Paulus pung Surat Kadua par Jamaat di
Korintus
Tabea
1:1-2
1
1-2 Par Allah pung jamaat yang ada di kota Korintus deng par Antua pung orang-orang samua di propinsi Akaya.Tabea! Beta ni Paulus yang Allah su pili par jadi Yesus Kristus pung utusang iko Antua pung mau. Beta deng katong pung sudara Timotius minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.
Paulus minta dangke dari Allah
1:3-11
3 Basudara e! Mari katong puji-puji Allah! Antua tu Tuhan Yesus Kristus yang katong somba pung Bapa. Antua tu Bapa yang salalu kasi unju Antua pung hati bae par katong. Antua tu jua Allah yang salalu kasi kuat katong pung hati. 4 Antua kasi kuat katong waktu katong dapa sagala macang susa deng sangsara. Antua biking bagitu biar katong jua bisa kasi kuat orang laeng yang ada dalang sagala macang susa deng sangsara, macang deng Antua kasi kuat katong. 5 Barang, sama deng katong seng putus-putus dapa susa deng sangsara macang deng Kristus, Allah jua seng putus-putus kasi kuat katong pung hati lewat Kristus. 6 Jadi kalo katong susa deng sangsara, itu biar katong bisa kasi kuat kamong pung hati deng biar kamong salamat. Kalo Allah kasi kuat katong pung hati, itu biar katong jua bisa kasi kuat kamong pung hati lai. La deng bagitu, kamong bisa jadi kuat par sabar deng tahang hati tanggong susa deng sangsara yang sama deng yang katong dapa. 7 Tagal itu, katong batul-batul parcaya kalo kamong seng tagoyang sadiki lai dari kamong pung parcaya. Barang, katong tau kata kalo kamong susa deng sangsara macang katong, Tuhan jua nanti kasi kuat kamong pung hati macang Antua kasi kuat katong pung hati.
8 Katong bilang samua tu tagal katong mau kamong samua tau soal katong pung susa deng sangsara, waktu katong ada di propinsi Asia, basudara e. Akang paleng basar deng barát, labe dari yang katong bisa pikol, sampe katong pung samangat pata tagal katong pikir kata katong pasti mati.* 9 Mala katong rasa macang kata katong su dapa putus par dapa hukum mati. Samua tu jadi biar katong jang taru harap par diri sandiri, mar cuma par Allah yang pung kuasa par kasi hidop orang-orang yang su mati. 10 Antua su kasi salamat katong deng pasti kasi salamat katong kombali dari susa deng sangsara yang amper-amper kasi mati katong tu. Katong cuma taru harap par Antua, kalo Antua pasti kasi salamat katong lai, 11 tagal kamong jua tolong katong deng kamong pung sombayang-sombayang. La banya orang nanti puji-puji Antua tagal Antua kasi unju Antua pung hati bae par kasi salamat katong. Itu bisa jadi tagal Antua dengar dong pung sombayang-sombayang par katong.
Paulus roba dia pung rencana par datang lia jamaat Korintus
1:12—2:4
12 Basudara e! Katong sanang tagal katong tau dari dalang hati kalo katong pung hidop batul deng pung hati barsi par samua orang di dunya ni, labe-labe lai par kamong, tagal Allah tolong katong. Katong bisa biking bagitu bukang tagal katong pake manusia pung pikirang tajang, mar tagal Allah pung hati bae par katong. 13-14 Apa yang katong tulis par kamong tu seng ada yang kamong seng bisa baca ka mangarti akang. Kamong su mangarti sadiki soal katong pung hati, jadi beta harap kamong bisa batul-batul mangarti katong pung hati. Deng bagitu, waktu Tuhan Yesus bale kombali, kamong nanti bisa puji katong, sama deng katong nanti puji kamong.
15-16 Tagal beta batul-batul parcaya soal itu, beta parna rencana par datang lia kamong dua kali, biar kamong dapa berkat jua dua kali. Waktu itu, beta rencana singga par lia kamong do baru pi ka propinsi Makedonia, baru bale singga sakali lai abis dari Makedonia, biar kamong bisa bantu apa yang beta parlu par pi ka propinsi Yudea. 17 Memang waktu itu beta rencana bagitu, mar beta musti roba beta pung rencana tu. Jadi, jang sampe kamong pikir kata beta biking beta pung rencana tu asal-asal sa. Ka, jang sampe kamong pikir kata beta biking rencana tu iko beta pung mau sandiri, macang deng orang-orang yang seng bisa pegang dong pung kata-kata, yang bilang “Iya” mar abis itu bilang “Seng”. 18 Mar sama deng Tuhan Allah yang salalu pegang Antua pung kata-kata, katong jua salalu pegang katong pung kata-kata. Katong seng asal bilang “Iya” sa la abis itu bilang “Seng”. 19 Beta bilang bagini tagal Allah pung Ana Yesus Kristus yang beta, Silas,a deng Timotius* kasi tau par kamong tu bukang orang yang seng bisa pegang Antua pung kata-kata. Antua seng bilang “Iya” la abis itu bilang “Seng”. Antua salalu bilang “Iya” par apa yang Antua bilang. 20 Barang lewat Kristus, Allah biking Antua pung janji-janji samua. Itu sama sa deng Antua ada bilang “Iya”. Tagal itu, katong bilang “Amin! Itu batul!” par puji-puji Allah tagal Kristus.
21 Allah sandiri yang biking katong deng kamong sama-sama tetap parcaya Kristus deng seng tagoyang sadiki lai. Antua angka katong jadi Antua pung orang-orang. 22 Antua kasi Antua pung Roh par tinggal dalang katong pung hati, macang deng cap par kasi unju kalo katong ni Antua pung. Antua kasi Antua pung Roh tu biar katong batul-batul parcaya kalo samua yang Antua su janji tu, Antua nanti kasi.
23 Basudara e! Tuhan Allah jadi saksi par beta. Antua tau beta pung hati kalo beta seng bale ka Korintus par lia kamong tu, itu tagal beta seng mau tagor kamong deng karas. 24 Beta bilang bagini bukang tagal beta mau biking diri macang deng bos yang mau ator-ator kamong soal kamong pung parcaya. Mar, katong cuma mau karja sama-sama deng kamong biar kamong pung hati batul-batul sanang, tagal katong tau kalo kamong batul-batul parcaya Kristus.