2
1 Jadi, beta su putus dalang hati kalo beta seng mau datang la tagor kamong deng karas lai sampe kamong pung hati ancor. 2 Beta bilang bagitu tagal kalo beta biking kamong pung hati ancor, sapa lai yang bisa biking beta pung hati sanang kalo bukang kamong yang beta su kasi ancor kamong pung hati? 3 Tagal itu kong beta tulis surat satu waktu itu, biar jang sampe waktu beta datang par kamong la lia kamong pung hidop, beta pung hati ancor. Sapa tau, kamong tu yang musti biking beta pung hati sanang. Beta kanal kamong samua, jadi beta parcaya kata kalo beta pung hati sanang, kamong pung hati jua pasti sanang lai. 4 Beta paleng balisa deng paleng susa paskali deng kamong sampe beta manangis tahek-hek waktu tulis surat tu. Beta seng tulis surat tu par biking kamong pung hati susa, mar biar kamong tau kalo beta paleng sayang kamong.Jamaat Korintus musti kasi ampong orang yang biking dosa
2:5-11
5 Basudara e! Orang yang biking dosa dalang jamaat, dia bukang cuma biking beta pung hati susa sa, mar dia jua biking kamong samua pung hati susa, ka paleng kurang satu dua orang dari kamong. Beta bilang bagini tagal beta seng mau talalu karas par dia. 6 Banya dari kamong su tagor dia, jadi beta kira itu sa su sampe. 7 Jadi sakarang kamong musti kasi ampong dia deng kasi kuat dia pung hati, biar jang dia pung hati susa talalu sampe dia pung samangat par parcaya Tuhan tu pata. 8 Tagal itu, beta minta deng sunggu-sunggu dari kamong par kasi unju kalo kamong batul-batul sayang dia. 9 Ini ni alasang mangapa kong beta tulis surat par kamong waktu itu, par mau cari tau kata kamong dengar-dengarang samua yang beta bilang ka seng. 10 La kalo kamong kasi ampong dia pung sala, beta jua kasi ampong dia lai, kalo memang ada yang beta musti kasi ampong. Beta kasi ampong dia par kamong pung bae la Kristus jadi saksi soal apa yang beta biking tu. 11 Beta biking bagitu biar Setang pung Raja jang kasi bodo katong, tagal katong tau dia pung rencana jahat.
Paulus seng cari untung dari Allah pung kata-kata
2:12-17
12 Waktu beta sampe di kota Troas par kasi tau Kabar Bae soal Kristus, beta lia kalo Tuhan su buka jalang par beta par karja di sana. 13 Mar beta pung hati rasa seng tenang, tagal beta seng baku dapa beta pung sudara Titus di sana la dengar kabar yang dia bawa dari kamong. Tagal itu beta patae dari sana la datang ka propinsi Makedonia ni.*
14 Mar dangke banya par Allah yang karja lewat Kristus par kasi kala Setang pung Raja la salalu pimping katong par bajalang di muka samua-samua par jadi tanda kalo Antua su manang. La Antua pake katong par pi kasi tau Kabar Bae soal Antua ka mana-mana biar orang-orang bisa kanal Antua. Waktu dong dengar Kabar Bae tu, itu sama sa deng dong ada ciong bobou sadap dari katong. 15 Barang, waktu katong ni kasi tau Kabar Bae soal Kristus, katong jadi macang deng kamanyaang yang bobou sadap par Allah. Orang-orang yang dapa kasi salamat deng yang mau binasa samua bisa ciong bobou tu. 16 Par orang-orang yang mau binasa, katong ni macang deng bobou bangke busu, tagal Allah nanti kasi binasa dong. Mar par orang-orang yang dapa kasi salamat, katong ni macang deng bobou sadap, tagal Allah nanti biking dong hidop tarus-tarus deng Antua. Mar sapa tu yang bisa biking tugas macang bagitu deng dia pung kuat sandiri? 17 Katong seng sama deng orang laeng yang papalele Allah pung kata-kata par cari untung. Mala katong yang su satu hati deng Kristus, katong bilang apa yang Allah parenta katong musti bilang. Katong biking akang deng hati barsi, bukang par cari untung dari situ. Antua sandiri jadi saksi dari apa yang katong su biking tu.