Jang kasi sala kamong pung sudara yang beda pikirang deng kamong
14:1-12
14
1 Basudara e! Orang-orang yang balong batul-batul mangarti soal apa yang orang-orang parcaya bisa biking deng seng bisa biking, kamong musti tarima dong bae-bae. Jang baku malawang deng dong soal apa yang dong pikir tu. 2 Conto bagini: Ada orang yang su kuat dalang dia pung parcaya, jadi dia tau kata seng apapa kalo dia makang sagala macang makanang. Mar ada orang yang balong kuat, jadi dia cuma mau makang sayor-sayor sa, tagal dia pikir kata Allah seng mau orang makang daging. 3 Sapa yang makang apa sa, jang lia orang yang makang sayor sa deng mata sabala. Bagitu lai deng sapa yang makang sayor-sayor sa, jang kasi sala orang yang makang apa sa, tagal Allah su tarima dia. 4 Dia tu jua Allah pung jongos. Kamong seng ada pung hak par nilai ka kasi sala orang pung jongos. Allah sandiri yang bisa putus kata apa yang dia biking tu batul ka seng. Mar Allah tarima dia biar kata dia makang daging ka seng, tagal Antua pung kuasa par tolong dia biar dia tetap biking apa yang batul.5 Conto laeng lai: Ada orang yang pikir kata ada hari yang labe panting dari hari-hari yang laeng. Mar, ada orang jua yang pikir kata samua hari tu sama sa. Mar, beta mau bilang kalo satu-satu musti batul-batul parcaya kalo apa yang dia pili tu biking Allah pung hati sanang. 6 Sapa yang pikir kata ada hari basar yang labe panting dari hari-hari basar yang laeng, dia biking bagitu par taru hormat par Tuhan. La kalo ada orang yang makang apa sa, dia biking bagitu par taru hormat par Tuhan, tagal dia minta dangke dari Antua par makanang tu. Mar sapa yang cuma makang sayor-sayor sa, dia jua biking bagitu par taru hormat par Tuhan, tagal dia minta dangke dari Antua par makanang tu. 7 Barang, seng satu lai dari katong yang hidop ka mati cuma par kasi sanang katong pung diri sandiri. 8 Barang kalo katong hidop, katong hidop par kasi sanang Tuhan pung hati. La kalo katong mati, katong mati par kasi sanang Tuhan pung hati lai. Jadi hidop ka, mati ka, katong ni Tuhan pung. 9 Tagal itu kong Kristus mati la hidop kombali, biar Antua jadi katong pung Bos, biar kata katong hidop ka mati. 10 Jadi, mangapa kong kamong nilai kamong pung sudara yang parcaya Yesus kata yang dia biking tu sala ka batul? Ka, mangapa kong kamong lia kamong pung sudara tu deng mata sabala? Barang, katong samua pasti musti badiri di muka Allah yang nanti putus katong pung parkara.* 11 Akang sama deng apa yang tatulis dalang Allah pung Tulisang,
“Tuhan bilang, ‘Tagal Beta ni Allah yang hidop, samua orang pasti nanti tikang lutu somba Beta.
La samua orang nanti mangaku kalo Beta ni Allah.’ ”*
12 Jadi, katong satu-satu nanti badiri di muka Allah la mangaku samua yang katong su biking di dunya ni.
Jang biking katong pung basudara jatu dalang dosa
14:13-23
13 Tagal itu, jang laeng kasi sala laeng lai. Mar, kamong musti ati-ati deng kamong pung hidop biar kamong seng biking kamong pung basudara tasonto la jatu dalang dosa. 14 Tagal beta su satu hati deng Tuhan Yesus, beta batul-batul parcaya kalo seng ada makanang yang haram. Mar, kalo ada orang yang pikir kalo ada makanang yang haram la dia makang akang, par dia itu pung arti dia bardosa. 15 Kalo kamong makang apapa satu di muka kamong pung sudara yang parcaya kalo makanang yang kamong makang tu haram, itu sama sa deng kamong seng sayang dia. Jadi, jang kasi ancor kamong pung sudara pung parcaya tagal apa yang kamong makang. Barang, Kristus jua su mati par dia. 16 Jadi, biar kata kamong pikir kata apa yang kamong biking tu bae lai, mar kalo kamong pung sudara pikir kata itu seng bae, labe bae jang biking akang biar jang dong nilai kalo kamong biking apa yang jahat. 17 Barang, kalo Allah pegang parenta dalang katong pung hidop, yang panting tu bukang apa yang katong makang ka minong. Mar yang panting tu, katong hidop batul di muka Allah, hidop dame deng orang laeng, deng hidop deng hati sanang tagal Antua pung Roh karja dalang katong pung hati. 18 Sapa yang hidop par Kristus deng cara macang bagitu, dia su biking Allah pung hati sanang deng biking manusia taru hormat par dia.
19 Tagal itu, mari katong usaha sunggu-sunggu par biking apa sa yang biking katong bisa hidop dame deng orang laeng deng yang bisa kasi kuat laeng deng laeng pung parcaya. 20 Jang tagal makanang, katong kasi rusak apa yang Allah su biking dalang orang laeng pung hidop! Memang seng ada satu makanang lai yang bisa biking katong bardosa. Mar kamong sala kalo sampe kamong makang apa yang orang laeng anggap itu haram la dia jua makang akang. Itu sama sa deng kamong su biking dia jatu dalang dosa. 21 Labe bae jang makang daging, ka minong anggor, ka biking apa sa yang bisa biking kamong pung sudara jatu dalang dosa. 22 Kalo kamong pikir kata makanang deng minomang yang kamong makang deng minong tu seng biking kamong bardosa, tado-tado sa. Biar Allah sa yang tau soal itu. Kalo kamong biking apa yang kamong pikir itu batul baru kamong pung hati kacil jua seng tudu kata kamong ada biking sala, kamong tu paleng untung. 23 Mar, kalo kamong tetap makang makanang yang kamong pikir biking kamong bardosa, itu sama sa deng kamong su taru hukumang par kamong pung diri sandiri. Barang, apa yang kamong biking tu seng iko apa yang kamong parcaya dalang hati. La kalo kamong seng biking apa yang kamong parcaya kalo itu batul di muka Allah, kamong su bardosa.