Katong musti tolong orang laeng, jang pikir diri sandiri
15:1-13
15
1 Katong yang su batul-batul mangarti soal apa yang orang-orang parcaya bisa biking deng seng bisa biking, katong musti sabar deng dong yang balong batul-batul mangarti akang. Jang katong cuma mau sanang sandiri sa. 2 Katong satu-satu musti usaha biar katong pung basudara jua sanang lai, par dong pung bae. Beta pung maksud, katong musti usaha biar dong pung parcaya jadi labe tamba kuat lai. 3 Coba lia Yesus Kristus tu. Antua jua seng cari Antua pung sanang sandiri, mar siap par dapa hina tagal Allah. Akang sama deng apa yang tatulis dalang Allah pung Tulisang, “Waktu orang-orang hina Allah, itu sama sa deng dong jua su hina Beta.”* 4 Sagala hal yang tatulis dalang Allah pung Tulisang dolo tu, akang tatulis par kasi balajar katong. Dari ajarang-ajarang tu, katong bisa balajar par tahang hati deng tetap kuat waktu susa deng sangsara, biar katong bisa tetap taru harap par Allah.5 Allah tu yang tolong kamong par tahang hati deng tetap kuat dalang kamong pung parcaya. Jadi, beta minta biar Antua tolong kamong par hidop dame satu deng laeng sama deng Yesus Kristus pung cara hidop. 6 La deng bagitu, kamong bisa satu hati angka suara puji-puji Allah, Tuhan Yesus Kristus yang katong somba pung Bapa tu.
7 Tagal itu, beta minta kamong tarima satu deng laeng bae-bae, sama deng Kristus jua su tarima kamong lai. Kalo kamong biking bagitu, Allah dapa puji-puji. 8 Beta mau kamong inga kalo Kristus su datang par tolong katong orang-orang Yahudi. Antua biking bagitu par kasi unju kalo Allah pasti biking apa yang Antua su bilang. Deng bagitu, samua orang bisa tau kalo Antua seng parna lupa deng Antua pung janji par katong pung tete-nene moyang dolo tu. 9 Kristus jua datang par tolong orang-orang bukang Yahudi. Antua biking bagitu par kasi unju Allah pung hati bae par dong, biar dong bisa puji-puji Antua tarus. Apa yang jadi par orang-orang bukang Yahudi ni sama deng apa yang tatulis dalang Allah pung Tulisang waktu Daud bilang kata,
“Tagal itu, beta nanti puji-puji Allah di tenga-tenga orang-orang bukang Yahudi.
Beta nanti manyanyi lagu-lagu par puji-puji Allah.”*
10 Ada tulisang jua yang bilang,
“E orang-orang bukang Yahudi e! Mari barsuka sama-sama deng Allah pung orang-orang.”*
11 Ada jua yang bilang,
“E samua orang yang bukang Yahudi e, mari puji Tuhan!
La mari manyanyi puji Antua, sagala macang bangsa e!”*
12 La Allah pung Juru Bicara Yesaya jua bilang,
“Isai pung turunang satu nanti muncul par parenta orang-orang bukang Yahudi.
La dong nanti taru harap par Dia.”*
13 Beta minta biar Allah yang jadi katong pung tampa taru harap tu biking kamong pung hati batul-batul dame deng sanang tagal kamong parcaya Antua. Beta minta bagitu biar kamong seng putus-putus taru harap par Antua tagal Antua pung Roh pung kuasa kasi kuat kamong pung hati.
Paulus carita soal dia pung karja
15:14-21
14 Basudara e! Beta tau batul-batul kalo kamong tu paleng bae paskali. Kamong su tau banya soal ajarang yang batul. La kamong jua bisa kasi nasehat satu deng laeng. 15 Mar biar kata bagitu, beta barani kasi nasehat kamong kombali soal satu dua hal yang kamong su tau tu. Beta biking bagitu tagal Allah su kasi unju Antua pung hati bae par beta, 16 sampe Antua pili beta par jadi Yesus Kristus pung orang karja par bawa Kabar Bae dari Allah par orang-orang bukang Yahudi. Deng bagitu, beta macang deng imam yang kasi korbang par Allah. Barang, beta hentar orang-orang bukang Yahudi par kasi dong pung hidop par Antua, macang deng korbang yang biking Antua pung hati sanang deng yang su dapa pili par jadi Antua pung, tagal Antua pung Roh karja dalang dong pung hati. 17 Tagal beta su satu hati deng Yesus Kristus, beta bisa bicara mangarti sadiki soal beta pung karja par Allah. 18 Beta seng barani bicara mangarti soal hal yang laeng. Beta cuma mau bicara mangarti soal apa yang Kristus biking lewat beta par hentar bangsa-bangsa laeng par datang la dengar-dengarang Antua. Antua pake beta pung kata-kata, beta pung karja, 19 deng tanda-tanda herang yang beta biking deng Antua pung Roh pung kuasa, par hentar dong datang par Antua. Beta su kasi tau Kabar Bae soal Kristus di mana-mana, mulai dari kota Yerusalem sampe ka daera Ilirikum. 20 Beta mau paskali pi kasi tau Kabar Bae soal Kristus di tampa-tampa yang orang balong parna dengar akang. Beta biking bagitu biar beta jang macang deng tukang yang biking ruma di atas pandasi yang orang laeng su taru.* 21 Yang beta biking tu sama deng apa yang tatulis dalang Allah pung Tulisang,
“Dong yang balong parna dengar barita soal Dia,
dong nanti tau Dia tu sapa.
La dong yang balong parna dengar apapa soal Dia,
dong nanti dengar la mangarti Dia tu sapa.”*
Paulus pung rencana par pi ka Roma
15:22-33
22 Basudara e, tagal beta pung karja tu sampe beta balong dapa pi lia kamong lai. 23 Mar sakarang, beta pung karja di daera-daera tu su abis, baru su babarapa taong ni jua beta rindu par pi lia kamong. 24 Tagal itu, beta harap waktu pi ka daera Spanyol, beta bisa singga sadiki di Roma situ par baku dapa kamong do biar beta pung hati sanang. Abis itu, beta harap kamong bisa bantu beta par pi ka Spanyol.
25 Mar sakarang, beta ada mau pi ka Yerusalem par pi antar kepeng-kepeng dari jamaat-jamaat par Allah pung orang-orang di sana.* 26 Barang, jamaat-jamaat yang ada di propinsi Makedonia deng Akaya su putus par kumpul kepeng par bantu orang-orang kasiang dari Allah pung orang-orang di Yerusalem. 27 Dong biking itu deng hati sanang, baru pantas kalo dong biking bagitu, tagal dong orang-orang bukang Yahudi tu su dapa berkat dari orang-orang Yahudi. Berkat yang beta maksud tu Kabar Bae yang dong su dengar dari orang-orang Yahudi. Jadi, pantas kalo orang-orang bukang Yahudi jua bantu orang-orang Yahudi deng dong pung harta to?
28 Jadi, kalo beta su abis pi antar kepeng-kepeng yang dong su kumpul par Allah pung orang-orang di Yerusalem, beta mau pi ka Spanyol mar singga lia kamong do. 29 Beta tau, kalo beta datang lia kamong, beta nanti datang bawa berkat banya dari Kristus par kamong.
30 Katong sama-sama parcaya Yesus Kristus, Tuhan yang katong somba. Allah pung Roh jua su tolong katong par baku sayang satu deng laeng. Tagal samua tu, beta minta deng sunggu-sunggu dari kamong par sombayang seng putus-putus par Allah biar Antua bantu beta. 31 Sombayang minta Antua jaga beta dari orang-orang Yahudi yang seng parcaya yang ada di propinsi Yudea, biar dong seng bisa kasi cilaka beta. Sombayang jua biar waktu beta kasi kepeng par Allah pung orang-orang di sana, dong bisa tarima akang deng hati sanang. 32 Deng bagitu, kalo Allah buka jalang, beta bisa datang lia kamong deng hati sanang, biar waktu beta ada sama-sama deng kamong, beta rasa tenang.
33 Beta minta biar Allah yang biking katong pung hati jadi dame tu tinggal sama-sama deng kamong samua! Amin.