Allah putus manusia pung parkara deng batul
3:1-8
3
1 Kalo sunat seng biking katong baku bae deng Allah, sunat tu pung untung apa? La jadi orang Yahudi tu pung untung apa? 2 Tantu jadi orang Yahudi tu pung untung banya. Yang paleng panting tu, Allah parcaya dong par tarima Antua pung kata-kata. 3 Kalo bagitu, bagemana deng orang Yahudi yang su janji mau dengar-dengarang, mar seng biking apa yang dong su janji tu? Jang sampe tagal dong pung kalakuang tu Allah seng biking apa yang Antua janji lai? 4 Seng sama sakali! Apa yang Allah bilang tu batul, biar kata manusia sapa sa tukang parlente.* Ini sama deng apa yang Allah pung Tulisang bilang,“Tuhan Allah pung kata-kata samua tu batul.
Biar kata manusia tudu Antua, laste dong musti mangaku kalo Antua tu batul.”*
5 Mar, mangkali ada dari orang Yahudi yang cari-cari alasang par biking dosa la bilang kata, “Ada akang pung untung kalo katong biking apa yang seng batul, tagal deng bagitu samua orang bisa lia kalo Allah tu batul. Kalo dari katong pung dosa, samua orang bisa lia deng jelas kalo Allah tu batul, mangapa kong Antua masi morka deng hukum katong?” Mar basudara e, itu cuma manusia pung pikirang sa. 6 Jang paskali pikir macang bagitu! Kalo Allah seng hukum katong tagal katong pung dosa, bagemana kong Antua bisa putus manusia di dunya ni pung parkara? Batul ka seng?
7 Mar, mangkali ada orang jua yang cari-cari alasang par biking dosa la bilang, “Ada akang pung untung kalo beta bicara parlente, tagal deng beta pung parlente tu samua orang bisa lia kalo Allah tu batul la puji-puji Antua tagal Antua seng parlente. Jadi, mangapa kong Antua masi hukum beta tagal beta pung dosa tu?” 8 Sio basudara e, kalo katong pikir bagitu, itu sama sa deng katong bilang, “Mari katong biking kajahatang biar katong bisa dapa lia apa yang bae.” Ada orang yang obral katong di balakang-balakang kata katong ajar macang bagitu. Mar, orang macang bagitu pantas par dapa hukum dari Allah.
Seng ada satu orang lai yang batul di muka Allah
3:9-20
9 Jadi kalo bagitu, katong orang-orang Yahudi ni labe bae dari bangsa laeng? Seng sama sakali. Beta su kasi unju tadi kalo orang Yahudi ka orang bukang Yahudi ka, samua orang su dapa parenta dari dosa. 10 Ini sama deng apa yang tatulis dalang Allah pung Tulisang kata,
“Seng ada satu orang lai yang batul di muka Allah,
seng satu lai.
11 Seng ada satu orang lai yang mangarti Allah,
Seng satu lai yang mau tau soal Allah.
12 Samua orang su bale balakang dari Allah,
la dong samua pung hidop seng ada pung guna par Allah.
Seng ada satu orang lai yang biking apa yang bae,
seng satu lai.*
13 Dari dong pung mulu kaluar kata-kata yang busu, macang deng kubur yang tabuka,
la dong pung lida taputar par parlente putar bale.*
Dong pung kata-kata macang deng racong ular.*
14 Dong tinggal kong pake dong pung mulu tu par sumpa deng hina orang.*
15 Dong paleng capat paskali par pi kasi putus orang pung nyawa.
16 Ka mana sa dong pi, dong kasi ancor deng biking susa orang
17 la dong seng tau hidop dame deng orang.*
18 Dong seng taku deng seng taru hormat par Tuhan Allah.”*
19 Katong tau kalo apa yang Kitab Torat tu bilang, itu labe kusus par orang Yahudi yang tau atorang-atorang Torat tu. Jadi jelas kalo seng ada satu orang lai yang bisa buka mulu par kasi alasang kata dia seng bardosa. Samua orang di dunya ni nanti badiri di muka Allah par tanggong jawab samua yang dong biking. 20 Jadi, seng ada orang yang batul di muka Allah tagal dia iko atorang-atorang Torat. Mala dari atorang-atorang tu, manusia bisa sadar kalo dia tu bardosa.
Manusia jadi batul di muka Allah cuma kalo parcaya Yesus Kristus
3:21-31
21 Mar sakarang, Allah su buka jalang biar katong bisa jadi batul di muka Antua. Kitab Torat deng Allah pung juru-juru bicara pung tulisang jua su bilang soal jalang tu. Allah bilang kalo katong jadi batul di muka Antua bukang tagal iko atorang-atorang Torat, 22 mar katong jadi batul di muka Antua tagal parcaya Yesus Kristus.* Itu jadi par samua orang yang parcaya Antua. Di muka Allah samua orang sama, 23 tagal samua orang su bardosa deng su jau dari Antua yang hebat deng luar biasa tu.a 24 La tagal Allah pung hati bae sa sampe Antua bilang kalo samua orang yang parcaya tu su jadi batul di muka Antua. Antua biking bagitu deng cuma-cuma tagal Yesus Kristus su mati par tabus katong dari dosa-dosa. 25 Allah su pili Yesus Kristus par mati ganti katong par tabus katong pung dosa-dosa. Antua kasi tumpa Antua pung dara di kayo salib biar katong bisa baku bae deng Allah, asal katong parcaya Antua. Waktu Kristus balong datang ka dunya ni, Antua sabar tarus par seng hukum manusia yang bardosa. Mar itu bukang pung arti kalo Antua seng biking apa yang batul. Antua hukum Yesus ganti katong yang bardosa par kasi unju kalo Antua biking apa yang batul. 26 Deng Yesus pung kamatiang, Allah kasi unju kalo Antua biking apa yang batul. Antua jua kasi unju kalo katong su jadi batul tagal katong parcaya Yesus.
27 Kalo bagitu, katong seng ada pung alasang lai par bicara mangarti. Barang, katong seng bisa jadi batul di muka Allah tagal apa yang katong biking, mar tagal parcaya Yesus. 28 Jadi katong bisa bilang, manusia jadi batul di muka Allah tu tagal parcaya Yesus, bukang tagal biking atorang-atorang Torat. 29 Coba pikir, Allah tu par orang Yahudi sa ka par orang bukang Yahudi lai? Memang batul, Antua tu jua Allah par orang bukang Yahudi. 30 Barang, Allah tu cuma satu. Antua tu yang bilang orang Yahudi su jadi batul tagal dong parcaya Yesus, deng yang jua bilang orang bukang Yahudi su jadi batul tagal dong parcaya Yesus.
31 Kalo bagitu, mangkali ada orang yang tanya kata, tagal katong su parcaya Yesus jadi katong seng parlu taru kira atorang-atorang Torat lai? Seng sama sakali! Justru katong pung parcaya par Yesus tu bukti kalo katong biking apa yang atorang-atorang Torat tu maksud.