Paulus kasi tau Kabar Bae soal Yesus par orang-orang di Korintus
18:1-17
18
1 Abis dari kota Atena, Paulus pi ka kota Korintus. 2 Di kota tu, ada orang Yahudi satu. Dia pung nama Akwila. Dia asal dari propinsi Pontus. Dia baru datang dari propinsi Italia deng dia pung bini. Dia pung bini nama Priskila. Dong baru datang di Korintus tagal Raja Basar Klaudius parenta samua orang Yahudi musti kaluar dari kota Roma. Waktu Paulus sampe di kota tu, dia pi mangente dong dua. 3 Dong dua tu tukang biking tenda macang deng Paulus lai. Jadi, Paulus tinggal sama-sama deng dong la biking tenda deng dong. 4 Waktu orang Yahudi pung hari Barenti Karja, Paulus jaga pi ka tampa sombayang. Di tampa tu dia baku tukar pikirang deng orang-orang Yahudi deng orang-orang yang bukang Yahudi. Dia bicara deng dong la usaha biar dong parcaya Tuhan Yesus.5 Waktu Silas deng Timotius datang dari propinsi Makedonia, Paulus seng karja tenda lai, mar pake dia pung waktu samua par kasi tau Kabar Bae soal Yesus par orang-orang Yahudi. Dia bilang kata, “Basudara e! Yesus tu Orang yang Allah su Angka par Kasi Salamat Manusia.”
6 Mar orang-orang Yahudi seng suka apa yang dia bilang tu. Dong malawang deng hina-hina dia. Jadi, dia kabas abu dari dia pung baju biar dong tau kalo dia su seng mau pusing deng dong lai la bilang kata, “Kalo Allah hukum kamong, itu kamong pung sala sandiri, bukang beta pung sala. Barang, beta su kasi tau Kabar Bae soal Yesus par kamong, mar kamong seng mau tarima akang. Dari oras ni, beta mau pi par orang-orang yang bukang Yahudi.”
7 Jadi, Paulus pi kasi tinggal dong la pi ka ruma satu yang ada di sabala tampa sombayang tu. Orang yang pung ruma tu nama Titius Yustus. Dia ni bukang orang Yahudi mar somba Allah. 8 Krispus, kapala tampa sombayang, deng samua orang yang ada di dia pung ruma jadi parcaya Tuhan Yesus. Orang-orang di Korintus jua banya lai yang dengar Paulus pung ajarang. Dong jadi parcaya Yesus la kasi diri par dapa baptis.
9 Satu malang bagini, Tuhan Yesus datang kasi unju rupa par Paulus la bilang kata, “Paulus e, jang taku, mar kasi tau Kabar Bae soal Beta tarus deng jang tado. 10 Barang Beta ada tarus deng ale, jadi seng ada satu orang lai yang bisa biking jahat par ale. Tagal di kota ni ada banya orang yang Beta su pili par nanti jadi Beta pung orang-orang.” 11 Jadi, Paulus tinggal di situ satu taong anam bulang, kasi balajar dong soal Allah pung ajarang.
12 Mar waktu Galio jadi gubernur di propinsi Akaya, orang-orang Yahudi baku akor par malawang Paulus la bawa dia ka muka Galio par kasi sidang dia. 13 Dong bilang kata, “Dia ini to ada buju deng kasi balajar orang-orang par somba Allah deng cara yang baku tasala deng atorang-atorang dalang Kitab Torat.”
14 Waktu Paulus mau bicara, Gubernur Galio bilang par orang-orang Yahudi kata, “Hoe, kamong orang-orang Yahudi! Kalo kamong lapor orang pung parkara kacil ka sala basar yang dong su biking, beta pasti dengar akang. 15 Mar parkara yang kamong ada bawa ni cuma soal orang pung kata-kata, nama-nama, deng kamong pung atorang sandiri. Jadi, labe bae kamong urus akang sandiri sa. Beta seng mau pastiu par ator akang.”
16 Jadi, dia user dong kaluar dari tampa sidang tu. 17 Tarus, dong samua pi tangkap Sostenes, yang jadi orang Yahudi pung kapala tampa sombayang. Dong pukul dia di muka tampa sidang tu, mar Galio seng pastiu sadiki lai deng dong.
Paulus bale kombali ka Antiokia
18:18-23
18 Paulus tinggal lama lai di kota Korintus. Abis itu, dia minta diri dari basudara yang iko Yesus di tampa tu la pi ka kota Kengkrea. Sampe di Kengkrea, Paulus pi cukur dia pung rambu kasi botak iko dong pung atorang agama, par jadi tanda kalo dia su abis biking satu hal yang dia parna janji par Allah.* Abis itu, dia pi balayar deng Priskila deng Akwila ka propinsi Siria. 19 Sampe di kota Efesus, Paulus kasi tinggal Priskila deng Akwila. Abis itu, dia pi maso ka orang Yahudi pung tampa sombayang la baku tukar pikirang deng orang-orang Yahudi di situ. 20 Dong minta dia tinggal sadiki lama di kota tu, mar dia seng mau. 21 Mar biar bagitu, waktu dia mau pi, dia bilang par dong kata, “Basudara e, kalo Allah mau, beta nanti datang kamari lai.” Abis bilang bagitu, dia nai kapal pi kasi tinggal kota tu.
22 Waktu sampe di kota Kaisarea, Paulus turung la pi ka kota Yerusalem par mangente jamaat di situ. Tarus, dia pi ka kota Antiokia. 23 Dia tinggal di Antiokia lama lai baru pi koliling samua tampa yang ada di propinsi Galatia deng daera Frigia par kasi kuat orang-orang parcaya pung hati biar dong parcaya Yesus tarus.
Apolos di Efesus deng Akaya
18:24-28
24 Waktu itu, ada orang Yahudi satu yang pi ka kota Efesus. Dia pung nama Apolos. Dia asal dari kota Aleksandria. Dia pintar bicara deng batul-batul tau Allah pung Tulisang. 25 Orang-orang su kasi balajar dia soal bagemana Tuhan kasi salamat manusia, jadi dia su tau sadiki soal Tuhan Yesus pung ajarang. Dia kasi balajar orang-orang soal Yesus deng samangat paskali. Apa yang dia kasi balajar tu, akang batul. Mar dia cuma tau kalo Yohanis Tukang Baptis tu baptis orang yang kasi tinggal dia pung dosa-dosa.
26 Sampe di kota Efesus, dia kasi balajar orang soal Yesus di orang Yahudi pung tampa sombayang. Dia kasi balajar deng barani paskali. Waktu Priskila deng Akwila dengar apa yang Apolos ajar tu, dong panggel dia datang ka dong pung ruma. La dong dua kasi balajar dia labe jelas lai soal bagemana Allah kasi salamat manusia lewat Yesus.
27 Abis babarapa waktu, Apolos mau pi ka propinsi Akaya. Jadi, basudara yang iko Yesus di Efesus tu kiring surat par orang-orang yang iko Yesus di Akaya biar dong tarima dia bae-bae. Waktu dia sampe, dia banya tolong dong sampe dong pung parcaya labe kuat lai. Dong bisa jadi parcaya, tagal Tuhan Yesus kasi unju Antua pung berkat basar par dong. 28 Dia deng samangat paskali baku soal jawab deng orang-orang Yahudi di muka orang banya soal Yesus sampe dia kasi kala orang-orang Yahudi tu. Barang, dia kasi unju par dong kalo dalang Allah pung Tulisang ada bilang kata Yesus tu, Orang yang Allah su Angka par Kasi Salamat Manusia.