Soal daging yang orang su kasi korbang par patong-patong
8:1-13
8
1 Basudara e! Sakarang beta mau bicara soal daging yang orang su kasi korbang akang par patong-patong. Kamong biasa bilang kata katong orang-orang parcaya samua su tau banya hal. Itu memang batul. Cuma, pikirang macang bagitu bisa biking kamong jadi sombong. Mar kalo katong sayang orang laeng, katong kasi kuat dong biar dong labe tamba parcaya. 2 Kalo ada orang yang sangka kata dia su tau banya hal, itu pung arti dia batul-batul masi balong tau apapa. 3 Mar orang yang sayang Allah, Antua pasti kanal dia.4 Jadi, soal daging yang su dapa kasi korbang par patong-patong tu, beta mau bilang bagini: Katong samua tau kalo patong-patong di dunya ni bukang Allah yang batul. Cuma ada Allah satu areng-areng sa. Seng ada yang laeng. 5 Memang batul ada orang yang anggap kalo ada banya allah ka tuhan di langit ka di bumi. 6 Mar par katong yang parcaya, Allah tu cuma satu sa. Antua tu katong pung Bapa, yang biking samua yang ada la katong hidop cuma par Antua. La katong pung Tuhan jua cuma satu sa. Antua tu Yesus Kristus. Lewat Antua, Allah biking samua yang ada ni deng tagal Antua katong bisa hidop.
7 Mar, seng samua orang yang tau soal itu. Ada orang parcaya yang dolo parna somba patong-patong. Jadi, sampe sakarang dong masi parcaya kata kalo dong makang daging yang su dapa kasi korbang par patong-patong, itu sama sa deng dong ada somba patong-patong tu kombali. Dong rasa bardosa waktu makang daging tu tagal dong balong batul-batul kuat. 8 Mar, makanang seng biking katong jadi labe dekat deng Allah. Kalo katong seng makang makanang tu, katong seng rugi apapa. Mar, kalo katong makang jua, katong seng untung apapa.
9 Mar, kamong musti jaga jang sampe orang-orang parcaya yang balong batul-batul kuat tu jatu dalang dosa, tagal kamong bebas par biking apa sa. 10 Tagal bagini: Kamong tau kata kalo makang daging yang su dapa kasi korbang par patong-patong tu seng apapa. Mar conto sa, kamong ada dudu makang daging tu di tampa sombayang par patong-patong tu. Tarus, kalo ada orang parcaya yang balong batul-batul kuat tu lia kamong, dia pasti jadi barani par makang daging tu lai, la tagal itu dia jadi bardosa. Batul ka seng? 11 Jadi, tagal kamong pung tau tu, kamong pung basudara yang parcaya Kristus yang balong kuat tu ancor. Sapa tau bagini, Antua su mati par dia.
12 Kalo kamong biking dosa macang bagitu par kamong pung basudara yang parcaya Yesus yang balong batul-batul kuat sampe dia biking apa yang dia anggap itu sala, itu sama sa deng kamong su biking dosa par Kristus. 13 Jadi, kalo beta pung basudara yang parcaya Yesus jadi bardosa tagal apa yang beta makang, sampe mati jua beta seng mau makang daging tu lai, biar jang tagal beta, beta pung basudara jadi bardosa.