Jang biking dosa lai
6:1-14
6
1 Basudara e! Allah su kasi ampong katong pung dosa tagal Antua pung hati bae. Jadi, jang sampe ada yang pikir kata, “Ah, kalo bagitu, labe bae katong biking dosa tarus sa biar Antua labe tamba kasi unju Antua pung hati bae par katong.” 2 Jang paskali pikir macang bagitu! Katong su kubur katong pung tabiat hidop lama yang bardosa. Itu sama sa deng katong su mati. Jadi bagemana kong katong yang su mati ni masi biking dosa tarus? 3 Ka, masa kamong lupa kalo waktu katong samua jadi satu deng Yesus Kristus waktu dapa baptis, itu sama sa deng katong su mati sama-sama deng Antua? 4 Waktu katong dapa baptis tu, itu sama sa deng katong su mati deng su dapa kubur sama-sama deng Kristus.* Itu jadi biar sama deng Kristus su hidop kombali tagal Antua pung Bapa pung kuasa yang hebat tu, katong jua bisa hidop kombali deng tabiat hidop yang baru.5 Katong su jadi satu hati deng Kristus tagal katong su mati, sama deng Antua yang su mati. Jadi, katong tau kalo katong jua nanti hidop kombali, sama deng Antua yang su hidop kombali. 6 Dolo katong suka biking dosa. Mar, katong tau kalo katong pung tabiat hidop lama tu su mati dapa salib sama-sama deng Antua. Samua tu jadi macang bagitu biar katong pung tabiat hidop lama tu seng pung kuasa par ator katong lai. Deng jalang bagitu, dosa seng parenta katong macang deng bos parenta dia pung jongos lai. 7 Barang, sapa sa yang su mati, dong su talapas dari dosa pung kuasa. 8 Jadi, kalo katong su mati sama-sama deng Kristus, katong parcaya kalo katong nanti hidop sama-sama deng Antua lai.
9 Katong parcaya macang bagitu, tagal katong tau kalo Allah su kasi hidop Kristus kombali dari kamatiang. Antua seng bisa mati lai. Kamatiang seng ada pung kuasa lai par Antua. 10 Barang, Antua mati satu kali sa par kasi kala dosa pung kuasa. Mar Antua hidop biar Allah dapa puji. 11 Bagitu lai deng kamong. Anggap sa kamong tu sama deng orang yang su mati, yang su talapas dari dosa. La kamong su hidop biar Allah dapa puji, tagal kamong su satu hati deng Yesus Kristus.
12 Jadi, jang paskali kasi biar dosa parenta kamong pung badang yang nanti ancor tu, biar kamong seng iko akang pung napsu jahat tu. 13 La jang paskali kasi bagiang apa sa dari kamong pung badang par dosa par biking kajahatang, mar kamong musti kasi kamong pung diri par Allah. Barang, dolo kamong macang deng orang yang su mati mar sakarang su hidop kombali. La kamong musti kasi samua bagiang dari kamong pung badang tu par Allah par biking samua yang batul. 14 Dosa seng bisa parenta kamong macang deng bos parenta dia pung jongos lai. Barang, kamong bisa salamat bukang tagal iko Hukum Torat, mar tagal Antua pung hati bae par kamong.
Katong ni Allah pung jongos
6:15-23
15 Basudara e! Allah kasi salamat katong dari hukumang yang katong musti tanggong tu bukang tagal katong iko atorang-atorang Torat mar tagal Allah pung hati bae sa. Jadi, katong bisa biking dosa tarus sa? Sampe ayang pung gigi batumbu jua, jang! 16 Masa kamong seng tau kata kalo kamong kasi diri par satu orang bagitu par biking apa sa yang dia mau, itu sama sa deng kamong su jadi jongos par dia, jadi kamong musti dengar-dengarang dia? Bagitu lai, kalo kamong kasi diri par biking dosa, itu sama sa deng kamong su jadi jongos par dosa tu, la dosa tu nanti hela kamong par mati tarus-tarus. Mar, kalo kamong kasi diri par dengar-dengarang Allah, itu sama sa deng kamong su jadi jongos par Antua, la Antua nanti bawa kamong par jadi batul di muka Antua. 17 Mar, beta minta dangke banya dari Allah! Dolo kamong jadi jongos par dosa, mar sakarang kamong su dengar-dengarang ajarang yang batul yang kamong su dengar tu deng hati antero-antero. 18 Allah su kasi lapas kamong dari dosa yang biking kamong jadi jongos tu. La sakarang, kamong su kasi diri par jadi Allah pung jongos par biking apa yang batul tarus. 19 Tagal kamong baru batumbu deng baakar dalang kamong pung parcaya, jadi beta pake conto soal jongos deng bos par kasi jelas ini par kamong biar kamong labe capat mangarti apa yang beta bilang ni. Dolo kamong jadi jongos par dosa tagal kamong kasi kamong pung diri par iko kamong pung sagala macang napsu jahat deng langgar Allah pung parenta. Deng cara bagitu, kamong labe hari labe tamba langgar Antua pung parenta. Jadi sakarang ni, kamong musti kasi kamong pung diri antero-antero par jadi jongos par Allah, par biking apa yang batul, biar kamong jadi Antua pung orang-orang yang seng bardosa.
20 Beta bilang bagitu tagal waktu kamong masi jadi jongos par dosa, kamong bebas par seng biking apa yang batul. 21 La kamong dapa untung apa dari itu? Seng ada, tagal samua tu biking kamong jadi malu la akang pung laste biking kamong mati tarus-tarus. 22 Mar sakarang, waktu kamong su lapas dari dosa deng su jadi jongos par Allah, kamong dapa untung basar. Kamong pung untung tu: Antua su biking kamong jadi Antua pung orang-orang yang seng bardosa la akang pung laste, kamong hidop tarus-tarus deng Antua. 23 Barang, tagal dosa, katong mati tarus-tarus. Mar tagal Allah pung hati bae, katong hidop tarus-tarus tagal katong satu hati deng Tuhan Yesus Kristus yang katong somba.