Allah nanti hukum samua orang yang biking dosa
2:1-16
2
1 Basudara e, tagal Allah nanti hukum samua orang yang biking kajahatang, kamong seng ada pung alasang par kasi sala orang laeng, tagal kamong jua biking sala sama deng dong. Jadi sabang kali kamong kasi sala orang laeng, itu pung arti kamong jua su minta Allah par kasi hukumang par kamong pung diri sandiri. 2 Katong tau kalo Allah putus orang-orang yang biking kajahatang pung hukumang tu, Antua putus deng batul. 3 Jadi kalo kamong kasi sala orang laeng, sapa tau kamong sandiri biking hal yang sama deng yang dong biking, masa kamong pikir kata kamong bisa lari dari Allah pung hukumang? 4 Ka, jang sampe kamong anggap enteng Allah pung hati bae deng sabar yang seng abis-abis par kamong tu kapa? Ka, jang sampe kamong seng tau kata Antua kasi unju Antua pung hati bae par kamong tu biar kamong kasi tinggal kamong pung dosa-dosa?5 Mar kamong kapala batu deng seng mau kasi tinggal kamong pung dosa-dosa. Tagal itu, kamong ada biking kamong pung hukumang tamba barát waktu dunya kiamat, waktu Allah kasi unju Antua pung morka deng putus manusia pung hukumang deng seng barát sabala. 6 Waktu itu, Allah nanti balas satu-satu iko apa yang dia su biking.* 7 Orang-orang yang biking bae tarus tagal mau dapa puji deng hormat dari Allah, deng mau hidop tarus-tarus deng Antua, Antua nanti biking dong hidop tarus-tarus deng Antua. 8 Mar orang-orang yang cuma tinggal kong pikir diri sandiri deng seng mau dengar-dengarang Allah pung ajarang yang batul mar biking apa yang jahat tarus, Antua nanti morka deng hukum dong. 9 Sapa sa yang biking kajahatang, orang Yahudi ka bukang Yahudi ka, dia nanti paleng susa deng sangsara. 10 Mar sapa sa yang biking apa yang bae, orang Yahudi ka bukang Yahudi ka, dia nanti dapa puji deng hormat dari Allah la Antua nanti biking dong pung hati dame. 11 Allah biking bagitu tagal Antua seng lia-lia muka.*
12 Samua orang bukang Yahudi yang biking dosa, dong nanti dapa lempar dalang naraka biar kata dong seng tau apapa soal atorang-atorang dalang Kitab Torat. La samua orang Yahudi yang tau atorang-atorang Torat tu mar langgar akang, Allah nanti pake akang par hukum dong. 13 Barang, bukang orang yang dengar atorang-atorang Torat yang bisa jadi batul di muka Allah, mar orang yang biking akang. 14 Memang, orang bukang Yahudi seng tau apapa soal atorang-atorang Torat. Mar kalo dong pung hati bilang dong par biking apa yang atorang-atorang Torat tu mau, itu pung arti dong pung hati tu jadi macang deng atorang-atorang Torat par dong, biar kata dong seng tau apapa soal atorang-atorang Torat tu. 15 Apa yang dong biking tu kasi unju kalo atorang-atorang Torat tu ada dalang dong pung hati. La dong pung hati kacil jua kasi tau par dong kata apa yang dong biking tu sala ka batul. 16 La waktu dunya su mau kiamat, Allah nanti kasi kuasa par Yesus Kristus par putus manusia pung parkara sampe ka samua yang tasambunyi dalang hati. Itu yang beta salalu kasi balajar waktu kasi tau Kabar Bae par kamong.
Atorang-atorang Torat deng sunat seng kasi salamat orang Yahudi
2:17-29
17 La bagemana deng basudara orang Yahudi? Kamong bilang kalo kamong tu orang Yahudi. Kamong taru harap par atorang-atorang Torat biar kamong bisa jadi batul di muka Allah, deng kamong bicara mangarti tagal kamong rasa kata kamong dekat deng Allah. 18 Kamong tau apa yang Antua mau deng tau mana yang bae deng mana yang seng tagal kamong balajar akang dari atorang-atorang Torat. 19 Kamong anggap kalo kamong tu macang deng orang yang bawa jalang par orang buta deng macang deng tarang par orang-orang yang ada dalang galap. 20 Kamong anggap kamong pung diri tu orang yang kasi balajar orang bodo deng guru par anana kacil. Kamong anggap kamong pung diri macang bagitu, tagal kamong ada pung Hukum Torat la dari situ kamong tau samua-samua deng mangarti ajarang-ajarang yang batul. 21 Jadi kalo kamong ajar orang laeng, yo mangapa kong kamong seng ajar kamong pung diri sandiri? Kamong ajar orang par jang pancuri, mar mangapa kong kamong sandiri pancuri? 22 Kamong ajar orang par jang tidor deng orang yang bukang dong pung laki ka bini, mar mangapa kong kamong sandiri tidor deng orang yang bukang kamong pung laki ka bini? Kamong yang bilang kalo kamong seng bole paskali par somba patong-patong, mangapa kong kamong sandiri pancuri apa yang ada dalang tampa somba patong-patong tu? 23 Kamong bicara mangarti soal atorang-atorang Torat yang Allah kasi, mar mangapa kong kamong sandiri hina Antua deng cara langgar atorang-atorang dalang Kitab Torat tu? 24 Kamong sama deng apa yang tatulis dalang Allah pung Tulisang kata, “Tagal kamong, bangsa-bangsa laeng yang bukang Yahudi hojat Allah.”*
25 Kamong iko Allah pung parenta par dapa sunat par jadi tanda kalo kamong tu Allah pung orang-orang. Kamong pung sunat tu ada pung arti kalo kamong iko atorang-atorang Torat tu. Mar kalo kamong langgar akang, kamong pung sunat tu seng ada pung arti apapa, jadi kamong sama sa deng seng dapa sunat. 26 Jadi kalo orang bukang Yahudi yang seng dapa sunat tu biking apa yang atorang-atorang Torat minta, itu sama sa deng dong tu macang deng orang yang su dapa sunat. 27 Kamong dapa sunat deng ada pung atorang-atorang dalang Kitab Torat yang tatulis, mar kamong langgar atorang-atorang tu. Dong memang seng dapa sunat, mar dong biking apa yang atorang-atorang Torat minta. Dong pung kalakuang tu kasi unju kamong pung sala. 28 Barang, orang yang batul yang jadi Allah pung orang-orang tu bukang cuma orang yang pung dara Yahudi deng bukang cuma yang ada tanda sunat di dong pung badang sa. 29 Orang Yahudi yang batul tu orang yang batul-batul Yahudi dalang dia pung hati. La sunat yang batul tu Allah roba orang pung hidop jadi baru.* Itu bisa jadi tagal Allah pung Roh karja dalang dia pung hati, bukang tagal dia iko atorang-atorang Torat. Orang yang macang bagitu tu, dia dapa puji dari Allah, bukang dari manusia.