Orang-orang yang parcaya Yesus Kristus musti hidop iko apa yang Allah bilang tagal dong su jadi satu
4:1-6
4
1 Basudara e! Allah su kasi unju Antua pung hati bae par kamong samua. Tagal itu, beta yang sakarang ada dalang bui tagal karja par Tuhan Yesus Kristus ni mau minta deng sunggu-sunggu dari kamong samua soal satu hal ni. Beta minta biar kamong hidop sama deng apa yang pantas par Allah pung orang-orang, tagal Antua su pili kamong jadi Antua pung orang-orang. 2 Kamong musti salalu anggap diri seng pung arti apapa deng hidop manis-manis deng orang laeng. Kamong jua musti sabar deng seng inga-inga orang laeng pung sala biar kamong bisa baku sayang.* 3 Tuhan Allah pung Roh su ika kamong samua jadi satu, jadi kamong musti usaha sunggu-sunggu biar kamong jang bakalai mar hidop dame satu deng laeng. 4 Katong samua ni sama deng satu badang. Katong samua sama-sama tarima Tuhan Allah pung Roh. Katong jua ada harap par tarima berkat yang sama yang Antua su janji waktu Antua pili katong jadi Antua pung orang-orang. 5 Katong samua pung Tuhan cuma satu. Katong samua sama-sama parcaya Yesus Kristus. Katong samua jua sama-sama dapa baptis par jadi tanda kalo katong parcaya Antua. 6 Cuma ada satu Allah. Antua tu katong samua pung Bapa. Antua tu yang pung kuasa par samua-samua, yang karja lewat samua-samua, deng yang tinggal dalang katong samua pung hati.Kristus kasi berkat yang beda-beda par Antua pung orang-orang
4:7-16
7 Mar, Yesus Kristus su kasi berkat basar yang beda-beda par katong. Antua kasi akang iko apa yang Antua pikir itu pas par katong satu-satu, biar katong bisa karja par Antua. 8 Tagal itu, dalang Allah pung Tulisang ada bilang,
“Abis Antua kasi kala Antua pung musu-musu,
Antua nai ka tampa yang paleng tinggi sama-sama deng orang-orang yang dapa tahang waktu Antua kasi kala dong.
La Antua kasi berkat-berkat par manusia.”*
9 Kalo Antua su nai ka tampa yang paleng tinggi, itu pung arti kalo Antua jua su turung ka dunya pung bagiang yang paleng bawa to? 10 Kristus yang su turung tu, Antua tu jua yang su nai ka tampa yang labe tinggi dari samua langit. Antua biking bagitu biar Antua bisa pegang parenta par samua-samua yang ada di langit deng di dunya. 11 Antua tu yang kasi berkat basar yang beda-beda par Antua pung orang-orang. Ada yang Antua pili par jadi Antua pung utusang-utusang. Ada yang jadi Antua pung juru-juru bicara. Ada yang jadi orang yang pi kasi tau Allah pung Kabar Bae par orang-orang yang balong parcaya Antua. La ada lai yang jadi pamimping jamaat deng yang ajar Allah pung ajarang yang batul. 12 Antua biking bagitu biar dong samua tu bisa kasi siap Antua pung orang-orang par biking Antua pung karja. Biar, samua orang yang parcaya Kristus, yang sama deng Kristus pung badang sandiri tu, dong pung parcaya jadi labe tamba kuat. 13 La deng bagitu, katong samua jadi satu tagal katong su parcaya Allah pung Ana Yesus Kristus tu deng pung pikirang yang sama soal Antua. Katong jua batumbu deng baakar kuat-kuat dalang katong pung parcaya par Yesus Kristus, sampe katong pung hidop jadi sama deng Antua.
14 Jadi, katong seng sama deng parau yang anyo, yang aros bawa kasana-kamari. Ka, katong seng sama deng anana kacil lai yang gampang paskali par dapa parlente dari orang-orang yang datang deng mulu manis la kasi balajar saribu satu macang ajarang yang seng batul. Ajarang-ajarang yang kaluar dari dong pung akal busu tu, akang bisa biking katong ilang jalang. 15 Mar, katong musti bicara apa yang batul soal Allah par samua orang tagal katong sayang dong. Kalo katong biking bagitu, katong nanti labe hari labe tamba batumbu deng baakar kuat-kuat dalang katong pung hidop samua macang deng Kristus. Antua tu, katong pung Kapala, 16 la katong ni macang deng Antua pung badang, yang Antua ika jadi satu dari bagiang yang beda-beda. Kalo bagiang-bagiang tu biking akang pung tugas bae-bae, badang jadi labe tamba kuat. Jadi, kalo katong biking katong pung tugas bae-bae sama deng apa yang Antua su kasi par katong satu-satu, katong nanti labe tamba kuat deng labe tamba baku sayang satu deng laeng.*
Jang hidop sama deng orang yang seng parcaya Allah
4:17-32
17 Jadi basudara samua e, deng Tuhan pung kuasa yang Antua su kasi par beta, beta mau bilang deng sunggu-sunggu soal satu ni: Jang hidop macang deng orang yang seng tau Allah lai, yang cuma pikir hal-hal yang seng ada pung guna! 18 Dong pung pikirang su mati deng dong hidop jau dari Allah, tagal dong kapala batu paskali deng seng mau tau apapa soal Allah. 19 Dong pung urat malu su putus, jadi dong hidop iko dong pung sagala macang napsu jahat tarus deng biking yang kurang-kurang ajar, tagal dong sama seng parna puas par biking akang.
20 Mar, waktu kamong balajar soal Yesus Kristus pung ajarang tu, kamong seng dapa ajar par hidop macang bagitu. 21 Beta tau kalo kamong su dengar ajarang soal Yesus Kristus deng su dapa kasi balajar ajarang yang batul soal Antua. 22 Kamong su dapa kasi balajar kalo kamong musti kubur kamong pung cara hidop waktu kamong balong kanal Yesus Kristus deng kubur kamong pung tabiat hidop yang lama. Kamong pung napsu-napsu jahat tu yang tipu kamong deng yang biking kamong pung hidop rusak.* 23 Kamong su dapa kasi balajar par kasi biar Allah roba kamong pung hati deng pikirang jadi baru. 24 Kamong jua su dapa kasi balajar par hidop deng tabiat hidop yang baru, yang Allah biking sama deng Antua pung tabiat yang batul deng barsi dari dosa.*
25 Tagal itu basudara e, jang parlente putar bale lai! Kamong musti bicara apa yang batul satu deng laeng, tagal katong samua ni su taika jadi satu macang deng badang yang taika dari bagiang yang beda-beda.* 26 Kalo kamong ada mara, jang kasi biar akang biking sampe kamong bardosa. Jang simpang mara tu sampe matahari maso,* 27 biar Setang pung Raja seng ada pung kans par coba kamong par biking dosa. 28 Orang yang suka pancuri musti barenti pancuri! Labe bae dia pake dia pung tangang par karja par biking apa yang bae, biar dia ada pung apapa par bage deng orang-orang kasiang.
29 Jang kasi kaluar kata-kata yang seng pantas-pantas waktu bicara deng orang laeng! Mar, pake kata-kata yang ada pung guna par kasi kuat orang laeng waktu dong ada parlu par dapa tolong. Kata-kata yang macang bagitu biking orang yang dengar akang pung hati sanang. 30 Jang biking Allah pung Roh susa deng kamong pung cara hidop! Barang, Antua pung Roh yang Antua su kasi par kamong tu sama deng cap yang jadi tanda kalo kamong tu Antua pung orang-orang. Tanda tu jadi bukti kalo satu waktu Antua nanti kasi lapas kamong samua dari dunya yang jahat ni.
31 Kasi tinggal kamong pung sagala macang tabiat yang suka hati saki, takiri-kiri, jumawa, baku bakalai, ka biking busu orang pung nama, bagitu lai deng sagala macang kajahatang. 32 Mar, kamong musti baku sayang deng baku tolong satu deng laeng. Kamong jua musti kasi ampong satu deng laeng pung sala, sama deng Allah yang su kasi ampong kamong pung dosa-dosa, tagal apa yang Yesus Kristus su biking.*