11
1 Jadi basudara e, iko beta pung cara hidop ni, sama deng beta jua iko Kristus pung cara hidop.Atorang par parampuang deng laki-laki dalang ibada
11:2-16
2 Basudara e! Beta sanang tagal kamong salalu inga beta pung hidop deng tetap pegang ajarang-ajarang yang beta su ajar par kamong tu kuat-kuat. 3 Mar beta mau kamong tau soal ini: Yang jadi kapalaa par parampuang tu laki-laki, la yang jadi kapala par laki-laki tu Kristus, la yang jadi kapala par Kristus tu Allah. 4 Jadi, laki-laki sapa sa yang sombayang ka kasi tau pasáng yang dia dapa dari Allah dalang ibada la pake kaeng pantutu kapala, itu dia hina Kristus yang jadi kapala par dia. 5 Mar, parampuang sapa sa yang sombayang ka kasi tau pasáng yang dia dapa dari Allah dalang ibada la seng pake kaeng pantutu kapala, itu dia hina dia pung laki yang jadi kapala par dia. Dia sama deng parampuang yang cukur dia pung rambu. 6 Barang, kalo ada parampuang yang seng mau pake kaeng pantutu kapala dalang ibada, labe bae dia gunting dia pung rambu samua sa. Mar kalo dia rasa kata kalo cukur ka gunting dia pung rambu tu biking malu, labe bae dia pake kaeng pantutu kapala.
7 Mar, laki-laki seng bole tutu dia pung kapala waktu sombayang ka kasi tau Allah pung pasáng, tagal Allah biking dia macang deng Antua pung tabiat biar Allah dapa puji.* Mar parampuang-parampuang musti pake kaeng pantutu kapala biar orang-orang yang lia dia, dong nanti puji-puji dia pung laki. 8 Barang, laki-laki seng asal dari parampuang, mar parampuang asal dari laki-laki.* 9 Antua jua seng biking laki-laki par parampuang, mar Antua biking parampuang par laki-laki.* 10 Tagal itu, parampuang musti pake kaeng pantutu kapala par kasi unju kalo dia taru hormat par dia pung laki,b tagal Tuhan pung malekat-malekat jua ada lia orang-orang parcaya.* 11 Mar biar kata bagitu, par katong yang su satu hati deng Tuhan ni, parampuang seng bisa hidop sandiri lapas dari laki-laki la laki-laki jua seng bisa hidop sandiri lapas dari parampuang. 12 Barang, biar kata parampuang tu asal dari laki-laki, mar abis itu parampuang yang kasi lahir laki-laki. La samua-samua tu asal dari Allah.
13 Coba pikir ini bae-bae! Pantas ka seng kalo ada parampuang yang sombayang par Allah dalang jamaat seng pake kaeng pantutu kapala? 14 Katong samua tau to kata kalo iko katong pung biasa, seng pantas kalo laki-laki pung rambu panjang.c 15 Mar kalo parampuang pung rambu panjang, orang puji-puji dia. Barang, Tuhan kasi rambu panjang par dia sama deng pantutu kapala.
16 Mar kalo ada orang yang mau baku malawang soal ini, beta mau bilang bagini: Kalo iko katong pung biasa, parampuang musti pake kaeng pantutu kapala dalang ibada sama-sama. Allah pung jamaat-jamaat yang laeng jua biasa biking bagitu lai. Seng ada yang laeng dari itu.
Cara yang pantas par makang roti deng minong anggor par inga Tuhan Yesus
11:17-33
17 Basudara e! Beta mau bilang apapa satu par kamong, mar beta seng bisa puji kamong soal apa yang beta mau bilang ni. Barang, waktu kamong bakumpul par ibada sama-sama, akang seng ada pung hasil yang bae mar hasil yang tarbae. 18 Barang, beta dengar kalo waktu kamong bakumpul par ibada, kamong ada baku tatoki satu deng laeng. Beta kira, dari apa yang beta dengar tu ada yang batul kapa? 19 Memang kamong musti tapica-pica satu deng laeng, biar bisa dapa tau sapa-sapa dari kamong yang batul-batul parcaya Kristus. 20 Waktu kamong bakumpul sama-sama, kamong makang roti deng minong anggor. Mar, kamong seng makang deng minong par batul-batul inga Tuhan Yesus yang su mati par katong tu. 21 Barang, samua orang manggurebe makang dia pung makanang kamuka, sampe seng ada orang yang inga par bage dia pung makanang deng orang laeng. Jadi, ada orang yang lapar mar yang laeng minong sampe mabo. 22 Hoe! Kamorang tar ada pung ruma par makang deng minong ka? Ka jang sampe kamorang mau hina Allah pung jamaat? Ka, kamorang mau biking malu orang-orang yang tar ada pung apapa kapa? Jadi beta musti bilang apa par kamorang? Beta musti puji-puji kamorang? Jang harap!
23 Barang, apa yang beta su ajar par kamong tu, beta tarima akang dari Tuhan sandiri. Itu malang, waktu Tuhan Yesus mau dapa jual, Antua ambe roti 24 la minta dangke dari Allah. Tarus, Antua pata-pata la bage-bage akang par Antua pung murid-murid. Antua bilang par dong kata, “Roti ni Beta pung badang yang Beta kasi par tabus kamong pung dosa. Kamong musti jaga biking ini tarus par inga Beta!”
25 Waktu dong su abis makang, Antua ambe cawan yang isi anggor la biking apa yang sama waktu Antua ambe roti. Antua bilang kata, “Anggor ni Beta pung dara yang nanti tatumpa par kasi sah janji yang baru yang Allah ika deng manusia.* Sabang kali kamong minong anggor ni, kamong musti inga Beta.”
26 Barang, sabang kali kamong makang roti deng minong anggor dalang cawan tu, itu sama sa deng kamong kasi tau Tuhan Yesus pung kamatiang. Deng cara bagitu, kamong kasi tau orang-orang soal Tuhan Yesus tarus sampe Antua bale kombali. 27 Jadi, sapa sa yang makang Tuhan pung roti deng minong Antua pung anggor deng cara yang seng pantas, dia su bardosa par Tuhan, tagal dia seng taru hormat par Antua pung badang deng Antua pung dara. 28 Tagal itu, satu-satu musti pariksa dia pung diri do, baru makang roti deng minong anggor dari cawan tu. 29 Kalo sapa makang roti deng minong anggor tu mar seng taru hormat par Tuhan Yesus pung badang, Allah nanti hukum dia. 30 Justru tagal itu sampe banya dari kamong yang seng kuat, kana panyaki, deng ada babarapa yang mati. 31 Jadi kalo katong pariksa katong pung diri, Allah nanti seng hukum katong. 32 Mar, kalo Antua hukum katong sakarang, Antua pung maksud par ajar katong par biking apa yang batul biar katong nanti seng dapa hukum sama-sama deng orang-orang yang seng parcaya.
33 Tagal itu basudara e, kalo kamong ada bakumpul par makang roti deng minong anggor par inga Tuhan Yesus, kamong musti tunggu yang laeng lai. 34 Kalo ada yang lapar, labe bae dia makang di dia pung ruma kamuka do, biar kamong jang bakumpul par dapa hukum. Soal hal-hal laeng, beta nanti bilang akang waktu beta datang par kamong.