Soal hidop laki-bini
7:1-16
7
1 Basudara e! Sakarang beta mau bicara soal apa yang kamong tanya par beta dalang surat kata, “Itu bagus par laki-laki kalo dia seng kaweng?”a 2 Memang itu bagus. Mar, tagal ada banya orang yang biasa tidor deng orang yang bukang dia pung laki ka bini, labe bae kalo laki-laki sapa sa ada dia pung bini la parampuang sapa sa ada dia pung laki.3 Laki-laki yang su kaweng jang tola kalo kamong pung bini mau tidor deng kamong. Bagitu lai deng parampuang yang su kaweng. Jang tola kalo kamong pung laki mau tidor deng kamong. Kamong satu-satu musti biking apa yang jadi kamong pung tugas par yang laeng. 4 Barang, bini seng ada pung hak par dia pung badang sandiri, mar dia pung laki lai. Bagitu jua deng laki. Dia seng ada pung hak par dia pung badang sandiri, mar dia pung bini lai. 5 Jang laeng tola laeng kalo ada satu yang minta par tidor sama-sama. Mar, kalo kamong su baku akor par barenti sadiki tempo do biar kamong bisa ambe waktu batul-batul par sombayang, itu baru kamong bisa seng tidor sama-sama. Mar abis itu, kamong musti tidor sama-sama kombali, biar Setang pung Raja seng coba kamong par biking dosa. Barang, kamong seng bisa tahang kamong pung napsu. 6 Itu tu beta pung usul sa, bukang parenta. 7 Kalo par beta sandiri, beta labe suka kalo laki-laki samua seng kaweng, sama deng beta. Mar, beta sandiri sadar kalo Allah kasi berkat par sapa sa yang parcaya, satu-satu deng dia pung berkat sandiri-sandiri. Ada yang dapa berkat par kaweng, mar ada yang par seng kaweng.*
8 Sakarang, beta mau bicara par orang-orang yang seng kaweng deng par janda-janda. Beta pikir labe bae kalo kamong tetap macang bagitu tarus, sama deng beta. 9 Mar, kalo kamong seng bisa tahang diri, labe bae kamong kaweng. Barang, labe bae kaweng biar jang sampe kamong pung napsu nai tutu otak.
10 Par orang-orang yang su kaweng, beta mau bilang parenta satu par kamong. Parenta tu bukang dari beta, mar dari Tuhan sandiri. Parenta tu bagini: Bini seng bole paskali buang dia pung laki. 11 Mar, kalo sampe bagitu, dia musti tinggal seng kaweng macang bagitu tarus. Kalo seng, dia musti bale la baku bae kombali deng dia pung laki tu. Bagitu jua deng laki, dia seng bole paskali cere dia pung bini.*
12 Par basudara yang laeng, dengar beta pung nasehat satu ni. Nasehat ni bukang dari Tuhan, mar dari beta sandiri. Nasehat tu bagini: Kalo ada basudara yang parcaya Yesus yang pung bini seng parcaya Yesus, mar kalo dia pung bini tu mau tetap sama-sama deng dia tarus, laki-laki tu seng bole cere dia pung bini tu. 13 Bagitu jua kalo ada basudara parampuang yang pung laki seng parcaya Yesus. Kalo dia pung laki tu mau tetap sama-sama deng dia tarus, parampuang tu seng bole cere dia pung laki tu. 14 Barang, biar kata laki tu seng parcaya, mar Allah su pili dia tagal dia pung bini tu parcaya Yesus. Bagitu jua deng bini yang seng parcaya. Biar kata dia seng parcaya, mar Allah su pili dia tagal dia pung laki tu parcaya Yesus.b Kalo seng macang bagitu, kamong pung anana tu pasti seng jadi Allah pung anana, sama deng orang-orang yang seng parcaya pung anana. Mar sakarang, Allah su pili anana tu jadi Antua pung anana.
15 Mar, kalo laki ka bini yang seng parcaya tu tetap mau cere sa, kasi tinggal dia biking bagitu sa. Dalang hal macang bagitu, basudara parampuang ka laki-laki yang parcaya tu seng taika lai. Mar, Allah panggel katong par hidop dame deng orang laeng. 16 Barang, kamong seng tau apa yang nanti jadi. Yang bini, mangkali kamong nanti bisa tolong kamong pung laki biar dia salamat. Ka yang laki, mangkali kamong nanti bisa tolong kamong pung bini biar dia salamat.
Hidop iko apa yang Allah su ator
7:17-24
17 Basudara e! Tuhan Allah su kasi hidop yang beda-beda par katong satu-satu. Ada yang kaweng, ada yang seng. Ada yang jadi jongos, ada yang seng. Jadi, waktu Antua panggel katong par jadi Antua pung orang-orang, katong musti hidop iko apa yang Antua su ator par katong. Itu tu atorang yang beta ajar di samua jamaat. 18 Conto bagini: Kalo satu orang su dapa sunat do baru Tuhan panggel dia par jadi Antua pung orang, dia seng parlu kasi ilang tanda sunat tu. La orang yang seng dapa sunat waktu Tuhan panggel dia, dia seng parlu dapa sunat par iko Antua lai. 19 Barang, sunat ka seng sunat ka, itu seng panting. Yang panting tu iko Allah pung atorang-atorang. 20 Jadi, labe bae kalo sapa sa tetap hidop macang waktu Allah panggel dia par jadi Antua pung orang.
21 Conto laeng lai, kalo kamong su dapa jual par jadi jongos do baru Tuhan panggel kamong par jadi Antua pung orang, seng apapa. Mar, kalo ada kans par jadi orang bebas, pake akang. 22 Barang, jongos yang Tuhan panggel par jadi Antua pung orang, dia tu su jadi orang bebas tagal Antua su kasi lapas dia dari dosa. Bagitu jua deng orang yang bukang jongos yang Tuhan panggel par jadi Antua pung orang. Dia tu Kristus pung jongos. 23 Tuhan su bali kamong samua deng su bayar kamong lunas. Tagal itu, jang jadi jongos par manusia. 24 Jadi basudara e, kamong satu-satu musti tetap hidop macang waktu Allah panggel kamong par jadi Antua pung orang-orang.
Soal orang yang balong kaweng
7:25-40
25 Sakarang, beta mau bicara soal orang-orang yang balong kaweng. Beta seng dapa parenta apapa dari Tuhan soal dong. Mar tagal Tuhan su kasi unju Antua pung hati bae par beta, kamong bisa parcaya beta. Jadi beta mau kasi nasehat ni. 26 Tagal sakarang ni katong samua yang parcaya Yesus ada susa deng sangsara, jadi labe bae kamong tetap macang sakarang sa. 27 Conto bagini: Kalo ada laki-laki yang su kaweng, jang cere kamong pung bini tu. Kalo ada laki-laki yang balong kaweng, jang cari parampuang par kaweng lai. 28 Mar, kalo sampe dong kaweng jua, itu bukang dosa. Bagitu lai deng parampuang yang balong kaweng. Kalo sampe dong kaweng jua, itu bukang dosa. Cuma, orang-orang yang su kaweng tu nanti sangsara banya dalang hidop ni. Jadi beta kasi nasehat kamong biar kamong jang dapa masala tu.
29 Basudara e! Beta pung maksud bilang samua tu bagini: Katong pung waktu di dunya ni su mau abis. Tagal itu, mulai dari sakarang, laki-laki yang su kaweng musti pake dia pung waktu bae-bae par karja par Tuhan, sama kata dia seng ada pung bini bagitu. 30 Orang yang manangis marata, jang tinggal kong pikir susa tarus. Orang yang barsuka, jang tinggal kong barsuka tarus. Orang yang ada bali apapa satu, jang tinggal kong pikir akang tarus. 31 Deng kata laeng, orang yang sibuk deng sagala macang urusang dalang dunya ni, jang taru kira akang tarus, tagal seng lama lai dunya macang apa yang katong ada lia sakarang ni nanti seng ada lai.
32 Beta mau kamong pung hati tenang. Laki-laki yang seng kaweng bisa batul-batul taru kira Tuhan pung karja, bagemana dia bisa kasi sanang Tuhan pung hati. 33 Mar, laki-laki yang kaweng nanti sibuk deng sagala macang hal dalang dunya ni, bagemana dia bisa kasi sanang dia pung bini pung hati. 34 Jadi, dia pung pikirang tabage. Janda ka parampuang yang balong kaweng bisa batul-batul taru kira Tuhan pung karja. Jadi, dia bisa batul-batul pake dia pung hidop samuac par karja par Tuhan. Mar, parampuang yang su kaweng nanti sibuk deng sagala macang hal dalang dunya ni, bagemana dia bisa kasi sanang dia pung laki pung hati.
35 Beta bilang samua tu par kamong pung bae, bukang par larang kamong. Beta mau kamong biking apa yang batul dalang kamong pung hidop deng mau tolong kamong biking Tuhan pung karja deng pikirang yang seng tabage. 36 Kalo ada laki-laki satu yang rasa kata dia su biking apa yang seng bae par dia pung tunangang tagal su janji mau kaweng mar seng kaweng-kaweng sampe dia pung tunangang tu su tamba tua,d apalai kalo dia sandiri rasa kata dong dua musti kaweng, labe bae dong kaweng sa iko dia pung mau tu. Itu bukang dosa, jadi kasi tinggal dong kaweng sa. 37 Mar, mangkali ada laki-laki satu yang su batul-batul putus dalang hati kalo dia seng parlu kaweng deng dia pung tunangang, apalai kalo dia sandiri rasa kalo dia batul-batul bisa tahang dia pung napsu. Apa yang dia biking tu jua bae, asal seng ada yang paksa dia par biking bagitu. 38 Jadi orang yang kaweng deng dia pung tunangang, dia biking apa yang bae. La orang yang seng kaweng deng dia pung tunangang jua, dia biking apa yang labe bae lai.
39 Parampuang yang su kaweng taika deng dia pung laki kalo dia pung laki tu masi hidop. Mar, kalo dia pung laki tu su mati, dia bebas par kaweng deng laki-laki mana sa yang dia mau, asal laki-laki tu orang yang parcaya Tuhan Yesus. 40 Mar beta pikir, parampuang tu labe sanang kalo dia seng kaweng lai. Beta bilang bagitu tagal beta tau kalo Allah pung Roh tinggal dalang beta pung hati.