Allah masi pung hati bae par orang Israel
11:1-10
11
1 Tagal orang Israel kapala batu deng seng dengar-dengarang, jang sampe Allah su bale balakang dari dong yang Antua su pili jadi Antua pung orang-orang tu kapa? Seng sama sakali! Beta bilang bagini tagal beta sandiri jua orang Israel. Beta ni Abraham pung turunang, dari suku Benjamin.* 2 Allah seng bale balakang dari Antua pung orang-orang yang Antua su pili dari dolo paskali. Coba inga apa yang Allah pung Tulisang bilang soal Elia, waktu dia lapor orang Israel pung kalakuang par Allah. 3 Dia bilang, “Sio Tuhan e! Dong su bunu Tuhan pung juru-juru bicara. Dong su kasi rubu tampa-tampa bakar korbang par Tuhan. Cuma tinggal beta sandiri yang masi hidop dari Tuhan pung juru-juru bicara la sakarang dong jua mau bunu beta lai.”*4 Mar Allah bilang apa par dia la? Antua bilang, “Masi ada sisa tuju ribu orang Israel laeng lai yang Beta pili par jadi Beta pung orang-orang. Dong tu seng parna tikang lutu somba Baal.”* 5 Bagitu lai deng sakarang ni. Masi ada sisa dari orang Israel yang Antua su pili par jadi Antua pung orang-orang tagal Antua pung hati bae par dong. 6 Antua pili dong tagal Antua pung hati bae, bukang tagal apa yang dong biking. Barang, kalo Antua pili dong tagal apa yang dong biking, itu pung arti Antua ada balas apa yang dong biking tu. Kalo bagitu, Antua pili dong bukang tagal Antua pung hati bae lai.
7 Jadi, bangsa Israel seng dapa apa yang dong cari-cari, cuma saparu dari dong yang Allah su pili tu sa. Mar yang laeng tu, Allah su kasi karas dong pung hati. 8 Akang sama deng apa yang tatulis dalang Allah pung Tulisang kata,
“Sampe oras ni, Allah biking dong seng mangarti apapa,
macang deng orang yang dapa tidor mati.
Antua tutu dong pung mata biar dong seng bisa dapa lia,
deng tutu dong pung talingang biar dong seng bisa dapa dengar.”*
9 Raja Daud jua bilang,
“Sio Tuhan, kasi biar dong pung pesta makang-minong tu jadi dodeso par dong biar dong cilaka,
biar akang jadi par dong par balas dong pung kajahatang.
10 Kasi biar dong seng mangarti apapa, macang deng orang yang pung mata buta, yang seng dapa lia lai,
biar dong tabongko-bongko pikol dong pung masala sampe mati.”*
Allah kasi salamat bangsa-bangsa laeng
11:11-24
11 Jadi, jang sampe tagal orang Israel dong tu tasonto la jatu, dong seng bisa bangong-bangong lai? Beta pung maksud, jang sampe tagal dong seng parcaya Yesus, dong tapisa dari Allah tarus-tarus? Seng sama sakali! Mar tagal dong seng parcaya, jalang tabuka par orang-orang bukang Yahudi par dapa kasi salamat. Ini jadi, biar kalo dong lia apa yang jadi tu, dong nanti jalus deng orang-orang bukang Yahudi tu la bawa dong pung diri par dapa kasi salamat lai. 12 Coba pikir! Tagal dong seng parcaya Yesus sa jalang tabuka par orang-orang bukang Yahudi di dunya par dapa berkat yang basar dari Allah. Apalai kalo sampe samua yang Allah su pili dari orang-orang Yahudi tu su parcaya Yesus la dapa kasi salamat? Pasti berkat yang orang-orang bukang Yahudi dapa tu labe tamba basar dari berkat yang kamuka tu lai.
13 Sakarang beta mau bicara labe kusus par kamong basudara bukang Yahudi! Beta ni Allah pung utusang par pi kasi tau Kabar Bae par orang-orang bukang Yahudi. Beta anggap beta pung karja ni paleng panting paskali. 14 Barang, beta harap deng beta pung karja ni, beta pung basudara satu bangsa jadi jalus deng kamong, tagal lia orang-orang bukang Yahudi dapa kasi salamat. Sapa tau deng cara bagitu, ada dari dong yang bisa salamat lai. 15 Barang, kalo waktu Allah bale balakang dari orang-orang Yahudi, itu pung arti jalang tabuka par orang-orang bukang Yahudi di dunya par baku bae deng Allah, apalai kalo Allah tarima orang-orang Yahudi tagal dong parcaya? Itu pasti labe luar biasa lai, macang deng orang yang su mati hidop kombali. 16 Itu pasti jadi, tagal kalo Allah pili Abraham, Isak, deng Yakub jadi Antua pung orang-orang, pasti Antua jua pili dong pung anana cucu par jadi Antua pung orang-orang. Akang sama deng tarigu yang orang su banting par biking roti. Kalo dong ambe sadiki do la bakar akang la kasi akang par jadi Allah pung, itu pung arti tarigu sisa tu jua Allah pung lai. Bagitu lai deng pohong saitun. Kalo akar pohong saitun su jadi Allah pung, itu pung arti akang pung jaga-jaga samua tu jua Allah pung lai.
17 Mar, banya dari orang Yahudi tu seng parcaya. Dong sama deng jaga-jaga saitun yang su dapa potong buang. La kamong yang bukang Yahudi yang su parcaya, kamong tu macang deng tunas saitun utang satu yang orang tempel di pohong saitun tadi tu. Jadi, sama deng tunas saitun utang dapa makang dari pohong saitun tadi tu pung akar, kamong jua dapa berkat yang Allah su janji par orang Yahudi pung tete-nene moyang dolo-dolo tu. 18 Tagal itu, jang kamong anggap diri labe basar dari orang-orang Yahudi, yang sama deng jaga-jaga pohong saitun yang su dapa potong buang tadi tu. Kalo kamong rasa diri basar, kamong musti inga kalo kamong tu cuma jaga pohong sa. Jaga seng kasi makang akar, mar akar yang kasi makang jaga.
19 Mar, mangkali ada dari kamong yang bilang kata, “Allah buang orang-orang Yahudi macang deng jaga-jaga saitun yang dapa potong buang, biar Antua bisa tarima katong orang-orang bukang Yahudi macang deng tunas saitun utang yang dapa tempel ka pohong saitun tadi.” 20 Yang kamong bilang tu batul! Mar inga! Dong dapa buang dari Allah tagal dong seng parcaya. Mar kamong, kamong dapa tarima dari Allah tagal kamong parcaya. Jadi, jang mangarti mar musti taku deng taru hormat par Antua! 21 Barang, kalo Allah sa seng tanggong-tanggong buang orang-orang Yahudi tu, macang deng jaga-jaga pohong saitun asli yang dapa potong buang, apalai kamong? Antua jua nanti seng tanggong-tanggong buang kamong kalo kamong seng parcaya!
22 Dari situ katong bisa lia kalo Allah tu paleng bae, mar Antua jua paleng karas kalo kasi hukumang. Antua karas par orang-orang Yahudi yang seng parcaya, yang macang deng orang yang tasonto la jatu. Mar, Antua kasi unju Antua pung hati bae par kamong orang-orang bukang Yahudi, asal kamong tetap taru harap par Antua yang kasi unju Antua pung hati bae par kamong tu. Kalo seng, kamong jua nanti dapa buang, macang deng jaga pohong saitun yang dapa potong buang. 23 Mar orang-orang Yahudi yang dapa buang tu, dong nanti dapa tarima kombali dari Allah, macang deng jaga-jaga saitun yang tadi dapa potong buang mar sakarang dapa tempel kombali ka akang pung batang, asal dong mau parcaya Yesus. Barang, Allah pung kuasa par biking bagitu. 24 Kamong orang bukang Yahudi kalo iko batul tu seng pantas par dapa tarima dari Allah, macang deng tunas saitun utang seng pas par dapa tempel ka pohong saitun asli. Mar biar kata bagitu, Allah tarima kamong tagal kamong parcaya. Jadi, kalo kamong sa dapa tarima dari Antua, apalai deng orang Yahudi? Dong pasti dapa tarima kombali dari Antua, asal dong parcaya. Dong sama deng jaga pohong saitun asli yang su dapa potong buang, jadi memang pas kalo akang dapa tempel ka akang pung batang kombali.
Allah pung hati bae par samua orang
11:25-36
25 Basudara yang bukang Yahudi e! Beta mau kasi tau Allah pung rencana yang Antua dolo seng kasi tau par sapa-sapa, biar kamong jang rasa diri basar. Antua pung rencana tu bagini: Banya dari bangsa Israel pung hati karas. Mar, nanti kalo samua orang yang su dapa pili dari orang-orang bukang Yahudi par parcaya Yesus tu su parcaya Yesus do, baru banya dari bangsa Israel tu jua parcaya lai. 26 Deng cara bagitu, orang-orang Israel samua nanti salamat, sama deng apa yang tatulis dalang Allah pung Tulisang kata,
“Orang yang kasi salamat manusia nanti datang dari kota Yerusalem.a
Antua nanti hapus Yakub pung anana cucu pung kajahatang-kajahatang.”*
27 “Ini ni janji yang Beta ika deng dong:
Beta nanti hapus dong pung dosa-dosa.”*
28 Tagal orang-orang Yahudi seng mau tarima Kabar Bae soal Yesus, Allah baku musu deng dong. Ini jadi, biar Antua bisa buka jalang par kamong orang-orang bukang Yahudi par salamat. Mar biar kata bagitu, Allah tetap sayang dong, tagal Antua su pili dong pung tete-nene moyang jadi Antua pung orang-orang. 29 Barang, kalo Allah su pili deng su kasi berkat par satu orang, Antua seng parna roba apa yang Antua su biking tu. 30 Dolo kamong seng dengar-dengarang Allah. Mar sakarang, Antua kasi unju Antua pung hati bae par kamong, tagal orang-orang Yahudi seng dengar-dengarang Antua. 31 Bagitu lai deng orang-orang Yahudi. Biar kata sakarang ni dong seng dengar-dengarang Allah, mar Antua jua nanti kasi unju Antua pung hati bae par dong, sama deng Antua su kasi unju Antua pung hati bae par kamong. 32 Barang, Allah su kasi biar samua orang biar dong seng dengar-dengarang Antua. Antua kasi biar dong bagitu biar Antua bisa kasi unju Antua pung hati bae par dong samua.
33 Allah paleng bae paskali par katong!
Antua paleng pintar deng pung pikirang paleng tajang!
Sapa tu yang bisa tau bagemana Antua putus parkara-parkara?
Sapa tu yang bisa mangarti Antua pung cara karja?*
34 Sapa tu yang tau Tuhan pung pikirang?
Sapa tu yang parna kasi nasehat par Antua?*
35 Ka, sapa tu yang parna kasi apapa satu par Antua,
sampe Antua musti ganti akang par dia?*
36 Barang, samua-samua yang ada ni asal dari Antua, ada tagal Antua, deng ada biar Antua dapa puji.*
Antua sa yang pantas par dapa puji tarus-tarus! Amin.