Paulus pung karja par orang-orang bukang Yahudi
3:1-13
3
1 Basudara e, tagal apa yang Allah su biking par kamong orang-orang bukang Yahudi, beta sombayang par kamong. Beta mau kamong tau kalo beta maso bui tagal kasi tau Yesus Kristus pung Kabar Bae par orang-orang bukang Yahudi.2 Pasti kamong su dengar kalo tagal Allah pung hati bae, Antua pili beta par kasi tau Kabar Bae tu par kamong. 3 Memang, dolo seng ada orang yang tau soal Antua pung rencana par orang-orang bukang Yahudi. Mar sakarang, Antua su kasi tau akang par beta. Beta su tulis sadiki soal ini par kamong. 4 Kalo kamong baca akang, kamong nanti batul-batul mangarti Antua pung rencana soal Yesus Kristus, yang Antua su kasi tau par beta tu. 5 Dolo-dolo, Allah seng kasi tau Antua pung rencana tu par sapa-sapa. Mar sakarang, Antua pung Roh su kasi tau Antua pung rencana tu par Antua pung utusang-utusang deng juru-juru bicara yang Antua su pili. 6 Antua pung rencana tu: Kamong orang-orang bukang Yahudi, kamong nanti dapa berkat yang sama deng berkat yang Antua su janji par orang-orang Yahudi, tagal kamong su parcaya Kabar Bae soal Yesus Kristus. Kamong jua nanti jadi satu kaluarga sama-sama deng orang-orang Yahudi deng nanti tarima apa yang Allah su janji par Antua pung orang-orang tagal apa yang Yesus Kristus biking.*
7 Tagal itu, beta kasi tau Antua pung Kabar Bae tu. Beta anggap beta pung karja ni macang deng hadia satu yang paleng basar dari Antua. Barang, tagal Antua pung hati bae, Antua pili beta par jadi Antua pung orang karja deng kasi Antua pung kuasa biar beta bisa biking karja ni. 8 Beta herang soal ini, tagal dari Allah pung orang-orang samua, beta ni orang yang paleng hina paskali. Mar biar kata bagitu, Antua kasi unju Antua pung hati bae la pili beta par biking Antua pung karja panting satu ni. Karja tu par kasi tau Kabar Bae par orang-orang bukang Yahudi, par kasi tau dong soal berkat yang katong dapa dari Yesus Kristus, berkat yang katong seng abis pikir tu. 9 Allah jua suru beta par kasi tau Antua pung rencana tu par samua orang. Dari dolo-dolo lai, Allah yang biking dunya ni sambunyi Antua pung rencana tu mati-mati dari sapa sa. 10 Antua biking samua tu biar sakarang, malekat-malekat deng setang-setang yang pegang parenta di langit deng di mana sa bisa tau soal Antua pung saribu satu macang cara par kasi unju Antua pung pikirang tajang yang paleng hebat tu. Dong bisa tau itu tagal dong lia apa yang Antua biking par orang Yahudi deng orang bukang Yahudi yang su parcaya Kristus. 11 Allah rencana par biking bagitu dari dolo-dolo lai, waktu Antua balong biking dunya ni. Antua pung rencana tu su jadi waktu Tuhan Yesus Kristus yang katong somba mati di kayo salib. 12 La tagal katong parcaya deng su satu hati deng Yesus Kristus, katong jadi barani deng seng usa taku-taku par datang bicara deng Allah. 13 Tagal itu basudara e, beta minta jang kamong hati susa dengar beta pung susa deng sangsara dalang bui tagal kasi tau Kabar Bae soal Yesus Kristus par kamong. Barang, beta pung susa deng sangsara ni bawa berkat par kamong.
Paulus sombayang minta dangke dari Allah
3:14-21
14 Basudara orang-orang bukang Yahudi e! Tagal samua yang Allah Bapa su biking par kamong tu, beta tikang lutu sombayang par Antua. 15 Antua tu Bapa par samua yang ada di sorga deng di dunya. 16 Beta sombayang biar Allah yang pung kuasa paleng hebat deng luar biasa tu biking kamong pung hati jadi tamba kuat lewat Antua pung Roh, 17 deng biar Yesus Kristus tinggal tarus-tarus dalang kamong pung hati, tagal kamong parcaya Antua. Beta jua sombayang biar dalang kamong pung hidop, kamong pung sayang par Antua deng orang laeng labe tamba batumbu deng baakar kuat-kuat. 18-19 Beta jua sombayang biar kamong, sama-sama deng Allah pung orang-orang samua, bisa batul-batul mangarti Yesus Kristus pung sayang yang talalu basar paskali par katong ukur deng talalu kadalang paskali par katong rai. Biar kata manusia seng bisa ukur akang, mar beta sombayang biar kamong bisa batul-batul tau Antua pung sayang tu, biar kamong pung hidop, hati, pikirang, deng kalakuang samua jadi sama deng Allah pung tabiat.
20 Tuhan Allah pung kuasa talalu basar paskali, labe dari samua yang bisa katong pikir deng samua yang bisa katong minta dari Antua. La deng kuasa tu, Antua karja dalang katong pung hati. 21 Tagal itu, mari katong yang su jadi Allah pung orang-orang, orang-orang yang su satu hati deng Yesus Kristus, mari katong puji-puji Allah! Antua pantas par dapa puji dari sakarang sampe tarus-tarus. Amin.