Jang bawa katong yang parcaya pung parkara par orang yang seng parcaya
6:1-11
6
1 Basudara e! Kalo kamong ada parkara deng orang parcaya yang laeng, mangapa kong kamong bawa akang par hakim yang seng parcaya Allah? Mangapa kong kamong seng bawa akang par Allah pung orang-orang? 2 Ka, jang sampe kamong seng tau kapa kalo Allah pung orang-orang nanti putus orang-orang di dunya ni pung parkara? Jadi, kalo kamong nanti putus orang-orang di dunya ni pung parkara, masa kamong seng bisa urus parkara-parkara kacil macang bagitu? 3 Masa kamong seng tau kalo katong yang parcaya ni nanti putus malekat-malekat pung parkara? Kalo bagitu, katong jua bisa putus parkara-parkara biasa dalang katong pung hidop hari-hari ni. 4 Jadi, kalo ada parkara-parkara kacil bagitu, mangapa kong kamong bawa akang par orang-orang yang seng parcaya, yang seng ada pung hak dalang jamaat tu par urus akang?a5 Beta bilang bagitu biar kamong malu! Masa seng ada satu orang lai yang pung pikirang tajang dalang jamaat yang bisa urus dia pung sudara-sudara jamaat pung parkara, 6 sampe laeng lapor laeng par hakim? Mala, hakim tu jua bukang orang parcaya lai! 7 Kalo kamong baku lapor ka hakim, itu sama sa kamong su kala. Jadi, mangapa kong kamong seng bisa kasi biar orang laeng biking sala par kamong ka biking rugi kamong? 8 Mar kamong, kamong sandiri biking sala deng biking rugi orang laeng. Yang labe busu lai, kamong biking akang par kamong pung basudara yang parcaya Yesus sandiri.
9-10 Kamong su tau to kalo orang-orang yang seng iko Allah pung mau tu seng bisa jadi Antua pung orang-orang waktu Antua pegang parenta jadi Raja? Jadi, jang parlente kamong pung diri sandiri! Orang-orang yang tidor deng orang yang bukang dia pung laki ka bini ka, yang somba patong-patong ka, maeng serong ka, dong seng bisa jadi Allah pung orang-orang waktu Antua pegang parenta jadi Raja. Bagitu lai deng laki-laki yang tidor deng laki-laki ka, pancuri ka, pambaringing ka, pamabo ka, orang yang suka bicara tarbae-tarbae soal orang laeng ka, ka orang yang suka ambe orang laeng pung barang deng paksa. 11 Satu dua orang dari kamong pung kalakuang dolo macang bagitu. Mar sakarang, Allah su basu kamong barsi dari kotor-kotor tu. Antua su pili kamong jadi Antua pung orang-orang. Antua jua su anggap kamong tu barsi dari dosa. Antua biking samua tu tagal kamong su satu hati deng Tuhan Yesus Kristus, deng tagal Allah yang katong somba pung Roh karja dalang kamong pung hati.
Pake kamong pung badang par puji Tuhan
6:12-20
12 Basudara e! Ada yang bilang kata katong bisa biking apa sa iko katong pung mau. Mar, seng samua hal tu ada pung guna. Jadi, biar kata beta bisa biking apa sa iko beta pung mau, beta seng mau jadi jongos par apa sa. 13 Kamong bilang, “Makanang tu par isi poro la poro tu tampa par isi makanang.b La waktu katong mati, katong nanti seng parlu makanang lai, bagitu lai deng katong pung poro ni. Jadi, katong bisa biking apa sa deng katong pung badang sakarang ni.” Hoe, kamong paleng sabarang! Yang batul tu, katong pung badang ni bukang par tidor deng orang yang bukang katong pung laki ka bini, mar par puji Tuhan. La Antua tu Tuhan par katong pung badang. 14 La Tuhan Allah yang su kasi hidop Tuhan Yesus kombali, Antua tu jua yang nanti kasi hidop katong pung badang ni lai deng Antua pung kuasa.
15 Basudara e! Kamong tau kalo kamong pung badang tu bagiang dari Yesus Kristus pung badang to? Jadi, masa katong musti pake bagiang dari Kristus pung badang tu par tidor deng parampuang tarbae? Sampe ayang pung gigi batumbu jua jang! 16 Ka, jang sampe kamong seng tau kalo sapa yang tidor deng parampuang tarbae, itu sama sa deng dia su jadi satu badang deng parampuang tarbae tu? Barang, Allah pung Tulisang sandiri jua ada bilang, “Dong dua tu su jadi satu.”* 17 Mar, sapa yang jadi satu deng Tuhan, itu pung arti Tuhan pung Roh deng dia pung roh su jadi satu. 18 Jadi, jang coba-coba tidor deng orang yang bukang kamong pung laki ka bini! Barang, dari sagala macang dosa yang manusia biking, seng ada yang biking rusak dia pung badang sandiri macang deng dosa tidor deng orang yang bukang dia pung laki ka bini. 19 Jang lupa kalo kamong pung badang tu sama deng ruma par Allah pung Roh tinggal. Allah sandiri kasi Antua pung Roh tu par katong deng Roh tu tinggal dalang katong satu-satu pung diri. Kamong pung badang tu bukang kamong pung sandiri, 20 tagal Allah su bali kamong deng su bayar kamong lunas. Jadi, kamong musti pake kamong pung badang tu par biking apa yang bae biar Allah dapa puji.