Katong seng taika deng Hukum Torat lai, sama deng parampuang yang seng taika lai deng dia pung laki yang su mati
7:1-6
7
1 Basudara e! Jang sampe kamong seng tau kapa kalo Hukum Torat tu cuma bisa ator satu orang pung hidop waktu dia masi hidop? Kamong pasti tau, tagal beta ada bicara deng kamong yang tau Hukum Torat tu. 2 Conto bagini: Parampuang yang su kaweng, dia taika deng dia pung laki waktu dia pung laki tu masi hidop. Mar waktu dia pung laki tu su mati, dia bebas dari hukum yang ika dia deng dia pung laki. 3 Jadi, kalo dia kaweng deng laki-laki laeng waktu dia pung laki tu masi hidop, itu dia su maeng serong. Mar kalo dia pung laki tu su mati, dia bebas dari hukum yang ika dia tu. La kalo dia kaweng deng laki-laki laeng, itu dia seng maeng serong.4 Bagitu jua deng kamong basudara e! Kamong jua seng taika deng Hukum Torat tu lai, tagal waktu Kristus mati di kayo salib, katong samua macang kata su mati sama-sama deng Antua. Sakarang katong su jadi orang laeng pung, macang kata parampuang yang su kaweng kombali la jadi orang laeng pung, abis dia pung laki yang partama tu mati. Beta pung maksud, sakarang katong su jadi Kristus yang su dapa kasi hidop kombali tu pung orang-orang. Katong jadi Antua pung orang-orang biar katong bisa biking apa yang bae biar Allah dapa puji. 5 Barang, dolo waktu katong masi hidop iko katong pung tabiat hidop lama yang bardosa tu pung mau, katong biking apa sa iko katong pung napsu jahat tu pung mau. Katong su tau kalo Hukum Torat tu larang katong par biking bagitu, mar itu justru biking katong labe tamba inging biking akang. La tagal itu, katong biking kajahatang sampe katong tapisa dari Allah tarus-tarus. 6 Mar sakarang, katong su seng taika deng Hukum Torat tu lai. Barang, katong macang kata su mati sama-sama deng Kristus la su lapas dari Hukum Torat yang ika katong tu. Jadi, sakarang katong seng hidop par Allah deng cara lama iko Hukum yang tatulis tu, mar deng cara baru. Cara baru tu, katong hidop iko Antua pung Roh pung mau.
Hukum Torat tu kasi unju manusia pung dosa
7:7-12
7 Kalo bagitu, atorang-atorang Torat tu seng bae tagal akang biking orang bardosa? Seng sama sakali! Justru tagal atorang Torat, beta sandiri bisa tau kata dosa tu apa. Conto bagini: Kalo atorang Torat tu seng bilang kata, “Jang baringing!”,* beta seng tau kata baringing tu dosa. 8 Mar waktu beta tau atorang tu, dosa pung kuasa mala pake akang par buju beta par labe tamba baringing deng saribu satu macang hal. Jadi kalo seng ada atorang tu, dosa pung kuasa seng bisa buju beta lai. 9 Dolo waktu beta balong batul-batul tau apa yang Hukum Torat tu mau, beta pikir beta hidop deng batul. Mar waktu beta balajar soal atorang-atorang dalang Hukum Torat tu, beta rasa inging paskali par biking dosa, 10 deng sadar kalo beta su tapisa dari Allah. Atorang-atorang yang kalo iko batul tu musti biking beta hidop tarus-tarus deng Antua, akang justru biking beta tapisa dari Antua. 11 Barang, dosa pung kuasa pake atorang tu par biking beta tapisa dari Allah deng parlente beta kata kalo biking akang beta bisa salamat. 12 Jadi, Hukum Torat tu memang datang dari Allah, la akang pung atorang-atorang tu jua datang dari Allah, jadi akang batul deng bae.
Manusia seng mustahak par biking apa yang batul
7:13-25
13 Jang sampe kamong pikir kalo atorang-atorang Torat yang bae tu bisa biking beta tapisa dari Allah tarus-tarus. Seng sama sakali! Dosa pung kuasa pake apa yang bae tu par biking beta tapisa dari Allah tarus-tarus, biar beta bisa lia kalo dosa tu memang dosa. Jadi, lewat atorang-atorang tu, beta bisa tau kalo dosa tu paleng jahat. 14 Katong tau kalo atorang-atorang Torat tu dari Allah pung Roh, mar beta ni cuma manusia yang seng mustahak par biking apa yang batul. Beta sama deng orang yang su dapa jual par jadi dosa pung jongos.
15 Beta sandiri bingong deng apa yang beta biking. Barang, beta seng biking apa yang bae yang beta inging biking tu, mar justru biking apa yang jahat yang beta binci tu.* 16 Kalo beta biking apa yang jahat biar kata beta seng inging biking akang, itu pung arti beta mangaku kalo atorang-atorang Torat tu bae. 17 Jadi, itu macang kata bukang beta yang biking bagitu, mar dosa pung kuasa yang ada dalang beta pung diri tu yang biking sampe beta biking akang. 18 Barang, beta tau kalo seng ada satu lai yang bae dalang beta pung diri, dalang beta pung tabiat hidop yang bardosa ni. Beta memang inging biking apa yang bae, mar beta seng mustahak par biking akang. 19 Deng kata laeng, beta seng biking apa yang bae yang beta inging biking tu, mar justru biking apa yang jahat yang beta seng inging biking tu. 20 Jadi, kalo beta biking apa yang beta seng inging biking tu, itu pung arti bukang beta yang biking akang, mar dosa pung kuasa yang ada dalang beta pung diri yang biking sampe beta biking akang.
21 Tagal samua tu, beta tau apa yang jadi dalang beta pung diri: Biar kata beta inging biking apa yang bae, justru apa yang jahat tu yang beta biking. 22 Barang dalang hati, beta memang suka deng Allah pung atorang-atorang tu, 23 mar ada atorang-atorang laeng yang tinggal dalang beta pung diri, yang seng baku tamakang deng Allah pung atorang-atorang yang beta mau iko tu. Atorang-atorang laeng yang beta maksud tu dosa pung kuasa. Akang ika beta pung diri tare-tare sampe beta jaga biking dosa. 24-26 Jadi beta bisa bilang bagini: Dalang hati, beta inging paskali par biking Allah pung atorang-atorang tu, mar beta pung tabiat hidop lama yang bardosa tu biking beta tinggal kong biking dosa tarus. Cilaka beta ni! Sapa yang bisa kasi lapas beta dari dosa pung kuasa yang ada dalang beta pung diri, yang bawa beta par tapisa dari Allah tarus-tarus ni? Mar dangke banya par Allah, tagal Antua kasi lapas beta dari dosa pung kuasa tu lewat apa yang Tuhan Yesus Kristus yang katong somba tu su biking!