Hidop iko Allah pung Roh pung mau
8:1-17
8
1 Tagal itu basudara e, sakarang Allah seng hukum katong yang satu hati deng Yesus Kristus. 2 Barang lewat Yesus Kristus, Allah pung Roh pung kuasa kasi lapas katong dari dosa pung kuasa yang biking katong tapisa dari Allah tarus-tarus tu. Roh tu Roh yang biking katong pung hidop jadi baru. 3 Atorang-atorang Torat seng bisa kasi lapas katong dari dosa, tagal katong manusia pung tabiat hidop yang bardosa biking katong seng mustahak par biking atorang-atorang tu samua. Tagal itu, Allah biking akang deng cara utus Antua pung Ana datang ka dunya par jadi korbang par tabus katong dari katong pung dosa-dosa. Waktu Ana tu datang, Dia sama deng manusia yang bardosa sa, cuma Dia seng biking dosa. Deng cara bagitu, Allah hukum Antua pung Ana sandiri ganti katong yang biking dosa ni. 4 Antua biking bagitu biar katong jadi orang yang batul di muka Antua, sama deng Antua pung mau yang tatulis dalang atorang-atorang Torat. Barang, katong seng hidop iko katong pung tabiat hidop lama yang bardosa tu pung mau, mar iko Allah pung Roh pung mau.5 Sapa yang hidop iko dia pung tabiat hidop yang bardosa tu pung mau, dia cuma pikir hal-hal yang jadi tabiat hidop yang bardosa tu pung mau. Mar, sapa yang hidop iko Allah pung Roh pung mau, dia cuma pikir hal-hal yang jadi Allah pung Roh pung mau. 6 Sapa yang iko dia pung tabiat hidop yang bardosa tu pung mau, dia nanti tapisa dari Allah tarus-tarus. Mar sapa yang iko Allah pung Roh pung mau, dia nanti rasa dame deng nanti hidop tarus-tarus deng Antua. 7 Sapa yang iko dia pung tabiat hidop yang bardosa tu pung mau, dia su baku musu deng Allah. Barang sapa yang biking bagitu, dia seng iko Allah pung atorang-atorang deng mala seng mustahak par biking akang. 8 Sapa yang iko dia pung tabiat hidop yang bardosa tu pung mau, dia seng bisa biking Allah pung hati sanang.
9 Mar kamong, kamong seng iko kamong pung tabiat hidop yang bardosa tu pung mau. Kamong hidop iko Allah pung Roh pung mau, kalo memang Allah pung Roh tinggal dalang kamong pung hati. Mar kalo Kristus pung Roh seng tinggal dalang satu orang pung hati, itu pung arti dia tu bukang Kristus pung orang. 10 Kalo Kristus tinggal dalang katong pung hati, biar kata satu waktu katong pung badang ni nanti mati tagal dosa,* mar Antua pung Roh nanti biking katong hidop tarus-tarus deng Allah. Ini bisa jadi tagal Allah bilang kalo katong ni su jadi batul di muka Antua. 11 Allah su kasi hidop Yesus Kristus kombali dari kamatiang lewat Antua pung Roh. Jadi, kalo Antua pung Roh tinggal dalang kamong pung hati, biar kata kamong pung badang nanti mati, Antua pasti kasi hidop kamong pung badang tu kombali lewat Antua pung Roh yang tinggal dalang kamong pung hati.
12 Jadi basudara e, tagal Allah pung Roh tinggal dalang katong pung hati, katong musti hidop iko Allah pung Roh pung mau, bukang iko katong pung tabiat hidop lama yang bardosa tu pung mau. 13 Barang, kalo katong hidop iko katong pung tabiat hidop yang bardosa tu pung mau, katong nanti tapisa dari Allah tarus-tarus. Mar, kalo katong kasi biar Allah pung Roh tolong katong biar katong barenti biking katong pung tabiat hidop tu pung mau, katong nanti hidop tarus-tarus deng Allah. 14 Sapa sa yang kasi dia pung hidop par Allah pung Roh pimping dia, dia tu Allah pung anana. 15 Barang, Allah kasi Antua pung Roh par katong bukang par biking katong jadi taku Antua, sama deng jongos yang taku dia pung bos. Mar, Antua kasi Antua pung Roh biar katong jadi Antua pung anana. La tagal Antua pung Roh tu katong bisa panggel Antua, “Sio Bapa, Bapa e!” 16 Antua pung Roh sandiri yang karja dalang katong pung hati sampe katong bisa tau kalo katong ni Antua pung anana. 17 La kalo katong ni Allah pung anana, itu pung arti katong ada pung hak par tarima harta pusaka dari Antua.* Katong nanti tarima akang sama-sama deng Kristus, asal katong susa deng sangsara sama deng Kristus biar katong jua dapa puji sama-sama deng Antua.
Allah kasi hidop yang luar biasa par katong
8:18-30
18 Beta parcaya kalo susa deng sangsara yang katong rasa sakarang ni, akang macang deng hal kacil sa kalo banding deng hidop yang luar biasa yang Allah nanti kasi par katong. 19 Barang, samua yang Allah biking di langit deng dunya ada tunggu-tunggu waktu par Antua kasi unju kalo katong yang parcaya ni Antua pung anana. 20 Barang, samua yang ada di langit deng dunya ni su dapa kutok, sampe akang seng bisa biking samua yang Antua mau. Itu jadi bukang iko akang pung mau, mar iko Antua pung mau sandiri.* 21 Mar biar kata bagitu, samua yang ada di langit deng dunya tu masi bisa harap satu hal ni: Satu waktu, Allah nanti kasi lapas akang dari kutok yang kasi ancor deng kasi busu akang. La akang nanti rasa sanang yang luar biasa sama deng apa yang Allah pung anana rasa.
22 Katong tau kalo sampe sakarang ni, samua yang Allah biking di langit deng dunya tu ada helahai tagal susa deng sangsara tarus, macang deng parampuang yang rasa saki waktu dia pung ana mau lahir. 23 Bukang cuma akang yang macang bagitu sa, mar katong lai. Katong su tarima Allah pung Roh par jadi tanda kalo Antua nanti kasi apa yang Antua su janji. Mar, katong jua masi helahai tarus, tagal katong ada tunggu-tunggu Antua batul-batul angka katong jadi Antua pung anana. Yang beta maksud tu, katong ada tunggu-tunggu Antua kasi lapas katong dari katong pung badang di dunya ni la kasi badang yang baru par katong.* 24 Barang, biar kata Allah su kasi salamat katong, mar katong masi harap apa yang Antua su janji par katong. Kalo katong su dapa apa yang katong harap tu, itu pung arti katong seng parlu harap lai to? Barang, orang seng parlu harap apa yang dia su dapa tu! 25 Mar, kalo katong balong dapa apa yang katong harap tu, katong tunggu-tunggu akang deng sabar.
26 Allah pung Roh jua tolong katong waktu katong seng kuat. Conto sa, waktu katong seng tau mau sombayang apa, Allah pung Roh sombayang ganti katong, bilang apa yang katong seng bisa bilang deng kata-kata tu par Allah. 27 La Allah yang tau manusia pung dalang hati tu, Antua tau Roh tu pung maksud, tagal apa yang Roh tu minta par Allah pung orang-orang, akang sama deng apa yang Allah mau.
28 Basudara e! Katong tau kalo par orang-orang yang sayang Allah deng yang Antua su panggel iko Antua pung rencana, Antua pake apa sa yang jadi dalang dong pung hidop par dong pung bae. 29 Barang, dari dolo lai Antua su tau orang-orang yang Antua pili jadi Antua pung anana. Antua jua su putus dari kamuka-kamuka lai biar dong pung tabiat sama deng Antua pung Ana Yesus pung tabiat, biar Yesus jadi Ana yang tua la dong jadi Yesus pung sudara. 30 La dong yang Antua su pili dari dolo tu, dong tu jua yang Antua panggel par jadi Antua pung anana. La dong yang Antua panggel tu, dong tu jua yang Antua bilang dong su jadi batul di muka Antua. La dong yang su jadi batul di muka Antua tu, dong tu jua yang nanti dapa angka tinggi-tinggi dari Antua.
Allah kasi unju Antua pung sayang par katong lewat Yesus Kristus
8:31-39
31 Jadi basudara e, kalo katong inga samua yang Allah su biking par katong, katong batul-batul tau kalo Antua ada sama-sama deng katong. Tagal itu, seng ada satu orang lai yang bisa lawang katong! 32 Antua pung ana sa Antua seng tahang-tahang, mar kasi Dia biar Dia dapa bunu, biar katong salamat. Jadi, kalo Antua pung Ana sa Antua kasi par katong, Antua jua pasti kasi samua yang katong parlu par hidop par Antua. 33 Seng ada yang bisa tudu kalo orang-orang yang Antua su pili tu sala, tagal Antua sandiri bilang kalo dong tu batul. 34 Seng ada yang bisa kasi sala katong, Antua pung orang-orang. Barang, Yesus Kristus su mati par tabus katong pung dosa-dosa. Antua jua su hidop kombali la ada di Allah pung sabala kanang, tampa paleng panting. Yesus Kristus tu yang bela katong di muka Allah. 35 Seng ada apapa satu lai yang bisa kasi pisa katong dari Yesus Kristus pung sayang. Biar kata katong susa, sangsara, dapa siksa, lapar, seng ada pung pakiang, cilaka, ka mau dapa bunu lai, Antua tetap kasi unju Antua pung sayang par katong. 36 Dalang Allah pung Tulisang ada bilang kata,
“Sio Tuhan, siang-malang ada orang-orang yang mau bunu katong, tagal katong parcaya Tuhan.
Dong anggap katong sama deng domba yang mau dapa bunu.”*
37 Mar, biar kata katong dapa samua susa deng sangsara tu, akang tetap seng bisa kasi kala katong. Mala katong labe tamba manang lai tagal Yesus Kristus pung sayang deng bae par katong. 38-39 Beta bilang bagitu tagal beta parcaya paskali kalo seng ada apapa satu lai yang bisa kasi pisa katong dari Allah pung sayang. Biar kata itu soal mati ka hidop, malekat-malekat ka setang-setang, hal-hal yang jadi sakarang ka eso-eso nanti, kuasa-kuasa apa sa yang ada di atas langit ka di dalang dunya, ka apapa yang laeng lai, samua-samua tu seng bisa kasi pisa katong dari Allah pung sayang. Katong bisa lia Antua pung sayang par katong tu lewat apa yang Tuhan Yesus Kristus yang katong somba tu su biking par katong.