Yesus Kristus su kasi bebas katong dari Hukum Torat
5:1-15
5
1 Basudara e, Kristus su kasi bebas katong dari Hukum Torat yang biking katong macang deng jongos tu, biar katong batul-batul bebas. Jadi, kasi kuat kamong pung hati deng jang kasi biar hal-hal macang bagitu parenta kamong macang deng jongos lai.2 Dengar bae-bae apa yang beta Paulus bilang ni: Kalo kamong kasi diri par dapa sunat,a itu sama sa deng kamong anggap apa yang Kristus biking tu seng ada pung arti apapa. 3 Beta ulang sakali lai par kamong: Sapa yang kasi diri par dapa sunat, dia musti iko atorang-atorang dalang Hukum Torat samua. 4 Kamong seng satu hati deng Kristus lai kalo kamong taru harap par Hukum Torat biar Allah anggap kamong pung hidop batul. Kalo kamong biking bagitu, kamong su kasi talapas diri dari Allah pung berkat basar tu. 5 Mar par katong, Allah pung Roh karja dalang katong pung hati sampe katong bisa taru harap par Allah kalo Antua nanti biking katong pung hidop batul tagal katong parcaya Kristus. Itu tu yang katong ada tunggu-tunggu. 6 Barang, kalo katong su satu hati deng Yesus Kristus, dapa sunat ka seng dapa sunat ka, itu seng ada pung arti apapa lai. Yang panting tu cuma parcaya Yesus Kristus la kasi unju akang lewat katong pung sayang par orang laeng.
7 Dolo kamong usaha sunggu-sunggu par hidop iko Allah pung ajarang yang batul. Mar sakarang, mangapa kong kamong su seng iko akang lai? Sapa yang su buju kamong par biking bagitu? 8 Yang buju kamong tu pasti bukang Allah yang su panggel kamong par jadi Antua pung anana tu. 9 Orang biasa bilang kata ragi sadiki sa bisa biking tarigu nai. Bagitu lai deng ajarang yang seng batul. Lama-lama akang bisa kasi rusak kamong pung pikirang samua.* 10 Mar tagal kamong samua su satu hati deng Tuhan Yesus, beta batul-batul parcaya kalo kamong seng iko ajarang yang seng batul tu. Mar sapa yang biking bingong kamong, Allah nanti hukum dia biar kata dia tu sapa lai.
11 Mar beta, basudara e, beta seng kasi balajar kalo orang musti dapa sunat. Kalo memang beta kasi balajar soal itu, yo mangapa kong orang-orang Yahudi masi biking susa beta? Mar, beta kasi balajar kalo Yesus mati di kayo salib biar Allah bisa anggap katong pung hidop batul. Ini yang jadi masala basar par dong. 12 Labe bae dong yang biking pusing kamong tu kapadu dong pung diri sandiri!b
13 Basudara e, kamong memang su dapa pili par bebas dari Hukum Torat. Mar, jang pikir kata tagal kamong su bebas la kamong bisa pake itu par jadi alasang par biking apa sa iko kamong pung tabiat hidop yang bardosa pung mau. Bukang bagitu basudara e! Mala tagal kamong baku sayang satu deng laeng, kamong musti laeng tolong laeng tarus. 14 Barang, antero Hukum Torat tu ada dalang parenta satu ni, “Sayang orang laeng macang deng kamong sayang kamong pung diri sandiri!”* 15 Mar, kalo sampe kamong tinggal kong baku gigi ka baku rabe macang anjing deng tusa, ingatang bae-bae jang sampe yo laeng kasi ancor laeng.
Orang parcaya musti hidop iko Tuhan pung Roh pung mau
5:16-26
16 Basudara e, beta mau bilang ini par kamong. Kamong musti hidop iko Tuhan pung Roh pung mau. Kalo kamong biking bagitu, kamong seng biking apa sa iko kamong pung tabiat hidop yang bardosa tu pung mau. 17 Barang, manusia pung tabiat hidop yang bardosa tu pung mau seng baku tamakang deng Tuhan pung Roh pung mau. Bagitu lai deng Tuhan pung Roh pung mau seng baku tamakang deng manusia pung tabiat hidop yang bardosa tu pung mau. Dua-dua tu seng baku tamakang dalang kamong pung diri sampe sabang kali kamong mau biking apa yang kamong mau, kamong seng bisa biking akang.* 18 Mar kalo kamong kasi biar Tuhan pung Roh pimping kamong, kamong seng taika deng Hukum Torat tu lai.
19 Basudara e! Apa yang manusia biking kalo dia pung tabiat hidop yang bardosa tu ator dia, akang kantara paskali. Conto: tidor deng orang yang bukang dia pung laki ka bini, pikirang kotor, hidop iko dia pung napsu, 20 somba patong-patong, pake-pake, baku musu deng orang laeng, suka baku bakalai, jalus, takiri-kiri, pikir diri sandiri, suka baku tatoki deng orang laeng, tapica-pica dalang kalompok-kalompok, 21 mangiri, pamabo, pesta pora, deng laeng-laeng lai. Soal samua tu, beta mau kasi inga kamong kombali sama deng apa yang beta parna bilang dolo: Sapa yang hidop macang bagitu, dia seng bisa jadi Allah pung orang-orang waktu Antua pegang parenta jadi Raja.
22 Mar kalo manusia hidop iko Tuhan pung Roh pung mau, dia pung hidop tu bagini: sayang orang laeng, hati sanang, hati dame, sabar, suka tolong orang, hidop bae deng orang, orang bisa parcaya dia, 23 hidop manis-manis deng orang laeng, deng bisa tahang hati. Seng ada satu hukum lai yang bisa bilang kalo hal-hal macang bagitu tu sala. 24 Sapa yang su jadi Yesus Kristus pung orang, itu sama sa deng dia su paku dia pung tabiat hidop yang bardosa di kayo salib, lapis deng akang pung sagala macang napsu deng mau. 25 Tuhan pung Roh su biking katong pung hidop jadi baru. Tagal itu, mari katong kasi biar katong pung diri ni dapa pimping dari Tuhan pung Roh. 26 La jang anggap diri labe panting dari orang laeng, jang laeng biking laeng pung hati ancor, deng jang laeng culas laeng.