Paulus pung Surat par Jamaat di
Roma
Tabea
1:1-7
1
1 Par basudara samua di kota Roma.Tabea! Surat ni dari beta Paulus. Beta ni Yesus Kristus pung jongos, yang dapa panggel par jadi Antua pung utusang deng yang dapa pili par kasi tau Kabar Bae dari Allah. 2 Kabar Bae tu, Antua su janji akang dari dolo lai lewat Antua pung juru-juru bicara dalang Antua pung Tulisang. 3-4 Kabar Bae tu soal Antua pung Ana Yesus Kristus, yang jadi katong pung Tuhan tu. Antua lahir jadi manusia dari Raja Daud pung turunang. Antua tu jua Allah pung Ana yang kudus sama deng Allah. Deng kuasa yang basar, Allah kasi unju kalo Yesus tu Antua pung Ana waktu kasi hidop Yesus kombali dari kamatiang. 5 Lewat Yesus, Allah kasi unju Antua pung hati bae par angka beta jadi Yesus pung utusang. Antua angka beta par hentar orang-orang dari samua bangsa biar dong parcaya Antua la dengar-dengarang Antua, biar Antua dapa puji. 6 La kamong jua su dapa panggel par jadi Yesus Kristus pung orang-orang.
7 Surat ni par kamong samua yang Allah sayang, yang tinggal di Roma deng yang dapa panggel par jadi Antua pung orang-orang. Beta minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.
Paulus inging paskali par pi ka Roma
1:8-15
8 Basudara e! Beta mau bilang ini kamuka kalo lewat Yesus Kristus, beta minta dangke banya-banya dari Allah tagal kamong samua. Barang, kamong parcaya Yesus la banya orang di antero dunyaa su dengar soal akang. 9 Beta karja deng hati antero-antero par Allah par kasi tau Kabar Bae soal Antua pung Ana. Antua jadi saksi kalo sabang kali beta sombayang, beta salalu sombayang par kamong. 10 Beta salalu sombayang biar Antua buka jalang biar seng lama lai beta bisa pi lia kamong.
11 Beta rindu baku dapa kamong, biar beta bisa bage berkat-berkat dari Allah pung Roh par kasi kuat kamong pung parcaya. 12 Beta pung maksud tu, tagal katong sama-sama parcaya Kristus, beta bisa kasi kuat kamong la kamong jua bisa kasi kuat beta, biar katong sama-sama labe tamba parcaya Antua.
13 Beta mau kamong tau basudara e, kalo banya kali beta su rencana par datang lia kamong, mar sampe oras ni ada sa yang biking beta balong bisa pi ka situ.* Beta mau datang biar beta bisa hentar orang yang balong parcaya Kristus par parcaya Antua, sama deng yang beta su biking par orang bukang Yahudi di tampa laeng lai. 14 Barang, beta rasa macang kata beta ada pung utang par orang yang tinggal di daera yang labe maju ka yang tinggal di balakang-balakang tana, orang yang sakola ka seng sakola. 15 Itu mangapa kong beta inging paskali par pi kasi balajar Kabar Bae tu par kamong di Roma lai.
Tuhan Allah morka manusia yang biking kajahatang
1:16-32
16 Beta seng malu par kasi tau Kabar Bae ni. Barang, beta tau kalo Allah pung kuasa karja deng luar biasa lewat Kabar Bae tu par kasi salamat samua orang yang parcaya, bukang cuma orang Yahudi yang tarima Kabar Bae tu kamuka sa mar orang bukang Yahudi lai. 17 Beta bilang bagini tagal Kabar Bae tu kasi unju cara biar manusia bisa jadi batul di muka Allah. Akang pung cara tu cuma satu: Manusia musti parcaya Allah. Seng ada cara laeng. Ini sama deng apa yang tatulis dalang Allah pung Tulisang, “Orang yang batul di muka Allah tagal dia parcaya Antua, dia nanti hidop tarus-tarus deng Antua.”*
18 Allah kasi unju dari sorga kalo Antua morka samua orang yang seng iko Antua pung mau deng yang biking kajahatang. Barang, dong pung kajahatang tu biking sampe orang laeng seng kanal ajarang yang batul. 19 Apa yang manusia bisa tau soal Allah tu su jelas paskali par dong, tagal Antua su kasi unju akang tarang-tarang par dong. 20 Barang, biar kata manusia seng bisa lia Allah, mar dari waktu Antua biking dunya ni lai, Antua su kasi unju Antua pung tabiat par manusia biar dong bisa lia akang tarang-tarang. Beta pung maksud bagini: Dong bisa lia Antua pung kuasa yang ada tarus-tarus deng tau kalo Antua tu Allah, waktu dong lia samua yang Antua biking di dunya ni. Jadi, seng ada orang yang bisa alasang kata dong seng tau soal Allah.
21 Biar kata dong tau soal Allah, mar dong seng taru hormat par Antua deng seng minta dangke dari Antua. Mala, dong seng inga Antua lai mar pikir soal hal-hal yang tar ada guna. Dong pung hati yang bodo tu jua jadi galap sampe dong seng bisa mangarti Antua pung mau lai. 22 Dong bilang kata dong tu pung pikirang tajang, mar sapa tau bagini dong tu paleng bodo. 23 Dong seng somba Allah yang hebat, yang hidop tarus-tarus tu. Dong mala somba patong-patong yang dong biking sandiri, yang pung rupa macang deng manusia yang pasti mati, binatang yang tarbang, binatang yang bajalang, deng yang maraya.*
24 Tagal itu, Allah kasi biar dong par dapa parenta dari dong pung napsu jahat par biking yang kurang-kurang ajar. Deng cara bagitu, dong laeng deng laeng pake dong pung badang par biking hal-hal yang biasa biking orang jadi malu. 25 Dong bale balakang dari ajarang yang batul soal Allah la iko ajarang-ajarang yang seng batul. Dong jua puji deng somba apa yang Allah biking, bukang puji deng somba Antua yang biking akang. Antua tu yang pantas par dapa puji tarus-tarus. Amin.
26 Tagal itu, Allah kasi biar dong par dapa parenta dari dong pung napsu sampe dong su seng tau malu lai. Mala dong pung parampuang-parampuang seng napsu par tidor deng laki-laki lai, mar deng parampuang, biar kata itu seng pantas. 27 Bagitu lai deng dong pung laki-laki. Laki-laki seng napsu par tidor deng parampuang lai, mar dong mala paleng napsu par tidor deng laki-laki, biar kata itu seng pantas. Tagal itu, dong dapa hukum iko dong pung kalakuang yang seng pantas tu.
28 La tagal dong seng mau ambe pusing deng Allah lai, Antua kasi biar dong par dapa parenta dari dong pung pikirang yang rusak, sampe dong biking apa yang kalo iko batul tu seng pantas par dong biking. 29 Dong pung dalang pikirang pono deng sagala macang hal yang jahat deng yang seng batul. Dong jalus, baringing, suka biking kajahatang, deng suka kalo orang laeng cilaka. Dong laeng bunu laeng, baku tatoki kiri-kanang, suka parlente orang, deng suka carita orang. 30 Dong binci Allah, mangarti, suka biking busu orang laeng pung nama, suka hina orang, deng suka bicara tinggi-tinggi. Dong suka cari cara-cara baru par biking apa yang jahat. Dong seng dengar-dengarang dong pung orang tatua. 31 Dong pung pikirang pende, dong seng bisa pegang dong pung janji, seng sayang deng seng ada pung hati bae par orang laeng. 32 Allah su bilang kalo sapa yang biking hal-hal macang bagitu musti dapa hukum mati. Biar kata dong su tau akang, mar dong tinggal kong biking bagitu tarus. Bukang cuma itu sa, dong jua puji-puji orang yang biking akang lai.