Abraham jadi batul di muka Allah tagal dia parcaya
4:1-25
4
1 Mari lia katong pung moyang Abraham. Kira-kira, apa yang biking sampe Allah bilang kalo dia tu batul di muka Antua? 2 Abraham seng bisa jadi batul di muka Allah tagal apa yang dia biking. Kalo memang bisa, dia ada pung alasang par bicara mangarti, mar bukang di muka Allah. 3 Barang, dalang Allah pung Tulisang ada bilang kata, “Abraham parcaya Allah, tagal itu sampe Antua bilang kalo dia tu orang yang batul di muka Antua.”*4 Conto bagini: Kalo ada orang yang karja, dia tantu nanti dapa gaji. Gaji tu bukang hadia, mar dia pung hak yang dia musti dapa tagal dia pung usaha. 5 Mar, seng ada orang yang bisa jadi batul di muka Allah tagal dia pung usaha sandiri par biking apa yang bae. Dia musti parcaya Allah baru Antua bilang kalo dia tu su batul di muka Antua. Barang, Antua tu Allah yang biking orang-orang yang seng iko Antua pung mau biar dong batul di muka Antua. Jadi, itu macang deng hadia dari Antua par dia, bukang hak yang dia musti dapa. 6 Daud jua bilang kata orang yang paleng untung tu orang yang Allah bilang kalo dia tu batul, bukang tagal apa yang dia biking. Daud bilang kata,
7 “Orang-orang yang dong pung sala dapa kasi ampong
deng dong pung dosa-dosa dapa basu barsi, dong tu paleng untung.
8 Manusia sapa yang Tuhan seng inga-inga dia pung dosa lai, dia tu paleng untung.”*
9 Yang Daud maksud deng orang yang paleng untung tu bukang cuma orang Yahudi yang iko atorang par dapa sunat tu sa, mar orang bukang Yahudi yang seng iko atorang par dapa sunat tu lai. Barang, beta su bilang kamuka kata Abraham jadi batul di muka Allah tu tagal dia parcaya Antua. 10 Dia jadi batul di muka Allah tu apa tempo? Waktu dia balong sunat ka su abis sunat? Dia jadi batul di muka Allah tu waktu dia balong sunat. 11 Jadi Abraham parcaya kamuka do baru dapa sunat. Sunat tu cuma sama deng cap yang Allah kasi par dia. Antua kasi akang par jadi tanda kalo dia tu orang yang batul di muka Antua tagal dia parcaya. Tagal dia pung parcaya tu, dia jadi bapa par samua orang bukang Yahudi yang parcaya. Barang, dong jua parcaya Allah macang deng dia la su jadi batul di muka Allah, biar kata dong seng dapa sunat.* 12 Dia jua jadi bapa par orang-orang Yahudi yang dapa sunat. Beta pung maksud, dia jadi bapa par dong, bukang cuma tagal dong dapa sunat sa, mar tagal dong jua parcaya macang deng katong pung moyang Abraham waktu dia balong dapa sunat.
13 Barang, bukang tagal dia biking atorang Torat sampe Allah janji kata Antua nanti kasi dunya ni par dia deng dia pung anana cucu. Mar, tagal dia parcaya Allah sampe Antua bilang kalo dia tu batul di muka Antua.* 14 Barang, kalo sapa sa bisa tarima apa yang Allah su janji tu tagal biking atorang Torat, itu pung arti parcuma sa dia parcaya Allah la Antua pung janji par Abraham tu jua seng pung arti apapa. 15 Beta bilang bagini tagal seng ada orang yang bisa biking atorang Torat samua. Ini yang biking sampe Allah morka la hukum dong. Mar kalo seng ada atorang Torat tu, pasti seng ada atorang yang orang langgar.
16 Tagal itu, Allah kasi apa yang Antua janji tu cuma tagal katong parcaya, biar jelas kalo katong bisa dapa akang cuma tagal Antua pung hati bae. Antua kasi akang par Abraham pung anana cucu samua. Dia pung anana cucu tu bukang cuma orang Yahudi yang iko atorang Torat sa, mar orang-orang bukang Yahudi yang parcaya lai, sama deng Abraham yang parcaya. Barang, dia tu bapa par katong samua yang parcaya, 17 sama deng Allah pung kata-kata par dia kata, “Beta su biking ale jadi bapa par banya bangsa.”* Di muka Allah, Abraham jadi bapa par katong samua, tagal dia parcaya Antua yang kasi hidop orang-orang mati deng yang biking apa yang balong ada jadi ada cuma deng bilang sa.
18 Waktu itu, seng ada alasang par Abraham par harap kata dia masi bisa pung ana. Mar, dia tetap taru harap par Allah deng parcaya Antua pung janji tu. Ini yang biking sampe dia jadi bapa par banya bangsa, sama deng apa yang Allah bilang par dia kata, “Ale pung anana cucu nanti banya macang bintang-bintang di langit.”* 19 Dia tetap taru harap kalo Allah nanti kasi ana par dia, biar kata dia tau kalo dia su talalu tua par pung ana tagal dia su amper saratus taong deng kalo Sara jua seng bisa pung ana. 20 Mar dia tetap parcaya kata Allah bisa biking apa yang Antua su janji. Dia seng tagoyang sadiki lai, mala labe tamba parcaya Allah deng puji-puji Antua. 21 Dia biking bagitu tagal dia batul-batul parcaya kalo Allah pung kuasa par biking apa yang Antua su janji. 22 Tagal itu sampe Allah bilang kalo dia tu orang yang batul di muka Antua.* 23 Apa yang tatulis soal Abraham kata, “Allah bilang kalo dia tu orang yang batul di muka Antua”, akang bukang cuma par Abraham sa, 24 mar par katong samua lai. Antua nanti bilang kalo katong samua ni su jadi batul di muka Antua, tagal katong parcaya Antua yang kasi hidop katong pung Tuhan Yesus kombali dari kamatiang. 25 Allah su kasi biar Yesus mati par tabus katong pung dosa-dosa deng su kasi hidop Antua kombali biar Allah bisa bilang kalo katong ni su jadi batul di muka Antua.