Roma 10

1 Basudara e! Beta inging paskali deng salalu sombayang par Allah biar Antua kasi salamat orang-orang Israel. 2 Barang, beta barani bilang kalo dong usaha sunggu-sunggu par somba Allah, mar dong seng tau mau biking akang deng batul bagemana. 3 Tagal dong seng mau tau Allah pung jalang biar dong bisa jadi batul di muka Antua, jadi dong usaha par jadi batul di muka Antua deng dong pung cara sandiri. Tagal itu, dong seng mau paskali par iko Antua pung cara biar dong bisa jadi batul di muka Antua. 4 Tagal Kristus, orang seng parlu biking Hukum Torat lai biar dong jadi batul di muka Allah. Barang, samua orang yang parcaya Antua, dong bisa jadi batul di muka Allah.

Katong jadi batul di muka Allah tagal parcaya Yesus

10:5-15

5 Soal bagemana kong orang bisa jadi batul di muka Allah tagal biking atorang-atorang dalang Hukum Torat, Musa bilang, “Sapa yang iko atorang-atorang deng parenta-parenta tu, dia nanti hidop tagal iko atorang-atorang tu.” 6-7 Mar, soal bagemana kong orang bisa jadi batul di muka Allah tagal parcaya, Musa bilang, “Jang bilang dalang kamong pung hati kata, ‘Sapa yang mau nai ka sorga, ka sapa yang mau turung ka orang-orang mati pung tampa?’ ” Akang pung arti: Katong seng parlu nai ka sorga par bawa Kristus turung par kasi salamat katong. Katong jua seng parlu turung par bawa Kristus nai par kasi salamat katong. 8 Katong seng parlu bagitu tagal Allah pung Tulisang jua bilang,

“Allah pung kata-kata tu paleng dekat deng kamong.

Kamong bisa mangaku akang deng kamong pung mulu la parcaya akang dalang kamong pung hati.”

Allah pung kata-kata tu Kabar Bae yang katong kasi balajar par orang-orang biar dong parcaya la salamat. 9 Katong kasi balajar bagini: Kalo kamong mangaku deng kamong pung mulu kata Yesus tu Tuhan yang parenta kamong la parcaya dalang hati kalo Allah su kasi hidop Antua kombali, Antua nanti kasi salamat kamong. 10 Barang deng hati, orang parcaya la Allah biking dia jadi batul di muka Antua. La deng mulu, orang mangaku la dapa kasi salamat. 11 Allah pung Tulisang sandiri jua su bilang, “Sapa sa yang parcaya Antua, dia pasti seng malu.” 12 Akang bilang bagitu tagal Allah anggap sapa sa yang parcaya tu sama sa, seng lia kata dia tu orang Yahudi ka orang bukang Yahudi. Allah yang sama tu samua orang pung Tuhan. Antua kasi unju Antua pung hati bae seng putus-putus par samua orang yang basaro minta Antua kasi salamat dong. 13 Barang, Allah pung Tulisang sandiri jua ada bilang, “Sapa sa yang basaro par Tuhan, Antua nanti kasi salamat dia.”

14 Mar, bagemana kong dong bisa basaro minta Antua kasi salamat dong kalo dong seng parcaya Antua? Bagemana kong dong bisa parcaya Antua kalo dong seng parna dengar soal Antua? Bagemana kong dong bisa dengar soal Antua kalo seng ada orang yang pi kasi tau soal Antua? 15 La bagemana kong ada orang yang mau pi kasi tau soal Antua kalo dong seng dapa utus? Barang, Allah pung Tulisang sandiri jua ada bilang kata, “Paleng bagus paskali kalo ada orang yang datang kasi tau Kabar Bae!”

Orang-orang Israel seng mau tarima Kabar Bae

10:16-21

16 Mar, cuma sadiki sa dari orang Israel yang mau tarima Kabar Bae tu. Yesaya sandiri jua su bilang kata, “Sio Tuhan e! Sapa yang parcaya kabar yang katong bawa tu?” 17 Jadi, orang-orang bisa parcaya Kristus kalo dong dengar Kabar Bae soal Antua, deng dong cuma bisa dengar akang kalo orang laeng pi kasi tau akang par dong. 18 Mar bagemana deng orang-orang Israel? Jang sampe dong balong parna dengar Kabar Bae tu kapa sampe dong seng parcaya? Dong memang su parna dengar akang. Katong bisa tau kalo dong su parna dengar akang tagal Allah pung Tulisang su bilang kata,

“Orang-orang su pi kasi tau akang sampe ka antero dunya.

Dong pung kata-kata tu su tasiar sampe ka ujung dunya.”

19 Mar dong mangarti Kabar Bae tu ka seng? Dong mangarti akang. Partama, Musa bilang apa yang Allah bilang kata,

“Beta nanti biking kamong orang-orang Israel jadi jalus deng bangsa-bangsa laeng yang bukang Beta pung orang-orang.

Beta nanti biking kamong jadi mara deng bangsa-bangsa laeng yang kamong anggap bodo tu.”

20 Abis itu, Yesaya jua deng barani bilang apa yang Allah bilang kata,

“Beta su kasi biar orang-orang yang seng parna usaha par kanal Beta, biar dong kanal Beta.

Beta su kasi unju Beta pung diri par orang-orang yang seng parna tanya bagemana dong bisa tau soal Beta.”

21 Mar soal orang-orang Israel, Yesaya bilang apa yang Allah bilang kata,

“Siang-malang Beta sio-sio dong biar bangsa tu datang par Beta,

mar dong kapala batu deng seng dengar-dengarang.”