Paulus pung Surat par Jamaat di
Efesus
Tabea
1:1-2
1
1 Par basudara samua di kota Efesus yang su jadi Allah pung orang-orang, yang parcaya Yesus Kristus tarus.*Tabea! Beta ni Paulus yang Allah pili par jadi Yesus Kristus pung utusang. 2 Beta minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.
Katong musti puji-puji Allah tagal Antua pung hati bae
1:3-14
3 Basudara e, mari katong puji-puji Allah! Antua tu Tuhan Yesus Kristus yang katong somba pung Bapa. Antua su kasi sagala macang berkat rohani dari sorga par katong, tagal katong su satu hati deng Yesus Kristus. 4 Barang, dari waktu Antua balong biking dunya ni lai, Antua su pili katong par jadi satu hati deng Yesus Kristus, biar katong jadi Antua pung orang-orang yang seng bardosa deng seng pung sala di muka Antua. 5 Antua sayang katong sampe Antua putus dari dolo paskali par angka katong jadi Antua pung anana sandiri. Antua biking bagitu tagal apa yang Yesus Kristus biking. Antua su putus bagitu tagal Antua pung mau sandiri deng tagal Antua sanang par biking bagitu. 6 Jadi, itu tu alasang mangapa kong katong puji-puji Antua, tagal Antua pung hati bae yang Antua su kasi batambong-tambong par katong tu. Antua biking bagitu bukang tagal katong pantas par tarima akang, mar tagal katong su satu hati deng Antua pung Ana Yesus yang Antua paleng sayang tu. 7 Barang, tagal Antua pung Ana pung dara tatumpa di kayo salib par kasi lapas katong dari dosa pung kuasa, Allah kasi ampong katong. Allah biking bagitu tagal Antua pung hati bae yang seng abis-abis par katong.* 8 Antua kasi Antua pung hati bae yang seng abis-abis par katong deng biking katong pung pikirang tajang deng tau Antua pung rencana. 9 Dari dolo, seng ada yang tau Antua pung rencana. Mar sakarang, tagal Antua pung mau sandiri, Antua su kasi tau apa yang Antua mau biking lewat Yesus Kristus tu par katong. 10 Antua pung rencana tu bagini: Yesus Kristus nanti biking samua yang ada di sorga deng yang ada di dunya jadi satu pas akang pung oras, la parenta samua-samua tu.
11 Allah biking samua-samua iko Antua pung mau sandiri. Dari dolo, Antua su putus par pili katong par jadi Antua pung orang-orang tagal katong su satu hati deng Yesus Kristus. 12 Antua biking bagitu biar katong orang-orang Yahudi yang parcaya Kristus kamuka nanti puji-puji Antua tagal Antua paleng hebat.
13 La kamong orang-orang bukang Yahudi, kamong jua su satu hati deng Kristus waktu kamong dengar Allah pung ajarang yang batul. Ajarang tu Kabar Bae yang bisa kasi salamat kamong. Kamong su parcaya Yesus, jadi Allah su kasi Antua pung Roh yang kudus yang Antua su janji tu par kamong. Antua pung Roh tu sama deng cap yang jadi tanda kalo kamong tu Antua pung orang-orang. 14 Antua pung Roh tu jadi bukti yang kuat par katong kalo katong nanti tarima samua yang Antua su janji par Antua pung orang-orang. Ini yang biking katong jadi parcaya batul-batul kalo Antua nanti kasi lapas katong samua dari dunya yang jahat ni. Antua biking bagitu biar katong puji-puji Antua tagal Antua paleng hebat.
Paulus pung sombayang
1:15-23
15 Basudara e! Tagal samua yang Allah su biking tu, dari waktu beta dengar kalo kamong su parcaya Tuhan Yesus deng sayang Allah pung orang-orang samua, 16 beta seng putus-putus minta dangke banya dari Allah soal kamong. Waktu beta sombayang, beta salalu sombayang par kamong. 17 Beta sombayang par Allah, yang pung kuasa paleng basar tu. Antua tu Tuhan Yesus Kristus yang katong somba pung Bapa. Beta sombayang tarus biar Antua kasi Antua pung Roh par biking kamong pung pikirang tajang deng labe mangarti soal Antua biar kamong bisa kanal Antua batul-batul. 18 Beta jua sombayang biar Antua buka kamong pung hati deng pikirang. Beta sombayang bagitu biar kamong mangarti soal apa yang bae yang kamong batul-batul harap dari Antua yang su pili kamong par jadi Antua pung orang-orang tu. Beta jua sombayang biar kamong mangarti berkat yang paleng basar yang Antua su janji par Antua pung orang-orang. 19 Beta sombayang lai biar kamong tau Antua pung kuasa yang paleng basar, yang Antua pake par tolong katong orang-orang yang parcaya Antua. Kuasa tu, kuasa yang sama deng kuasa 20 yang Antua pake par kasi hidop Yesus Kristus kombali dari kamatiang. Antua jua pake kuasa tu par angka Yesus Kristus par dudu di Antua pung sabala kanang, tampa paleng panting di sorga.* 21 Di tampa tu, Yesus Kristus pegang kuasa par malekat-malekat deng setang-setang samua. Antua pegang kuasa par samua-samua yang ada di langit deng di dunya. Antua pung kuasa labe basar dari samua-samua tu pung kuasa. Antua pegang kuasa par samua-samua tu bukang cuma sakarang sa, mar tarus-tarus. 22 Allah biking samua-samua tundu par Yesus Kristus pung parenta. Antua jua su angka Yesus Kristus jadi kapala par orang-orang parcaya.* 23 Orang-orang parcaya tu sama deng Kristus pung badang. Samua yang Antua pung, Antua su kasi akang par orang-orang parcaya. Antua yang pung kuasa par samua hal di mana sa.*