Allah pili sapa sa iko Antua pung mau
9:1-29
9
1 Basudara e! Ada yang beta mau bilang par kamong. Apa yang beta mau bilang ni batul, tagal beta satu hati deng Kristus. Beta seng parlente deng apa yang beta mau bilang ni. Mala beta pung hati kacil jua bilang kalo beta seng parlente, tagal Allah pung Roh pimping beta. 2 Beta mau bilang kalo beta pung hati paleng susa deng paleng ancor paskali tagal orang Israel seng mau parcaya Yesus. 3 Mala beta mau dapa kutok dari Allah la tapisa dari Kristus, asal beta pung basudara satu bangsa tu salamat. 4 Dong tu orang Israel. Allah su angka dong jadi Antua pung anana. Antua su kasi unju Antua pung kuasa yang hebat par dong. Antua su ika janji babarapa kali deng dong. Antua su kasi Hukum Torat par dong deng kasi unju cara yang batul par somba Antua. Antua jua su kasi janji-janji par dong. 5 Dong tu moyang Abraham, Isak, deng Yakub pung anana cucu. Dari dong, Yesus Kristus, Orang yang Allah su Angka par Kasi Salamat Manusia tu lahir ka dunya. Kristus tu Allah par samua-samua, jadi Antua pantas par dapa puji tarus-tarus. Amin!6 Mar biar kata banya dari orang Israel seng mau parcaya Yesus Kristus, itu bukang pung arti kata Allah pung janji-janji par Abraham, Isak, deng Yakub tu seng tapake lai. Barang, seng samua orang yang pung dara Israel tu yang Allah pili par jadi Antua pung orang-orang. 7 Bagitu jua, seng samua orang yang jadi Abraham pung turunang tu yang Allah pili par jadi Antua pung anana, sama deng Antua pung janji par Abraham. Barang, Allah su bilang par dia, “Cuma ale pung ana Isak pung turunang yang nanti jadi ale pung anana cucu, sama deng apa yang Beta janji.”* 8 Akang pung arti, seng samua dari Abraham pung anana cucu yang Allah angka jadi Antua pung anana. Cuma anana yang lahir tagal Allah pung janji par Abraham sa yang batul-batul jadi Allah pung anana. 9 Barang, Allah janji Abraham kata, “Beta nanti bale kombali taong muka. Waktu itu, ale pung bini Sara su pung ana laki-laki satu.”*
10 Bukang cuma conto itu sa, mar dari Ribka pung conto jua, katong bisa lia bagemana Allah pili satu orang. Ribka ni yang kasi lahir Esau deng Yakub. Dong dua pung bapa tu par katong pung moyang Isak. 11-12 Dari waktu anana tu balong lahir lai, deng dari waktu dong balong biking apa yang bae ka jahat lai, Allah su bilang par Ribka kata, “Ana yang tua nanti jadi jongos par dia pung ade.”* Allah bilang bagitu par kasi unju kalo Antua pili satu orang, itu bukang tagal apa yang dong biking, mar tagal Antua pung mau sandiri. 13 Apa yang Antua biking tu sama deng apa yang tatulis dalang Allah pung Tulisang kata, “Beta pili Yakub mar Esau seng.”*
14 Kalo bagitu, jang sampe ada yang bilang kata Allah tu barát sabala kapa, tagal pili yang satu la buang yang laeng! Seng bagitu! 15 Barang, Antua bilang par Musa kata,
“Beta mau kasi unju Beta pung hati bae par sapa yang Beta pili
deng kasi unju Beta pung sayang par sapa yang Beta mau.”*
16 Jadi, Allah pili satu orang bukang tagal dia pung mau ka tagal dia pung usaha par biking apa yang bae, mar tagal Antua pung hati bae. 17 Barang dalang Allah pung Tulisang, Antua ada bilang par Raja Mesir kata, “Beta angka ale jadi raja, biar lewat ale, Beta bisa kasi unju Beta pung kuasa deng biar samua orang di dunya puji-puji Beta.”* 18 Jadi, dari nats tu katong bisa balajar kalo Antua kasi unju Antua pung hati bae par satu orang ka, kasi karas satu orang pung hati ka, itu iko Antua pung mau sa.
19 Kalo bagitu, mangkali ada dari kamong yang bilang par beta kata, “Allah tu seng batul. Barang, kalo Antua yang kasi karas katong pung hati ka kasi lombo katong pung hati, yo mangapa kong Antua masi kasi sala katong kalo katong biking dosa? Toh, katong biking bagitu iko Antua pung mau.” 20 Mar, beta mau jawab dia kata, katong manusia ni sapa kong barani manyao Allah? Coba pikir, masa sempe bisa bale tanya par orang yang biking akang kata, “Hoe! Mangapa kong se biking beta macang bagini?”* 21 Masa orang yang biking sempe tu seng ada pung hak par tana liat par biking apa yang dia mau? Dari tana mera yang sama, dia bisa biking sempe satu par pake par hal-hal yang panting la yang biasa par pake hari-hari.
22 Bagitu jua deng Allah. Antua ada pung hak par biking apa yang Antua mau. Antua memang rencana par kasi unju Antua pung morka par orang-orang yang biking dosa, deng hukum dong deng Antua pung kuasa yang basar tu. Mar, Antua mala paleng sabar deng dong yang pantas par dapa morka deng dapa kasi binasa dalang naraka tu. 23 Antua biking bagitu justru par kasi unju Antua pung hati bae yang luar biasa par orang-orang yang Antua sayang. Dong tu orang-orang yang Antua su kasi siap dari dolo lai par hidop tarus-tarus di sorga. 24 Orang-orang yang Antua pili par hidop tarus-tarus di sorga tu, katong ni. Orang-orang yang Antua pili tu bukang cuma orang-orang Yahudi sa, mar orang-orang bukang Yahudi lai. 25 Antua biking bagitu sama deng apa yang Antua bilang kamuka par Antua pung Juru Bicara Hosea kata,
“Beta nanti panggel orang-orang yang bukang Beta pung orang-orang par jadi Beta pung orang-orang.
Beta nanti panggel orang-orang yang Beta seng sayang par jadi orang-orang yang Beta sayang.*
26 La di tampa yang dolo Beta bilang par orang-orang di situ kata, ‘Kamong tu bukang Beta pung orang-orang’,
di tampa tu jua orang-orang nanti bilang par dong tu kata, ‘Kamong tu Allah yang hidop tarus-tarus tu pung anana.’ ”*
27 Mar soal orang-orang Israel, Antua pung Juru Bicara Yesaya bilang deng tegas kata,
“Biar kata orang Israel tu banya macang deng paser di pinggir pante lai,
mar cuma sisa yang sadiki tu sa yang nanti dapa kasi salamat.
28 Barang, seng lama lai Tuhan pasti hukum dunya ni.”*
29 Akang sama deng apa yang Yesaya su bilang kamuka kata,
“Kalo Tuhan yang pung Kuasa par Samua-Samua tu seng kasi tinggal katong pung turunang satu dua orang hidop,
katong orang-orang Yahudi pasti su mati samua macang deng orang-orang di kota Sodom deng Gomora.”*
Orang Israel seng parcaya Yesus
9:30—10:4
30 Jadi basudara e, katong bisa balajar apa dari samua tu? Katong bisa balajar kalo orang-orang bukang Yahudi seng usaha par jadi batul di muka Allah, mar Allah su bilang kalo dong su jadi batul di muka Antua tagal dong parcaya Yesus. 31 Mar orang-orang Israel, dong usaha par biking atorang-atorang Torat biar dong bisa jadi batul di muka Allah, mar dong seng bisa jadi batul di muka Antua. 32 Mangapa kong dong seng bisa? Barang, dong usaha par jadi batul di muka Allah bukang deng jalang parcaya Yesus, mar deng jalang biking atorang-atorang Torat tu. Dong pikir deng cara bagitu dong bisa jadi batul di muka Allah. Dong seng mau parcaya Yesus, jadi dong macang deng orang yang tasonto di batu. 33 Apa yang jadi deng dong tu sama deng apa yang tatulis dalang Allah pung Tulisang soal Yesus kata,
“Dengar bae-bae! Beta su kasi dudu Batua satu di kota Yerusalem,b
Batu yang biking orang-orang tasonto la jatu.
Sapa sa yang parcaya Antua, dia pasti seng malu.”*