1:13, 11:13), mar jamaat tu mulai partama kali dari orang Yahudi pung tampa sombayang (Utusang pung Carita 2:10). Paulus bilang kalo banya orang di antero karajaang Roma su dengar soal dong pung parcaya (1:8).
Mangapa Paulus tulis surat ni: Paulus tulis surat ni biar jamaat Roma siap tarima dia kalo dia datang, deng bantu dia par pi ka Spanyol par kasi tau Kabar Bae di sana (15:24).
Dalang surat ni, Paulus kasi jelas dasar-dasar ajarang Kristen par dong. Dia bilang kalo samua orang, Yahudi ka bukang Yahudi, samua tu bardosa (3:23). Mala sabang kali manusia mau biking apa yang bae, justru apa yang seng bae yang dia biking (7:15). Tagal itu, manusia seng bisa jadi batul di muka Allah deng dia pung usaha sandiri, usaha par biking atorang-atorang Torat (3:27-28, 4:15). Manusia bisa jadi batul di muka Allah tu cuma tagal parcaya Yesus Kristus (3:22). La lewat Antua pung kamatiang, Allah kasi salamat samua orang yang parcaya la seng hukum dong (3:22-26, 4:24-25, 5:1, 8). Akang pung laste, Paulus kasi tau jamaat Roma bagemana orang parcaya musti hidop (12:1—16:27).
Surat ni tabage par babarapa bagiang:
| 1:1-15 | Tabea deng Paulus pung kata-kata partama |
| 1:16—3:20 | Samua manusia parlu dapa kasi salamat dari Allah |
| 3:21—4:25 | Allah pung jalang par kasi salamat manusia |
| 5:1—8:39 | Hidop baru tagal su satu hati deng Yesus Kristus |
| 9:1—11:36 | Orang Israel dalang Allah pung rencana |
| 12:1—15:13 | Orang Kristen pung cara hidop |
| 15:14—16:27 | Paulus kasi nasehat yang laste deng tutu dia pung surat |