1 Korintus 1

Paulus pung Surat Partama par Jamaat di

Korintus

Tabea

1:1-3

1-2 Par basudara jamaat yang ada di kota Korintus. Allah su pili kamong jadi Antua pung orang-orang tagal kamong satu hati deng Yesus Kristus. Antua jua su pili kamong sama-sama deng Allah pung orang-orang di sagala tampa, yang parcaya Tuhan Yesus Kristus yang katong somba. Antua tu Tuhan yang katong samua orang parcaya somba.

Tabea! Surat ni dari beta Paulus, yang dapa panggel par jadi Yesus Kristus pung utusang iko Antua pung mau, deng dari katong pung sudara yang sama-sama parcaya Yesus, yang nama Sostenes.

3 Katong dua minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.

Paulus minta dangke dari Allah

1:4-9

4 Basudara e! Beta salalu minta dangke dari Allah yang beta somba, tagal Antua kasi unju Antua pung hati bae par kamong lewat Yesus Kristus. 5 Barang, tagal kamong su satu hati deng Antua, Antua kasi samua-samua yang kamong parlu biar kamong bisa mangarti banya hal deng bisa bicara soal Allah pung kata-kata. 6 Itu jadi bukti kalo apa yang katong bilang par kamong soal Kristus tu batul. 7 Antua kasi samua tu biar kamong seng kurang berkat rohani satu lai yang kamong parlu par biking Allah pung karja, waktu kamong ada tunggu-tunggu Tuhan Yesus Kristus yang katong somba tu bale kombali. 8 Tuhan Yesus Kristus jua nanti tolong kamong par tetap parcaya Antua kuat-kuat sampe waktu Antua bale kombali. Antua biking bagitu biar waktu Antua bale, Antua seng dapa apapa satu yang sala dalang kamong pung diri par tuntut kamong. 9 Allah tu salalu biking apa yang Antua janji. Antua tu yang su pili kamong biar kamong bisa jadi satu hati deng Antua pung Ana Yesus Kristus, Tuhan yang katong somba.

Orang parcaya musti satu hati

1:10-17

10 Basudara e! Deng kuasa yang Tuhan Yesus Kristus yang katong somba tu kasi par beta, beta minta kamong samua musti satu hati biar kamong seng tapica-pica lai, mar taika dalang satu pikirang deng satu maksud. 11 Beta bilang bagitu basudara e, tagal ada babarapa orang yang tinggal di usi Kloe pung ruma yang kasi tau beta kalo kamong memang ada baku malawang. 12 Yang beta maksud, ada yang bilang kata dia tu dari Paulus pung kalompok. Ada lai yang bilang kata dia tu dari Apolos pung kalompok. Ada lai yang bilang kata dia tu dari Petrus pung kalompok. Ada jua yang bilang kata dia tu dari Kristus pung kalompok.

13 Hoe! Kamong pikir yang kamong biking tu bagus ka? Masa kamong iko Kristus mar tapica-pica dalang kalompok-kalompok macang bagitu? Jang sampe kamong pikir kata Paulus ni dapa salib par kamong kapa? Ka, jang sampe kamong pikir kata kamong dapa baptis deng Paulus pung nama kapa? 14 Beta minta dangke banya dari Allah tagal beta seng baptis satu orang lai dari kamong, cuma Krispus deng Gayus sa. 15 Jadi, seng ada satu orang lai yang bisa bilang kata dia dapa baptis deng beta pung nama. 16 Beta jua inga kalo beta yang baptis Stefanus deng orang-orang yang tinggal di dia pung ruma. Mar beta seng inga kalo beta parna baptis orang laeng lai ka seng. 17 Barang, Kristus utus beta bukang par baptis orang, mar par kasi tau Allah pung Kabar Bae. La waktu beta kasi tau Kabar Bae tu, beta seng kasi tau akang deng beta pung pintar par bicara biar orang parcaya apa yang beta bilang. Kalo beta biking bagitu, dong cuma parcaya tagal beta pung kata-kata, mar seng parcaya par Yesus Kristus yang su mati di kayo salib tu. Itu sama sa deng dong anggap Antua pung kamatiang tu seng ada pung arti.

Kabar Bae tu kasi unju Allah pung kuasa deng pikirang tajang

1:18-31

18 Ada orang-orang yang anggap barita soal mangapa kong Yesus mati di kayo salib tu carita bodo. Orang-orang macang bagitu tu orang-orang yang nanti dapa lempar dalang naraka. Mar par katong yang dapa kasi salamat ni, katong tau kalo carita tu kasi unju soal Allah pung kuasa yang paleng hebat yang Antua pake par kasi salamat manusia. 19 Beta bilang bagitu tagal dalang Allah pung Tulisang ada bilang kata,

“Biar kata manusia di dunya ni pung pikirang tajang bagemana lai,

Beta nanti kasi ancor dong pung pikirang tajang tu.

Beta jua nanti seng ambe pusing deng apa yang orang-orang pintar tu pikir.”

20 Jadi mana orang-orang yang pung pikirang tajang tu? Mana guru-guru Torat tu? La orang-orang yang pintar buju orang deng dong pung saribu satu macang alasang tu, mana dong? Allah su biking manusia pung pintar tu seng ada pung arti apapa. 21 Barang, biar kata manusia tu pintar bagemana lai, dong seng bisa pake dong pung pintar tu par kanal Allah. Mar tagal Allah pung pikirang tu paleng tajang, Allah kasi salamat orang yang parcaya Kabar Bae yang katong ada bilang ni, biar kata ada orang yang anggap akang sama deng carita bodo bagitu.

22 Orang Yahudi seng mau parcaya kalo dong balong lia tanda-tanda herang deng dong pung mata kapala sandiri. La orang Yunani seng mau parcaya par apa yang katong ajar kalo ajarang tu seng maso akal par dong. 23 Mar katong ni, katong cuma kasi tau soal Kristus yang su mati di kayo salib par kasi salamat katong. Orang Yahudi hati saki dengar akang la orang bukang Yahudi anggap akang macang deng barang bodo bagitu. 24 Mar par orang-orang yang Allah su panggel par jadi Antua pung orang-orang, biar kata orang Yahudi ka bukang Yahudi ka, Kabar Bae soal Kristus tu kasi unju Allah pung kuasa deng pikirang tajang. 25 Barang, biar kata manusia anggap Kabar Bae tu sama deng omong kosong lai, mar apa yang Allah biking deng Antua pung pikirang tajang tu masi jau labe pintar dari manusia pung pikirang. La biar kata manusia anggap Antua tu seng ada pung kuasa apapa, mar Antua pung kuasa tu labe basar dari dong.

26 Basudara e! Coba inga kamong pung hidop dolo-dolo waktu Allah balong panggel kamong. Kalo iko dunya pung ukurang, seng banya dari kamong yang pung pikirang tajang. Seng banya dari kamong jua yang pung pangkat ka lahir dari kaluarga yang pung pangaru. 27 Mar, Allah sangaja pili orang-orang yang bodo kalo iko orang-orang di dunya ni pung ukurang, biar orang-orang yang pung pikirang tajang tu malu. Antua pili orang-orang yang seng kuat kalo iko orang-orang di dunya ni pung ukurang, biar orang-orang yang kuat tu malu. 28 Allah pili orang-orang yang seng panting, yang orang-orang lia deng mata sabala, deng yang seng pung arti apapa kalo iko orang-orang di dunya ni pung ukurang. Antua pili dong par biking orang-orang yang anggap diri hebat tu seng ada pung arti apapa. 29 Antua biking bagitu biar seng ada satu orang lai yang bisa rasa diri basar di muka Antua. 30 Antua sandiri yang biking kamong jadi satu hati deng Yesus Kristus. Lewat apa yang Yesus biking, Allah kasi unju Antua pung pikirang tajang par kasi salamat katong. Lewat Yesus Kristus jua, Allah anggap katong pung hidop batul, biking katong jadi Antua pung orang-orang, deng kasi lapas katong dari dosa-dosa. 31 Jadi, sama deng apa yang tatulis dalang Allah pung Tulisang, “Kalo sapa mau bicara mangarti, labe bae dia bicara mangarti tagal apa yang Tuhan biking.”