Katong bisa baku bae kombali deng Allah tagal Yesus Kristus su mati par tabus katong pung dosa
5:1-11
5
1 Basudara e! Allah bilang kalo katong su jadi batul di muka Antua tu tagal katong parcaya Yesus. Tagal itu, katong bisa hidop dame deng Allah tagal apa yang katong pung Tuhan Yesus Kristus su biking. 2 Tagal apa yang Kristus biking tu, jalang tabuka par katong par tarima Allah pung hati bae tarus dalang katong pung hidop, asal katong parcaya. La katong pung hati paleng sanang tarus tagal katong batul-batul harap kalo Allah nanti biking katong pung tabiat jadi sama deng Antua pung tabiat. 3 Mar bukang cuma itu sa. Katong pung hati jua paleng sanang waktu katong susa deng sangsara, tagal katong tau kalo susa deng sangsara biking katong tahang hati. 4 Kalo katong tahang hati, akang biking Allah pung hati sanang. La kalo katong pung kalakuang tu biking Allah pung hati sanang, akang biking katong labe taru harap par Antua. 5 Kalo katong taru harap par Allah, katong seng malu. Barang, katong bisa rasa Antua pung sayang yang Antua kasi batambong-tambong dalang katong pung hati, tagal Antua su kasi Antua pung Roh par katong.6 Katong seng kuat par tolong katong pung diri par kaluar dari dosa. Mar justru waktu itu, Kristus mati par tabus katong orang-orang yang seng dengar-dengarang Antua. Deng cara bagitu katong tau kalo Antua sayang katong. 7 Seng gampang orang mau mati par bela orang laeng, biar kata orang laeng tu hidop iko atorang Torat samua lai. Mar, mangkali ada orang yang mau mati par bela orang yang hidop bae deng orang laeng. 8 Mar, Allah labe dari itu. Waktu katong masi ada dalang dosa, Yesus Kristus mati par tabus katong pung dosa-dosa. Deng cara itu, Allah kasi unju kalo Antua paleng sayang katong. 9 Jadi kalo Yesus su mati par tabus katong yang parcaya pung dosa-dosa, Antua jua nanti pasti kasi salamat katong dari Allah pung morka. Barang, sakarang ni Allah su bilang kalo katong su jadi batul di muka Antua, tagal Yesus pung dara su tatumpa par tabus katong. 10 Barang, waktu katong masi jadi Allah pung musu sa, Antua pung Ana Yesus su mati par buka jalang biar katong bisa baku bae deng Antua. Apalai sakarang ni waktu katong su baku bae deng Antua? Antua pasti kasi salamat katong dari Antua pung morka, tagal Antua pung Ana su hidop kombali. 11 Deng bukang itu sa. Katong jua paleng sanang tagal lewat apa yang katong pung Tuhan Yesus Kristus biking, katong bisa baku bae deng Allah.
Allah pung hati bae par manusia lewat Yesus Kristus labe dari dosa yang Adam biking
5:12-21
12 Basudara e! Dosa mulai ada di dunya waktu satu orang biking dosa. Dia tu Adam. Tagal dia pung dosa tu, dia mati.* Bagitu lai deng samua orang dalang dunya ni. Dong nanti mati tagal samua orang jua su biking dosa. 13 Barang, dolo waktu Allah balong kasi Hukum Torat lai, manusia di dunya ni su biking dosa. Mar, Allah balong tuntut manusia tagal dong pung dosa tu, tagal Antua balong kasi Hukum Torat. 14 Mar biar kata bagitu, dari jamang Adam sampe Musa, samua orang pasti mati, biar kata dong seng langgar Tuhan pung parenta parsis macang deng Adam. Adam tu, katong bisa banding dia deng satu Orang yang datang dari balakang, yang nama Yesus. 15 Mar, apa yang Adam biking deng apa yang Yesus biking tu batul-batul beda. Allah pung hati bae yang Antua kasi par manusia lewat Yesus tu labe dari dosa yang Adam biking. Barang, lewat satu orang yang langgar Allah pung parenta, samua orang pasti mati. Mar, Allah pung hati bae yang Antua kasi batambong-tambong par samua orang lewat satu Orang yang nama Yesus Kristus tu, akang labe basar lai. 16 Allah pung hati bae tu seng sama deng Adam pung dosa. Barang, tagal satu orang langgar Antua pung parenta, Antua putus par hukum samua orang. Mar, tagal Antua pung hati bae par banya orang yang langgar Antua pung parenta, Antua bilang kalo dong su jadi batul di muka Antua. 17 Barang, tagal satu orang langgar Allah pung parenta, samua orang pasti mati. Mar, apa yang satu Orang laeng yang nama Yesus tu su biking, akang labe hebat lai. Lewat Yesus Kristus, orang-orang yang su tarima Allah pung hati bae batambong-tambong deng yang Antua bilang kalo dong su jadi batul di muka Antua tu, dong tu nanti hidop tarus-tarus deng pegang kuasa sama-sama deng Antua.
18 Jadi, tagal satu orang langgar Allah pung parenta, samua orang dapa hukum. Bagitu lai, tagal satu Orang biking apa yang batul iko Allah pung mau, jalang tabuka par samua orang biar dong bisa jadi batul di muka Antua deng biar dong bisa hidop tarus-tarus deng Antua. 19 Jadi, tagal satu orang seng dengar-dengarang Allah pung parenta, banya orang jadi bardosa. Bagitu jua, tagal satu Orang dengar-dengarang Allah pung parenta, banya orang bisa jadi batul di muka Antua.
20 Allah kasi Hukum Torat biar manusia bisa tau kalo dong pung dosa tu banya. Mar, biar kata manusia labe hari labe tamba biking dosa, Allah pung hati bae par manusia labe hari labe tamba banya lai. 21 Jadi, memang dolo dosa parenta katong macang deng bos parenta dia pung jongos. Tagal dosa katong samua musti mati. Mar sakarang, Allah pung hati bae yang pegang kuasa dalang katong pung hidop. Tagal Antua pung hati bae tu, katong bisa jadi batul di muka Antua deng nanti hidop tarus-tarus deng Antua. Ini bisa jadi tagal apa yang Tuhan Yesus Kristus yang katong somba tu su biking.