Allah pung anana ada pung hak par tarima apa yang Antua janji
4:1-7
4
1 Basudara e! Beta kasi conto satu lai. Akang bagini: Kalo ada satu orang yang ada pung hak par tarima harta pusaka dari dia pung bapa, mar kalo dia masi kacil paskali, dia seng beda jau deng jongos biar kata samua tu dia pung harta lai. 2 Barang, orang laeng yang jaga dia deng ator dia pung harta samua tu sampe waktu yang dia pung bapa su putus par dia ator dia pung harta sandiri. 3 Bagitu lai deng katong. Waktu katong balong parcaya Yesus, katong samua macang deng ana kacil yang dapa parenta dari dunya pung atorang-atorang. 4 Mar pas waktu yang Allah su putus, Antua utus Antua pung Ana par datang ka dunya ni. Ana tu lahir dari parampuang satu. Dia lahir jadi orang Yahudi, yang hidop iko atorang-atorang dalang Hukum Torat. 5 Ana tu datang ka dunya par kasi lapas orang-orang dari Hukum Torat. Dia biking bagitu biar katong bisa jadi Allah pung anana. 6 La tagal katong ni Allah pung anana, Antua utus Antua pung Ana pung Roh par tinggal dalang katong pung hati. Roh tu karja dalang katong pung hati sampe katong bisa panggel Antua, “Sio Bapa, Bapa e!” 7 Jadi kamong tu bukang jongos lai, mar Allah pung anana. La tagal kamong tu Antua pung anana, kamong ada pung hak par tarima samua harta pusaka yang Antua su janji tu.Paulus pung hati susa par orang-orang Galatia
4:8-20
8 Basudara e! Dolo-dolo waktu kamong balong kanal Allah, kamong kasi biar kamong pung diri par dapa parenta dari sagala macang hal yang kalo iko batul, itu bukang Allah. 9 Mar sakarang kamong su kanal Allah, ka yang labe pas lai Allah su kanal kamong. Jadi, mangapa kong kamong mau bale hidop iko adat-adat deng atorang-atorang yang seng ada pung arti deng yang seng bisa biking apapa tu lai? Mangapa kong kamong mau dapa parenta dari akang lai? 10 Kamong rajing biking orang Yahudi pung hari-hari basar yang jadi sabang minggu, bulang, musing, deng taong. 11 Beta taku jang sampe samua yang beta su ajar par kamong tu parcuma sa.
12 Jadi basudara e, beta minta deng sunggu-sunggu dari kamong par iko beta pung conto par seng taika deng orang Yahudi pung adat-adat deng atorang-atorang lai. Barang, beta jua su jadi macang deng kamong yang dolo seng taika deng akang.
Kamong seng parna biking sala apapa par beta. 13 Kamong masi inga ka seng kalo dolo beta musti tinggal deng kamong tagal beta saki? Tagal itu tu sampe beta bisa kasi tau Allah pung Kabar Bae par kamong. 14 Beta pung saki tu biking kamong susa, mar kamong seng gali beta sadiki lai ka bale balakang dari beta. Mala kamong tarima deng jaga beta bae-bae macang kata beta ni Allah pung malekat satu ka Yesus Kristus sandiri. 15 Waktu itu kamong pung hati paleng sanang paskali sampe kalo bisa par cungkel kamong pung biji mata la kasi akang par beta, pasti kamong biking akang. Mar sakarang ni, mangapa kong kamong su seng sama macang waktu itu lai? 16 Jang sampe kamong su anggap beta ni kamong pung musu tagal beta kasi tau apa yang batul par kamong kapa?
17 Orang-orang yang kasi balajar orang Yahudi pung atorang-atorang tu ada usaha sunggu-sunggu par buju kamong par iko dong. Mar dong biking bagitu deng maksud seng bae. Dong biking bagitu tagal dong mau kasi pisa kamong dari beta, biar kamong bisa sunggu-sunggu iko dong. 18 Memang bagus kalo kamong usaha sunggu-sunggu par biking apa yang batul. Kamong musti biking bagitu tarus, mar jang cuma waktu beta ada sama-sama deng kamong sa.
19 Sio anana jantong hati e! Beta rasa saki paskali lai tagal kamong, macang deng parampuang yang mau kasi lahir ana. Saki ni seng bisa ilang sampe kamong pung tabiat sama deng Kristus. 20 Beta rindu paskali ada sama-sama deng kamong samua sakarang ni, biar beta bisa roba beta pung cara bicara par kamong. Barang, beta su seng tau mau bicara deng cara bagemana lai par kamong.
Hagar deng Sara jadi conto soal Allah pung janji
4:21-31
21 Hoe basudara yang inging hidop iko Hukum Torat! Beta mau tanya kamong do. Kamong batul-batul mangarti akang pung isi ka seng? 22 Barang, di situ ada bilang kalo Abraham pung ana laki-laki ada dua. Satu pung mama par jongos yang nama Hagar, la satu lai pung mama par yang bukang jongos yang nama Sara. 23 Ana yang lahir dari jongos tu, dia lahir tagal manusia pung mau. Mar ana yang lahir dari parampuang yang bukang jongos tu, dia lahir tagal Allah pung janji par Abraham. 24 Parampuang dua tu bisa jadi conto soal Allah pung dua janji. Hagar sama deng janji yang Allah biking di gunung Sinai waktu Antua kasi Hukum Torat par orang-orang Yahudi lewat Musa. Jadi, orang-orang yang iko Hukum Torat tu, dong macang deng Hagar pung anana yang jadi jongos. 25 Hagar tu jua sama deng gunung Sinai yang ada di tana Arab.a Dia tu jua sama deng kota Yerusalem yang ada di dunya ni.b Barang, sama deng Hagar deng dia pung anana tu jongos, orang-orang Yerusalem yang iko Hukum Torat biar dong bisa hidop batul di muka Allah, dong tu jua macang deng jongos par Hukum Torat tu lai. 26 Mar Sara, dia sama deng Yerusalem yang ada di sorga.c Dia tu bukang jongos, jadi dia pung anana jua bukang jongos lai. Dia tu yang jadi katong pung mama, tagal katong seng taika deng Hukum Torat lai. 27 Barang, Allah pung Tulisang ada bilang kata,
“Hoe parampuang yang seng bisa pung ana, yang seng parna kasi lahir ana e!
Ose pung hati tu paleng sanang.
La se yang seng parna rasa kata kasi lahir ana tu akang pung saki bagemana e!
Mari manyanyi barsuka basar-basar.
Barang, parampuang yang dapa kasi tinggal dari dia pung laki,d
dia nanti ada pung ana labe dari parampuang yang ada pung laki.”*
28 Jadi basudara e, kamong jadi Allah pung anana tagal Antua su janji, sama deng Isak yang lahir tagal Allah su janji par Abraham. 29 Dolo, Hagar pung ana yang lahir tagal manusia pung mau tu siksa Sara pung ana yang lahir tagal Tuhan pung Roh pung kuasa.* Bagitu lai deng sakarang ni.e 30 Mar Allah pung Tulisang su bilang kata, “Pi user akang jongos parampuang tu lapis deng dia pung ana! Dia pung ana tu seng bole tarima bagiang dari harta pusaka sama-sama deng parampuang yang bukang jongos tu pung ana.”f
31 Jadi basudara e, katong ni bukang jongos parampuang tu pung anana, mar yang bukang jongos tu pung anana, tagal katong su parcaya Yesus deng seng taika lai deng Hukum Torat.