Dengar-dengarang pemerinta
13:1-7
13
1 Basudara e, katong samua musti dengar-dengarang katong pung pemerinta. Barang, dong dapa kuasa par parenta tu dari Allah. Seng ada pemerinta yang seng asal dari Allah, tagal Antua yang angka dong. 2 Tagal itu, sapa sa yang malawang pemerinta, itu dia su malawang apa yang Allah su ator. La orang yang biking bagitu, dia nanti dapa hukum. 3 Kalo orang biking apa yang bae, dia seng usa taku pemerinta. Yang taku tu cuma orang yang biking kajahatang. Jadi, kalo kamong mau bebas dari rasa taku par pemerinta, kamong musti biking apa yang bae biar kamong dapa puji dari dong. 4 Barang, katong pung pemerinta tu Allah pung orang-orang karja, yang karja par kamong pung bae. Mar kalo kamong ada biking kajahatang, kamong musti taku par pemerinta tagal dong ada pung kuasa par hukum kamong. Dong tu Allah pung orang-orang karja yang kasi unju Antua pung morka par sapa-sapa yang su biking kajahatang. 5 Jadi, kamong musti dengar-dengarang kamong pung pemerinta, bukang cuma tagal kamong seng mau dapa hukum, mar jua tagal kamong pung hati kacil sandiri bilang kata apa yang kamong biking tu batul.6 Itu tu jua yang jadi alasang mangapa kong kamong musti bayar pajak. Barang, pemerinta yang urus akang tu Allah pung orang-orang karja yang pake dong pung waktu tarus par biking dong pung tugas tu. 7 Jadi, apa yang kamong musti kasi par samua orang, kasi akang. Beta pung maksud, kamong musti bayar pajak apa sa par orang yang pung hak par tarima akang. Kamong musti taru hormat par orang-orang yang pegang parenta, yang pung hak par dapa hormat.
Baku sayang satu deng laeng
13:8-14
8 Jang bautang par sapa sa. Kalo kamong ada pung utang, kamong musti kasi lunas akang. Mar yang paleng panting tu, kamong musti baku sayang satu deng laeng. Anggap sa itu tu kamong pung utang par orang laeng yang kamong musti bayar akang tarus-tarus. Barang, sapa yang sayang orang laeng, dia tu su biking atorang-atorang samua dalang Kitab Torat. 9 Tagal, Kitab Torat ada bilang bagini, “Jang maeng serong, jang bunu orang, jang pancuri, deng jang baringing.”* Atorang-atorang tu deng atorang-atorang yang laeng lai, akang pung dasar ada dalang atorang satu ni yang bilang, “Sayang orang laeng macang deng ale sayang ale pung diri sandiri.”* 10 Sapa yang sayang orang laeng, dia pasti seng biking apapa yang jahat par dong. Jadi sapa yang sayang orang laeng, dia tu su biking atorang-atorang samua dalang Kitab Torat.
11 Kamong musti biking apa yang beta baru bilang tu labe sunggu-sunggu lai, tagal kamong tau kalo sakarang ni akang pung waktu par kamong musti bangong lakas dari kamong pung tidor. Barang, waktu par Tuhan mau bale kombali par kasi salamat katong su labe dekat dari waktu katong partama kali parcaya Yesus. 12 Katong pung waktu di dunya ni su amper abis la seng lama lai Tuhan su mau datang. Akang sama deng malang yang su mau abis la seng lama lai su mau siang. Jadi, jang biking kajahatang lai, macang deng orang yang masi hidop dalang galap. La mari katong biking hal-hal yang bae macang deng orang yang hidop dalang tarang, tagal akang tolong katong par lawang hal-hal yang jahat. Kalo katong biking bagitu, katong macang deng tantara yang bawa dong pung senjata par lawang dong pung musu-musu. 13 Mari katong biking hal-hal yang batul, sama deng orang yang ada dalang siang tarang. Jang pesta pora deng jang minong-mabo. La jang maeng serong deng jang iko kamong pung napsu par biking yang kurang-kurang ajar. Jang baku bakalai deng jang mangiri orang laeng. 14 Mar, labe bae katong iko Tuhan Yesus Kristus pung tabiat hidop. La jang paskali pikir soal bagemana kamong bisa kasi puas kamong pung tabiat hidop yang bardosa tu pung napsu.